បណ្តាញព័ត៌មានបរទេសផ្សាយថា កសិដ្ឋានចិញ្ចឹមគោយកទឹកដោះរបស់ថៃ បានត្រៀមទុកនូវផលិតផលទឹកដោះគោស្រស់របស់ខ្លួន ដើម្បីនាំចេញទៅទីផ្សារត៉ៃវ៉ាន់ នាអំទ្បុងខែមិថុនាខាងមុខ មុននឹងពង្រីកទីផ្សាររបស់ខ្លួននៅហុងកុង ។ លោក Suchart Jariyalertsakdi អគ្គនាយកក្រុមហ៊ុនផលិតទឹកដោះគោខាងលើ បានលើកទ្បើងកាលពីសប្តាហ៍មុនថា «តៃវ៉ាន់គឺជាទីផ្សារ ដែលមានសក្តានុពល និងគួរឱ្យចាប់អារម្មណ៍ចំពោះផលិតផលរបស់យើង ។
ម៉្យាងទៀត ក្រៅពីអតិថិជនតៃវ៉ាន់ ក៏នៅមានជនជាតិថៃប្រមាណជា១០ម៉ឺននាក់ផ្សេងទៀត ដែលកំពុងធ្វើការនៅទៅនោះស្រាប់ ។ ដូចនេះ យើងជឿជាក់ថា ផលិតផលទឹកដោះគោស្រស់របស់យើងមានមុំ នៃការប្រកួតប្រជែងទីផ្សារ» ។ ចំណែកយីហោដែលនឹងត្រូវបង្ហាញវត្តមានជាលើកដំបូងលើទីផ្សារនៃតំបន់នោះមានឈ្មោះថា «Thai-Danish» ដែលជាទឹកដោះគោរសជាតិផ្អែម និងទឹកដោះគោស្រស់ជាប្រអប់មានចំណុះ២០០មីលី្លលីត្រ ។
លោកបានបន្ថែមទៀតថា ប្រសិនបើការប្រទ្បូកលើទីផ្សារនេះទទួលបានជោគជ័យ ការលក់របស់យើងនឹងបង្កើនលទ្ធភាពវាយលុកទីផ្សារហុងកុង ប្រទេសចិន ជប៉ុន និងកូរ៉េខាងត្បូង ថែមទៀត ។ សូមបញ្ជាក់ថា ជំហានដំបូងប្រទេសថៃ នឹងនាំចេញទៅតៃវ៉ាន់ត្រឹមតែ២០តោនប៉ុណ្ណោះ នៅក្នុងខែមិថុនា ចំណែកតាមការគ្រោងទុក គឺពី៤០ទៅ៦០តោក្នុង១ខែ ៕
ចែករំលែកព័តមាននេះ