ប្រទេសម៉ាឡេស៊ី ៖ បណ្តាអ្នកគាំទ្រ និងប្រព័ន្ធផ្សព្វផ្សាយរបស់ប្រទេសម៉ាឡេស៊ី កំពុងតែទាមទារឱ្យមានការទទួលខុសត្រូវ បន្ទាប់ពីសហព័ន្ធបាល់ទាត់ពិភពលោក (FIFA) បានដាក់ទណ្ឌកម្មធ្ងន់ធ្ងរប្រឆាំងនឹងសមាគមបាល់ទាត់ម៉ាឡេស៊ី (FAM) លើការចោទប្រកាន់ថា…
ប្រទេសម៉ាឡេស៊ី ៖ បណ្តាអ្នកគាំទ្រ និងប្រព័ន្ធផ្សព្វផ្សាយរបស់ប្រទេសម៉ាឡេស៊ី កំពុងតែទាមទារឱ្យមានការទទួលខុសត្រូវ បន្ទាប់ពីសហព័ន្ធបាល់ទាត់ពិភពលោក (FIFA) បានដាក់ទណ្ឌកម្មធ្ងន់ធ្ងរប្រឆាំងនឹងសមាគមបាល់ទាត់ម៉ាឡេស៊ី (FAM) លើការចោទប្រកាន់ថា សមាគមបានប្រើឯកសារក្លែងបន្លំ ដើម្បីផ្តល់សញ្ជាតិកីឡាករបរទេសចំនួន ៧ នាក់ អំឡុងការប្រកួតវគ្គជម្រុះជុំចុងក្រោយពានរង្វាន់ Asian Cup ឆ្នាំ ២០២៧ គ្រាដែលម៉ាឡេស៊ីបានយកឈ្នះវៀតណាមដោយលទ្ធផល ៤ទល់នឹង០។
FIFA បានប្រកាសកាលពីយប់ថ្ងៃទី២៦ ខែកញ្ញា ឆ្នាំ២០២៥ កន្លងទៅថា ម៉ាឡេស៊ីបានក្លែងបន្លំឯកសារ ដើម្បីផ្តល់សញ្ជាតិដល់កីឡាករបរទេសចំនួន ៧ នាក់ ក្រោមការអះអាងថា ពួកគេមានសិទ្ធិតាមរយៈការជាប់សាច់ឈាមផ្អែកលើដូនតា។ ជាលទ្ធផល FAM ត្រូវបានពិន័យជាទឹកប្រាក់ចំនួន ៤៣៨ ៧០០ដុល្លារអាមេរិក ខណៈកីឡាករទាំង៧នាក់ រួមមាន Gabriel Palmero និង Jon Irazabal សញ្ជាតិអេស្ប៉ាញ, Facundo Garces, Rodrigo Holgado, Imanol Machuca សញ្ជាតិដើមអាហ្សង់ទីន, Joao Figueireido សញ្ជាតិដើមប្រេស៊ីល) និង Hector Hevel សញ្ជាតិដើមហូឡង់ ដោយម្នាក់ៗបានទទួលការពិន័យទឹកប្រាក់ចំនួន ២ ៥០០ដុល្លារ និងជាប់បម្រាមរយៈពេល១២ខែរាល់សកម្មភាពទាំងអស់ដែលទាក់ទងនឹងបាល់ទាត់ ដោយគិតចាប់ពីថ្ងៃទី២៦ កញ្ញា តទៅ។
ពាក់ព័ន្ធនឹងការពិន័យធ្ងន់នេះ កាសែតម៉ាឡេស៊ី New Straits Times បានដាក់ចំណងជើងថា «ការអៀនខ្មាស់ ៖ FIFA ទះកំផ្លៀង FAM ដោយការពិន័យយ៉ាងធ្ងន់ធ្ងរ និងការហាមប្រាមកីឡាករ» ខណៈដែលគេហទំព័រព័ត៌មានម៉ាឡេស៊ីមួយទៀតឈ្មោះថា Scoop បានហៅការពិន័យថា «ការផ្អាកដែលធ្វើឱ្យបាល់ទាត់ម៉ាឡេស៊ីជួបរឿងរន្ធត់»។
