ខេត្តកំពង់ចាម ៖ អំពើសម្លាប់ដោយកាប់ជនរងគ្រោះយ៉ាងឃោរឃៅរហូតដាច់ក ប្លន់យកខ្សែ.ក និងខ្សែដៃ ផ្តើមចេញពីគំនិតដ៏ខ្មៅក្រខ្វក់របស់មិត្តភក្តិ៣នាក់ ហើយក្រោយពីសម្លាប់រួច បានយកសពទៅប្លុងចោលនៅក្បែរស្ពានព្រែកសណ្តាយ ស្ថិតត្រង់ព្រំប្រទល់ស្រុកចំនួន៣គឺ ស្រុកអូររាំងឪ ស្រុកកោះសូទិន ខេត្តកំពង់ចាម និងស្រុកស៊ីធរកណ្តាល ខេត្តព្រៃវែង។
ខេត្តកំពង់ចាម ៖ អំពើសម្លាប់ដោយកាប់ជនរងគ្រោះយ៉ាងឃោរឃៅរហូតដាច់ក ប្លន់យកខ្សែ.ក និងខ្សែដៃ ផ្តើមចេញពីគំនិតដ៏ខ្មៅក្រខ្វក់របស់មិត្តភក្តិ៣នាក់ ហើយក្រោយពីសម្លាប់រួច បានយកសពទៅប្លុងចោលនៅក្បែរស្ពានព្រែកសណ្តាយ ស្ថិតត្រង់ព្រំប្រទល់ស្រុកចំនួន៣គឺ ស្រុកអូររាំងឪ ស្រុកកោះសូទិន ខេត្តកំពង់ចាម និងស្រុកស៊ីធរកណ្តាល ខេត្តព្រៃវែង។
ហេតុការណ៍នេះត្រូវបានគេដឹងបន្ទាប់ពីមានការប្រទះឃើញសពមានដង្កូវចោះរួចទៅហើយ នៅវេលាម៉ោងជាង៥ល្ងាច ថ្ងៃទី១៨ មេសា ទើបមានការភ្ញាក់ផ្អើលដល់កម្លាំងសមត្ថកិច្ចចុះទៅត្រួតពិនិត្យតាមលក្ខណៈបច្ចេកទេស ។ លោកវរសេនីយ៍ត្រី លឿង រដ្ឋា អធិការនគរបាលស្រុកអូររាំងឪ បានប្រាប់ឱ្យដឹងថា សពជនរងគ្រោះ ដែលប្រជាពលរដ្ឋប្រទះឃើញនោះឈ្មោះ ថុល ឡាចន្ថា ហៅ ចាន់ តារា ភេទប្រុស អាយុ២០ឆ្នាំ មានស្រុកកំណើតនៅភូមិមេលោង ឃុំមៀន ស្រុកអូររាំងឪ សព្វថ្ងៃរស់នៅស្រុកកែវសីមា ខេត្តមណ្ឌលគិរី តែបានមកលេងផ្ទះក្នុងឱកាសបុណ្យចូលឆ្នាំថ្មីប្រពៃណីជាតិ ។
លោកអធិការបានបន្តថា តាមការស្រាវជ្រាវ នៅថ្ងៃទី១៦ មេសា ដែលជាថ្ងៃចូលឆ្នាំទី៣ ជនរងគ្រោះបានជិះម៉ូតូដើរលេងជាមួយនឹងមិត្តភក្តិចំនួន៣នាក់ រហូតដល់វេលាល្ងាច ក៏បាត់មិនឃើញមកផ្ទះវិញ ធ្វើឱ្យឪពុកម្តាយមានការព្រួយបារម្ភ និងតាមសួរគេឯងគ្រប់គ្នានៅក្នុងភូមិ តែមិនមានអ្នកណាបានដឹងទេ ។
រហូតមកដល់ល្ងាចថ្ងៃទី១៨ មេសា ប្រជាពលរដ្ឋដែលធ្វើដំណើរឆ្លងកាត់ត្រង់ចំណុចស្ពានព្រែកសណ្តាយ ធុំក្លិនស្អុយខុសប្លែកពីធម្មតា ក៏តាមរកប្រភពក្លិន ទើបប្រទះឃើញសពមនុស្សប្រុសម្នាក់ ដោយមានស្នាមកាប់ដាច់.ក ជាប់តែស្បែកបន្តិចប៉ុណ្ណោះ ។ សពពាក់អាវយឺតពណ៌ខ្មៅដៃវែង និងស្លៀកខោខូវប៊យ ។ បន្ទាប់មក អ្នកប្រទះឃើញសពបានរាយការណ៍ដល់នគរបាលប៉ុស្តិ៍រដ្ឋបាលឃុំមៀន ហើយលោកនាយប៉ុស្តិ៍ទូរស័ព្ទមកប្រាប់ លោកអធិការក៏មានការចាត់ឱ្យកម្លាំងជំនាញព្រហ្មទណ្ឌស្រុក ចុះទៅកន្លែងកើតហេតុជា បន្ទាន់ ។ ជាមួយនេះ ក៏បានរាយការណ៍បន្តទៅលោកឧត្តមសេនីយ៍ត្រី បែន រ័ត្ន ស្នងការនគរបាលខេត្តឱ្យបានដឹង ហើយក៏ចាត់ឱ្យការិយាល័យនគរបាលបច្ចេកទេសវិទ្យាសាស្ត្រខេត្ត ចុះទៅពិនិត្យសពទំាងយប់ផងដែរ ។
