ខេត្តព្រះវិហារ ៖ ក្រុមហ៊ុនដីសម្បទានសេដ្ឋកិច្ចមួយឈ្មោះប្លូហេវិន កំពុងលុកលុយកាប់បំផ្លាញព្រៃឈើការពារដោយបរិស្ថានយ៉ាងអនាធិបតេយ្យ ស្ថិតក្នុងភូមិព្យួរជ្រូក ឃុំគូលែនជើង ស្រុកគូលែន ។ ក្រឡេកមើលចុះ ឈើហុបធំៗរាប់រយរាប់ពាន់ដើមត្រូវបានកាប់ធ្វើអាជីវកម្មតាមចិត្ត ហើយអត់ទាន់ដាំបានធ្វើសោះ ។
ខេត្តព្រះវិហារ ៖ ក្រុមហ៊ុនដីសម្បទានសេដ្ឋកិច្ចមួយឈ្មោះប្លូហេវិន កំពុងលុកលុយកាប់បំផ្លាញព្រៃឈើការពារដោយបរិស្ថានយ៉ាងអនាធិបតេយ្យ ស្ថិតក្នុងភូមិព្យួរជ្រូក ឃុំគូលែនជើង ស្រុកគូលែន ។ ក្រឡេកមើលចុះ ឈើហុបធំៗរាប់រយរាប់ពាន់ដើមត្រូវបានកាប់ធ្វើអាជីវកម្មតាមចិត្ត ហើយអត់ទាន់ដាំបានធ្វើសោះ ។
អ្នកស្រុកនៅតំបន់នោះឱ្យដឹងថា ក្រុមហ៊ុននេះកំពុងតែសម្រុកកាប់ឈើហុបរាប់ពាន់ដើម និងដាក់ម៉ាស៊ីនរ៉ៃអារច្រៀកឈើហុប ដឹកចេញទៅលក់នៅផ្សារយ៉ាងអនាធិបតេយ្យ ក្រោមស្លាកវិនិយោគដីសម្បទានសេដ្ឋកិច្ចលើផ្ទៃដីជាង៩ពាន់ហិកតាក្នុងតំបន់នោះ ។ បុ៉ន្តែតាមការសង្កេត ក្រុមហ៊ុននេះពុំទាន់ឃើញវិនិយោគអ្វីនៅលើដីនោះនៅឡើយទេ សូម្បីតែកូនម្ទេស១ដើមដាំនៅលើដីក្រុមហ៊ុន ក៏គ្មានផង គឺគ្មានសកម្មភាពអ្វីទាំងអស់ក្នុងការវិនិយោគរបស់ខ្លួន មានតែការកាប់ជញ្ជូនឈើហុបចេញពីព្រៃនានា ហើយអូសចូលដីក្រុមហ៊ុនដើម្បីអារច្រៀកដោយម៉ាស៊ីនរ៉ៃ និងដឹកជញ្ជូនទៅលក់មានសកម្មភាពមមាញឹកណាស់ ។
បុរសម្នាក់ឈ្មោះ រ៉ាំ ថុត រស់នៅក្នុងឃុំគូលែនជើងអះអាងថា គាត់មានរថយន្តរ៉េវ និងជាអ្នកស៊ីឈ្នួលរុករកកាប់ឈើហុបដ៏កម្រនានាអូសចូលទៅលក់ឱ្យក្រុមហ៊ុនខាងលើនេះក្នុងមួយម៉ែត្រគូប៣០ដុល្លារ ។ បុ៉ន្តែមកដល់ពេលនេះអស់រយៈពេលជាង៣ខែហើយដែលរូបគាត់ជាអ្នកកាប់ឈើផ្ទាល់លក់ឱ្យក្រុមហ៊ុនខាងលើនេះ គឺពុំទាន់បានទូទាត់ថវិកាឱ្យមួយរៀលណានៅឡើយទេ ។ ជុំវិញបញ្ហានេះដែរ លោកជុំ ពុយ អភិបាលស្រុកគូលែន ឱ្យដឹងនៅព្រឹកថ្ងៃទី២០ មេសាថា ក្រុមហ៊ុនដីសម្បទានសេដ្ឋកិច្ចនេះបានវិនិយោគដីសម្បទានសេដ្ឋកិច្ចក្នុងតំបន់នោះអស់រយៈពេលជាងមួយឆ្នាំមកហើយ ។ លោកអភិបាលស្រុកអះអាងថា ក្រុមហ៊ុននេះមានអាជ្ញាប័ណ្ណត្រឹមត្រូវក្នុងការធ្វើវិនិយោគដីសម្បទានសេដ្ឋកិច្ចខាងលើ និងពេលនេះដាំដំឡូងមីចំនួន២៥ហិកតាសិនលើផ្ទៃដីជាង៩ពាន់ហិកតា គឺដាំឱ្យមានឈ្មោះថា បានដាំដែរ ឯរឿងធំគឺកាប់ឈើធ្វើជំនួញ ។
