ខេត្តសៀមរាប ៖ នគរបាលស្រុកពួក សហការជាមួយនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត បានឃាត់ខ្លួនបុរសជាប្តី ដែលបានសម្លាប់ប្រពន្ធ ខណៈពេលរូបគេស្រវឹងស្រា ហើយទាញកាំបិតខ្វែវកាប់ប្រពន្ធជាច្រើនកាំបិត ផុងលលាដ៍ក្បាលស្លាប់ភ្លាមៗនៅលើផ្ទះ ។ ហេតុការណ៍នេះ កើតឡើងកាលពីវេលាម៉ោង៥ភ្លឺ ថ្ងៃទី២០ មេសា នៅលើផ្ទះ ក្នុងភូមិចុងថ្នល់ ឃុំយាង ស្រុកពួក ។
បុរសជាប្តីឈ្មោះ លិក ជ្រក់ អាយុ៣៥ឆ្នាំ ឯប្រពន្ធដែលស្លាប់ឈ្មោះ ហូរ ភន់ អាយុ៣៧ឆ្នាំ មានកូនប្រុស២នាក់ អាយុ៦ឆ្នាំ និង៨ឆ្នាំ ។ លោកអនុសេនីយ៍ឯក នឹម សារ៉ាត់ អធិការរងនគរបាលស្រុកពួក ទទួលបន្ទុកព្រហ្មទណ្ឌ និងលោកអនុសេនីយ៍ឯក ជិន សឿត នាយផ្នែកឧក្រិដ្ឋមួយព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត ឱ្យដឹងថា បុរសជាប្តី ក្រោយពីកាប់ប្រពន្ធស្លាប់ហើយ មិនបានរត់គេចទៅណាទេ ទើបសមត្ថកិច្ចឃាត់ខ្លួនបានភ្លាមៗ ហើយសួរនាំ រួចបញ្ជូនបន្តទៅការិយាល័យព្រហ្មទណ្ឌកម្រិតធ្ងន់ខេត្ត នៅវេលាម៉ោង៣រសៀល ថ្ងៃទី២០ មេសា ។
លោកឱ្យដឹងទៀតថា បុរសជាប្តី និយាយថា រូបគេបានសម្លាប់ប្រពន្ធប្រាកដមែន ដោយសារញៀនស្រា ហើយមានអារម្មណ៍រវើរវាយថាមានគេមកកាប់ខ្លួន ពេលនោះក៏ទៅទាញកាំបិតខ្វែវមកកាប់ប្រពន្ធជាច្រើនកាំបិតតែម្តង ប៉ុន្តែកូនៗដេកក្នុងមុងមិនភ្ញាក់ទេ ។ ក្រោយពេលសួរនាំ សមត្ថកិច្ចនៃស្នងការដ្ឋាននគរបាលខេត្ត បានកសាងសំណុំរឿងបញ្ជូនបុរសជាប្តី និងវត្ថុតាង ទៅសាលាដំបូងខេត្ត ដើម្បីចាត់វិធានការតាមច្បាប់ ។ ដោយឡែក នៅក្នុងហេតុការណ៍ខាងលើនេះ អ្នកភូមិដែលទៅជួយឃាត់ ក៏ត្រូវបុរសនេះកាប់រយះម្រាមដៃស្តាំ និងគុម្ពត្រចៀកផងដែរ ៕
ចែករំលែកព័តមាននេះ