តាមរយៈអ្នកមកមើលសព ដំបូងគេមិនស្គាល់អត្តសញ្ញាណអ្នកស្លាប់នោះទេ តែការភ្ញាក់ផ្អើលនេះបានលេចឮដល់ក្រុមគ្រួសារជនរងគ្រោះ ទើបនាំគ្នាមកមើល និងស្គាល់អ្នកស្លាប់គឺឈ្មោះ ចាន់ តារា ។ ជុំវិញករណីនេះ ត្រូវបានគេដឹងថា ជាអំពើប្លន់សម្លាប់យកខ្សែ.កប្លាទីន១ខ្សែទម្ងន់២ជី ខ្សែដៃប្លាទីន៤ជី ព្រមទាំងទូរស័ព្ទដៃ១គ្រឿង តម្លៃ១៥០ដុល្លារ ពីសំណាក់ក្រុមមិត្តភក្តិចំនួន៣នាក់ ដែលគេស្គាល់អត្តសញ្ញាណ ក្នុងនោះមានអ្នកខ្លះបានរត់គេចខ្លួនទៅប្រទេសថៃ និងអ្នកខ្លះរត់ទៅខេត្តសៀមរាប។ លោកអធិការអះអាងថា លោកបានកសាងសំណុំរឿងនេះបញ្ជូនទៅសាលាដំបូងខេត្ត ដើម្បីសុំដីកាតាមចាប់ក្រុមឃាតករទំាងនោះហើយ ។ សពយុវជននេះមានស្នាមកាប់ចំនួន៣កន្លែងរួមមាន ត្រង់កកាប់ដាច់ជាប់តែស្បែកបន្តិចប៉ុណ្ណោះ ខ្នងដៃឆ្វេង និងចង្កា ។ សពនេះត្រូវគេប្លុងចោលនៅវាលស្រែ ចម្ងាយពីស្ពានព្រែកសណ្តាយប្រមាណ៥០ម៉ែត្រ ដោយមានដង្កូវចោះផងដែរ ។ ក្រោយពីបានពិនិត្យរួចរាល់ ក៏ប្រគល់សពទៅឱ្យឪពុកម្តាយទាំងយប់ ដើម្បីយកទៅធ្វើបុណ្យតាមប្រពៃណីនៅឃុំមៀន ស្រុកអូររាំងឪ ។ រហូតមកដល់ព្រឹកថ្ងៃទី២០ មេសា មិនទាន់មានជនសង្ស័យណាម្នាក់ត្រូវបានចាប់ខ្លួននៅឡើយទេ តែដោយយោងតាមបញ្ជារបស់លោកស្នងការនគរបាលខេត្ត សមត្ថកិច្ចកំពុងតែតាមប្រមាញ់ក្រុមឃាតករទាំង៣នាក់នោះហើយ ដោយសារតែបានស្គាល់អត្តសញ្ញាណ ។
គួររំឭកថា កាលពីវេលារំលងអធ្រាត្រឈានចូលថ្ងៃទី១ មីនា កន្លងទៅ ឃាតករមិនស្គាល់អត្តសញ្ញាណប្រដាប់ដោយអាវុធអាកាមួយដើម បានបាញ់ប្រហារយ៉ាងព្រៃផ្សៃទៅលើគ្រូពេទ្យឯកជនម្នាក់ឈ្មោះ អ៊ុក ម៉ានិន ភេទប្រុស អាយុ៣៣ឆ្នាំ និងប្រពន្ធឈ្មោះ ទាវ ស្រី អាយុ២៥ឆ្នាំ នៅភូមិខ្នប់ដំរីជើង ឃុំដំរិល ស្រុកអូររាំងឪ ហើយករណីនេះឃាតករមិនទាន់ទាំងចាប់ខ្លួនបានផង បែរជាមានករណីកាប់ប្រហារសុទ្ធតែសាហាវដូចគ្នា លើជនរងគ្រោះឈ្មោះ ចាន់ តារា ទៀត។ គេមិនដឹងថា តើសមត្ថកិច្ចអាចបំបែកសំណុំរឿង ដោយការតាមចាប់ឃាតករបានដែរឬយ៉ាងណាឡើយ ៕
ចែករំលែកព័តមាននេះ