សារព័ត៌មានអន្តរជាតិរួមមាន Reuters, AP និង Arab News ព្រមទាំងសារព័ត៌មានរួមតំបន់អាស៊ីអាគ្នេយ៍ដូចជា Bola, Siam Sports និង The Straits Times ក៏បានរាយការណ៍ពីរឿងនេះថា គឺជាព័ត៌មានដ៏គួរឱ្យភ្ញាក់ផ្អើលផងដែរ។ ចំណែក CNN Indonesia បានអត្ថាធិប្បាយថា ការដាក់ទណ្ឌកម្មយ៉ាងធ្ងន់ធ្ងរនេះ ប្រៀបដូចជាផ្គរលាន់ដល់ FAM និងកីឡាករ ហើយបានព្រមានថា យុទ្ធនាការជម្រុះពានរង្វាន់ Asian Cup ឆ្នាំ២០២៧ របស់ម៉ាឡេស៊ីអាចនឹងត្រូវបំផ្លាញ។
ដំណឹងទាំងនេះបានបង្កការខឹងសម្បារលើបណ្តាញសង្គមនៅក្នុងប្រទេសម៉ាឡេស៊ី។ អ្នកគាំទ្របានរិះគន់ FAM ចំពោះការគ្រប់គ្រងមិនត្រឹមត្រូវ ដោយមានទាំងការដាក់សញ្ញា # Hashtags ជាមួយប្រយោគដូចជា #FAMMustAnswer (FAM ត្រូវបកស្រាយ) និង #LetMalaysiansPlay (អនុញ្ញាតឱ្យកីឡាករម៉ាឡេស៊ីលេង) ជាដើម ដែលកំពុងពេញនិយមលើបណ្តាញសង្គម X ដែលបង្ហាញពីការខកចិត្តរបស់ពួកគេ និងការព្រួយបារម្ភអំពីផលប៉ះពាល់លើការអភិវឌ្ឍន៍ទេពកោសល្យកីឡាករជាតិ និងក្នុងតំបន់។
ពាក់ព័ន្ធបញ្ហានេះ FAM បានឆ្លើយតបនៅល្ងាចថ្ងៃដដែល ពោលថ្ងៃទី២៦ កញ្ញា ដោយអះអាងថា ឯកសារចូលសញ្ជាតិទាំងអស់ត្រូវបានដំណើរការប្រកបដោយស្មោះត្រង់ និងតម្លាភាព យោងទៅតាមគោលការណ៍ណែនាំរបស់ FIFA ហើយឯកសារកីឡាករក៏បានឆ្លងកាត់ការពិនិត្យមុនសម្រេចផ្លូវការ ដើម្បីអាចពួកគេលេងតំណាងប្រទេសម៉ាឡេស៊ី។ ជាមួយគ្នានោះ សមាគមក៏បានប្រកាសថា ខ្លួននឹងប្រើប្រាស់គ្រប់នីតិវិធីច្បាប់ ដើម្បីប្តឹងឧទ្ធរណ៍ចំពោះការសម្រេចរបស់ FIFA ផងដែរ។
FAM មានសិទ្ធិប្តឹងទៅ FIFA ក្នុងរយៈពេល១០ថ្ងៃ ដោយស្នើសុំការពន្យល់ពេញលេញ។ ប្រសិនបើបណ្តឹងឧទ្ធរណ៍បានជោគជ័យ ការសម្រេចថ្មីមួយនឹងត្រូវចេញផ្សាយលើគេហទំព័រគណៈកម្មាធិការវិន័យ FIFA។ ករណីការប្តឹងតវ៉ាពុំបានជោគជ័យ សេចក្តីសម្រេចរបស់ FIFA អាចប៉ះពាល់ធ្ងន់ធ្ងរដល់យុទ្ធនាការប្រកួតរបស់ម៉ាឡេស៊ីក្នុងវគ្គជម្រុះចុងក្រោយពានរង្វាន់ Asian Cup ឆ្នាំ២០២៧។
សូមជម្រាបជូនថា បច្ចុប្បន្ន FAM ស្ថិតនៅក្រោមការគ្រប់គ្រងដោយប្រធានស្តីទី លោក Yusoff Mahadi បន្ទាប់ពីការលាលែងពីតំណែងរបស់លោក Joehari Ayub កាលពីថ្ងៃទី២២ សីហា កន្លងទៅ តាមសេចក្តីរាយការណ៍ថាដោយសារតែបញ្ហាសុខភាព៕ ប្រភព ៖ VnExpress
ចែករំលែកព័តមាននេះ