រាជធានីភ្នំពេញ ៖ គេនៅចាំបានថា សម្រាប់ការប្រកួតកាលពីរដូវកាលទី១ កីឡាករ ម៉ឺន មេឃា បានក្លាយជាម្ចាស់ខ្សែក្រវាត់«កម្ពុជាសង្វៀនគុនខ្មែរ» បន្ទាប់ពីប្រកួតឈ្នះកីឡាករថៃ លីង លំបាន ដោយពិន្ទុ ដោយទទួលបានប្រាក់រង្វាន់ចំនួន៦ពាន់ដុល្លារសហរដ្ឋអាមេរិក ។ ចំណែកការប្រកួតលើកនេះ ធ្វើឡើងតាមរូបមន្តចាស់ យកអ្នកឈ្នះលេខ១ជុំទី១ឡើងទៅប្រកួតជាមួយអ្នកឈ្នះលេខ១ជុំទី២ ។
សម្រាប់ការប្រកួតនៅក្នុងរដូវកាលទី២វគ្គជម្រុះជុំទី១ នៅសង្វៀនស្ថានីយទូរទស្សន៍ស៊ីអិនស៊ី ធ្វើឡើងនៅព្រឹកថ្ងៃសៅរ៍ទី១២ ខែតុលាឆ្នាំ២០១៩ មានចំនួន២គូ អមដោយគូប្រកួតជាលក្ខណៈមិត្តភាពចំនួន២គូទៀត ។ អ្នកដែលត្រូវមានមុខប្រកួតមុនគេមាន កីឡាករ ផាន រះ មកពីក្លិបតាព្រហ្មមានជ័យ ប្រកួតជាមួយកីឡាករថៃ ភេតណងប៊ី គាតបានឌីនយីម ឯកីឡាករ ធន់ ចាន់តាក់ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃ ផេត សាកេត ប្រានសងហុក ។
ការប្រកួតនេះចែកចេញជា២ពូល គឺពូលA កីឡាករកម្ពុជាមាន៤រូប និងពូលBកីឡាករថៃមាន៤រូប ប្រកួតជាលក្ខណៈជម្រុះរកអ្នកឈ្នះទាំងពូលA និងពូលB តែ២រូបប៉ុណ្ណោះដើម្បីឡើងទៅប្រកួតនៅវគ្គបន្ត ។ ប៉ុន្តែសម្រាប់ការប្រកួតក្នុងជុំទី១នេះ មិនដឹងថាកីឡាករកម្ពុជាអាចដណ្ដើមយកបាន៣ពិន្ទុមកទុកនៅក្នុងដៃមុនគេឬក៏អត់នោះទេ ។
ចំណែកគូប្រកួតជាលក្ខណៈមិត្តភាពចំនួន២គូទៀត កីឡាករ ឌុម កែវដា មកពីក្លិបមកុដ រាជសីហ៍ ប្រកួតជាលក្ខណៈមិត្តភាពអន្តរជាតិជាមួយកីឡាករថៃ ភិតសិង្ហា និធីតណាយក្វាម ក្នុងប្រភេទទម្ងន់៦៣,៥គីឡូក្រាម ។
ចំណែកកីឡាករ សៀវ ងុ៉យ មកពីសមាគមកីឡាប្រដាល់ ក្រសួងការពារជាតិ ប្រកួតជាមួយកីឡា រ៉ែន រាជ មកពីក្លិបអង្គរមានជ័យ ខេត្តសៀមរាប ៕ (កែសម្រួលដោយ ៖ បុប្ផា)
ចែករំលែកព័តមាននេះ