លោក Nelson Paviotti វ័យ ៥៧ឆ្នាំ រស់នៅទីក្រុងសាវប៉ូឡូ ប្រទេសប្រេស៊ីល ជាមេធាវីជើងចាស់ ហើយក៏ជាអ្នកគាំទ្របាល់ទាត់ជម្រើសជាតិប្រេស៊ីល ដ៏ចំណាស់ជាងគេបំផុត ដែលបានចំណាយពេលវេលា២០ឆ្នាំ ជ្រើសរើសយកវត្ថុប្រើប្រាស់គ្រប់យ៉ាងតំណាងឱ្យឈុតសម្លៀកបំពាក់ក្រុមជម្រើសជាតិប្រេស៊ីល ដែលមានពណ៌លឿង បៃតង ខៀវ និងពណ៌ស បន្ទាប់ពីក្រុមបាល់ទាត់ជម្រើសជាតិប្រេស៊ីលលើកពានរង្វាន់ បាល់ទាត់ពិភពលោកក្នុងឆ្នាំ១៩៩៤ ។
ជារៀងរាល់ថ្ងៃ មេធាវីវ័យចំណាស់តែងតែបើករថយន្ដទៅធ្វើជាធម្មតា តែលក្ខណៈពិសេសត្រង់ថា រថយន្ដនិងការតុបតែងខ្លួនរបស់លោកគឺលម្អដោយពណ៌ចម្រុះគ្នាដែលបង្ហាញពីឈុតសម្លៀកបំពាក់ក្រុមជម្រើសជាតិប្រេស៊ីលដែលលោកតែងតែគាំទ្រជាយូរមកហើយ ។ មិនថារថយន្ដ ឬការតុបតែងខ្លួនទេ ការិយាល័យធ្វើការ ទូដាក់ឯកសារ ប្រដាប់ប្រដាប្រើប្រាស់ក្នុងការិយាល័យក៏សុទ្ធតែពណ៌របស់ក្រុមជម្រើសជាតិប្រេស៊ីលដែរ ។ អ្វីដែលគួរអស់សំណើចជាងនេះទៅទៀតនោះ អាហារដែលគាត់ទទួលទានជាមួយប្រពន្ធជារៀងរាល់ថ្ងៃក៏លម្អដោយឈុតសម្លៀកបំពាក់នេះដែរ ។
លោក Nelson Paviotti និយាយថា អ្វីៗដែលខ្ញុំធ្វើនេះមិនមែនជាការសម្ដែងឈុតឆាកក្នុងភាពយន្ដ ឬជាការបង្ហាញពីភាពប្លែកៗឱ្យមនុស្សនៅជុំវិញខ្លួនមើលទេ ផ្ទុយទៅវិញ វាជាទឹកចិត្ដគាំទ្រ និងការស្រឡាញ់ពេញទំហឹងលើក្រុមបាល់ទាត់ជម្រើសជាតិ ។ លោក Nelson Paviotti ឱ្យដឹងទៀតថា លោកចាប់ផ្ដើមធ្វើចាប់តាំងពីលោកបានសន្យាជាមួយមិត្ដភក្ដិរបស់លោកក្នុងការភ្នាល់បាល់អំឡុងពេលប្រកួតដណ្ដើមពានរង្វាន់ពិភពលោក ឆ្នាំ ១៩៩៤ ដែលរូបលោកសន្យាថា បើសិនជាក្រុមបាល់ទាត់របស់ប្រទេសប្រេស៊ីលទទួលបានជ័យជម្នះក្នុងការប្រកួតបាល់ទាត់ World Cup នេះ រូបលោកនឹងប្រើប្រាស់ពណ៌ដែលតំណាងឱ្យឈុតសម្លៀកបំពាក់របស់ប្រទេសប្រស៊ីល ។
យ៉ាងណាមិញ អ្នកស្រី Marie Antoinette Paviotti គ្រូបង្រៀនចូលនិវត្ដន៍ និងជាឧត្ដមភរិយារបស់លោក Nelson Paviotti ឱ្យដឹងដែរថា កាលពីមុន អ្នកស្រីធុញទ្រាន់នឹងពណ៌ទាំងអស់នេះណាស់ តែបន្ទាប់ពីមានការបកស្រាយ និងពន្យល់ណែនាំពីប្ដីរបស់អ្នកស្រី បានធ្វើឱ្យអ្នកស្រីផ្លាស់ប្ដូរទស្សនៈ ហើយថែមទាំងប្រើប្រាស់របស់របរទាំងអស់ដែលមានពណ៌ទង់ជាតិរបស់ប្រទេសប្រេស៊ីលទៀតផង ៕
ចែករំលែកព័តមាននេះ