ចំពោះការកាប់បំផ្លាញព្រៃឈើយ៉ាងអនាធិបតេយ្យនេះដែរ បើតាមមន្ត្រីបរិស្ថានខេត្តមួយរូប (សុំមិនបញ្ចេញឈ្មោះ) ដែលជាអ្នកគ្រប់គ្រងព្រៃការពារបរិស្ថានក្នុងតំបន់នោះបានអះអាងថា ក្រុមហ៊ុននេះមានអាជ្ញាប័ណ្ណវិនិយោគដីសម្បទានសេដ្ឋកិច្ចចំនួន៩ពាន់ហិកតាក្នុងតំបន់នោះប្រាកដមែន ។ បុ៉ន្តែពាក់ព័ន្ធនឹងការកាប់ឈើយ៉ាងអនាធិបតេយ្យដែលគ្មានកំណត់គោលដៅច្បាស់លាស់របស់ក្រុមហ៊ុនវិនិយោគនេះ លោកមិនដឹងទេ ។ ទោះជាយ៉ាងណា លោកនឹងចុះទៅត្រួតពិនិត្យក្រុមហ៊ុននេះ គឺរកឱ្យឃើញពីការកាប់ឈើយ៉ាងអនាធិបតេយ្យដឹកចូលដីក្រុមហ៊ុន ។ ជាមួយនេះ ត្រូវត្រួតពិនិត្យឡើងវិញ ដែលក្រុមហ៊ុនមានអាជ្ញាប័ណ្ណហើយមិនអនុវត្តការដាំដុះ បែរជាគិតតែកាប់ឈើលក់ និងធ្វើរបាយការណ៍ទៅក្រសួង ។ មកដល់ពេលនេះ អ្នកយកព័ត៌មានព្យាយាមទាក់ទងជាមួយតំណាងក្រុមហ៊ុនខាងលើជាច្រើនដង បុ៉ន្តែមិនបានទទួលជោគជ័យទេ ដោយអ្នកទទួលទូរស័ព្ទនិយាយថា ជាប់រវល់មិនបានផ្តល់ព័ត៌មានពិស្តារដល់អ្នកយកព័ត៌មានទេ ។
ប្រជាពលរដ្ឋក្នុងតំបន់នោះរិះគន់ថា ក្រុមហ៊ុនមួយនេះមានតែឈ្មោះ និងកាប់ឈើហុបយកមកអារច្រៀកលក់តែបុ៉ណ្ណោះ ។ រីឯការធ្វើវិនិយោគលើដីសម្បទានសេដ្ឋកិច្ច គឺមិនមានសកម្មភាពអ្វីទាល់តែសោះអស់រយៈពេលជាងមួយឆ្នាំមកហើយ ប្រៀបដូចក្រុមហ៊ុនធ្វើនំអត់ម្សៅ ។ សូមរំលឹកផងដែរថា ក្រុមហ៊ុនមួយនេះតាមការឱ្យដឹងពីមន្ត្រីបរិស្ថាន គឺជាដៃគូរបស់ក្រុមហ៊ុនមួយទៀតមានឈ្មោះថា ក្រុមហ៊ុនកម្ពុជាដោន ដែលកន្លងទៅនេះបានកាប់ព្រៃឈើយ៉ាងរង្គាលនៅក្នុងព្រៃបរិស្ថានគូលែនព្រហ្មទេពក្នុងឃុំព្រីងធំ ក្រោមស្លាកវិនិយោគដីសម្បទានសេដ្ឋកិច្ច ហើយឥឡូវនេះបានមកលុកលុយនៅព្រៃស្រុកគូលែនទៀត ។
ប្រជាពលរដ្ឋក្នុងស្រុកគូលែនរិះគន់ទៀតថា ក្រុមហ៊ុនមួយនេះមិនគួរណាធ្វើការសាកល្បងដាំដំឡូងមីលើផ្ទៃដីត្រឹមតែ២៥ហិកតាក្នុងផ្ទៃដីសរុប៩ពាន់ហិកតានោះទេ ។ គួរគប្បីធ្វើការវិនិយោគពី៣០០ហិកតាទៅ៥០០ហិកតាទើបសម ព្រោះក្រុមហ៊ុនមានវិសាលភាពធំណាស់ទៅលើផ្ទៃដី៩ពាន់ហិកតា ឬក៏ក្រុមហ៊ុននេះគួរសង្ស័យកាប់ព្រៃឈើអស់ហើយរត់ចោលដូចក្រុមហ៊ុននៅឃុំព្រីងធំដែរ ? ប្រជាពលរដ្ឋស្រុកគូលែន បានសំណូមពរដល់រាជរដ្ឋាភិបាល សូមមានវិធានការទៅលើក្រុមហ៊ុននេះជាបន្ទាន់ ដើម្បីជាប្រយោជន៍ការពារបាននូវធនធានព្រៃឈើ ជាពិសេសឈើប្រណីតដែលមានអាយុកាលរាប់រយឆ្នាំឱ្យស្ថិតស្ថេរគង់វង្ស ៕
ចែករំលែកព័តមាននេះ