រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ កាលពីរសៀលថ្ងៃអាទិត្យ ទី២០ មេសា ធ្វើឱ្យអ្នកទស្សនាមិនសូវជាសប្បាយចិត្តបុ៉ន្មានឡើយ បើទោះជា សេន ប៊ុនថេន មកពីសមាគមកីឡាប្រដាល់ក្រសួងមហាផ្ទៃ បានយកឈ្នះកីឡាករបុ៊លហ្គារី Vasilko Stadinov ដោយពិន្ទុក៏ពិតមែន
រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ កាលពីរសៀលថ្ងៃអាទិត្យ ទី២០ មេសា ធ្វើឱ្យអ្នកទស្សនាមិនសូវជាសប្បាយចិត្តបុ៉ន្មានឡើយ បើទោះជា សេន ប៊ុនថេន មកពីសមាគមកីឡាប្រដាល់ក្រសួងមហាផ្ទៃ បានយកឈ្នះកីឡាករបុ៊លហ្គារី Vasilko Stadinov ដោយពិន្ទុក៏ពិតមែន បុ៉ន្តែសម្រាប់ការជួបគ្នារវាងកីឡាកររឿង សោភ័ណ្ឌ មកពីក្លិបមកុដរាជសីហ៍ និងកីឡាករថៃ Phongthong Jitsada វិញនោះធ្វើឱ្យមានការប៉ះពាល់ដល់អារម្មណ៍អ្នកទស្សនាយ៉ាងខ្លាំង ដោយសារតែកីឡាករថៃរូបនេះបានប្រើកម្លាំងបាយចាប់កាច់បំបាក់ដៃ រឿង សោភ័ណ្ឌ បំពាននឹងច្បាប់ប្រកួតទាំងស្រុង ។
រវាង សេន ប៊ុនថេន និងកីឡាករប៊ុលហ្គារី មើលទៅហាក់ដូចជាមានសមត្ថភាពខុសគ្នាឆ្ងាយណាស់ បុ៉ន្តែ សេន ប៊ុនថេន ដែលមានប្រៀបជាងដាច់នោះមិនអាចវាយផ្តួលគូប្រកួតឱ្យសន្លប់បានឡើយ គឺបានត្រឹមតែយកឈ្នះពិន្ទុបុ៉ណ្ណោះ ។ ពេលប្រកួត សេន ប៊ុនថេន បានព្យាយាមសម្រុកចូលកៀកទាត់ និងធាក់ទៅលើកីឡាករ Stadinov មិនសំចៃកម្លាំងឡើយ បុ៉ន្តែត្រូវកីឡាករប៊ុលហ្គារីរូបនេះទាត់ច្រាស់សងមកវិញភ្លាមៗធ្វើឱ្យលទ្ធផលការប្រកួតនៅទឹកទី១ នេះមានភាពប្រដំប្រសងគ្នា ។ ចូលដល់ទឹកទី២ សេន ប៊ុនថេន ចាប់ផ្តើមវាយសម្រុកសាជាថ្មីម្តងទៀតដោយក្រៅពីការប្រើស្នៀតជើងទាត់ និងធាក់នោះ គេក៏បានរុលចូលកៀកវាយកែងចូលចំសៀតផ្កាខាងឆ្វេងរបស់ Stadinov យ៉ាងពេញទំហឹងបណ្តាលឱ្យបែករយះចេញឈាមស្រោចមុខ បុ៉ន្តែលោកអាជ្ញាកណ្តាលមិនបានបញ្ឈប់ការប្រកួតនេះឡើយ ។
ទោះជារងរបួសបែបនេះក្តី ក៏ Stadinov នៅតែដេញតាមទាត់ និងម៉ាត់សងវិញកាន់តែសាហាវលើសដើម បុ៉ន្តែការដើរចូលដោយខ្វះការប្រុងប្រយ័ត្នរបស់កីឡាករបុ៊លហ្គារីរូបនេះមិនអាចធ្វើអ្វី សេន ប៊ុនថេន បានឡើយ ផ្ទុយទៅវិញ បែរជាត្រូវ សេន ប៊ុនថេន ពុះចូល១កែងចំពីលើក្បាលបណ្តាលឱ្យបែករយះហូរឈាមមួយកន្លែងទៀត បុ៉ន្តែគ្រូពេទ្យមិនបានបញ្ឈប់ការប្រកួតនេះទេព្រោះគេអាចប្រកួតតទៅទៀតបាន ។ Stadinov បានបង្ហាញនូវភាពទន់ជ្រាយផ្នែកកម្លាំងយ៉ាងខ្លាំង ខណៈពេលការប្រកួតបានអូសបន្លាយដល់ទឹកទី៤ ទៅហើយនោះ ។ ចំណែក សេន ប៊ុនថេន វិញកម្លាំងរបស់គេមើលទៅហាក់បីដូចជាមិនស្រុតចុះបន្តិចណាឡើយ គេនៅតែសង្ខើញដើរចូលទាត់និងម៉ាត់ចូលមុខ និងពោះទឹក Stadinov ពេញៗតែម្តង ។ នៅក្នុងទឹកទី៥ គេសង្កេតឃើញ សេន ប៊ុនថេន បានកៀង Stadinov ឱ្យស្ថិតនៅអែបខ្សែរេញជាប់រហូត បើទោះជា Stadinov បានព្យាយាមរត់គេចពីការវាយលុកយ៉ាងណាក៏ដោយ ទើបលទ្ធផលចុងក្រោយគេត្រូវចាញ់ពិន្ទុកីឡាករសេន ប៊ុនថេន យ៉ាងអស់ចិត្ត ។
ចំណែកឯការជួបគ្នារវាង រឿង សោភ័ណ្ឌ និង Phongthong Jitsada វិញនោះមានការចាប់អារម្មណ៍ខ្លាំងពីដំបូង តែក្រោយមកធ្វើឱ្យទស្សនិកជនមិនសប្បាយចិត្តទៅវិញ ។ នៅទឹកទី១ និងទី២ រឿង សោភ័ណ្ឌ បានធ្វើឱ្យអារម្មណ៍អ្នកមើលភាគច្រើនពុះកញ្ជ្រោលយ៉ាងខ្លាំងតាមរយៈការវាយទៅលើកីឡាករថៃរូបនេះ ដែលធ្លាប់មកស្រុកខ្មែរច្រើនលើកច្រើនសារួចមកហើយ បុ៉ន្តែពុំមាននរណាអាចកាច់បំបាក់គេបានឡើយ ដូច្នេះលើកនេះពេលឃើញ រឿង សោភ័ណ្ឌ បើកការវាយប្រហារទៅលើគូប្រកួតដោយមិនញញើតបន្តិចណាឡើយនោះធ្វើឱ្យពួកគេមានទំនុកចិត្តខ្លាំងណាស់ ។ រីឯ Jitsada វិញនោះមិនខុសពីខ្លាត្រូវរបួសឡើយ ព្រោះ រឿង សោភ័ណ្ឌ វាយកាន់តែត្រូវ គេកាន់តែដើរចូល ព្រមទាំងចាប់ក្រៀកបោកផ្ទប់នឹងក្តារតាពីម្តងជាពីរដង ។ ទោះបីយ៉ាងណា រឿង សោភ័ណ្ឌ នៅតែដើរចូលវាយដដែល ហើយការម៉ាត់ចូលមុខ Jitsada បណ្តាលឱ្យដួលទាំងជំហរនោះបានធ្វើឱ្យ Jitsada ក្តៅក្រហាយយ៉ាងខ្លាំង ក៏បានសម្រុកចូលចាប់ឱប រឿង សោភ័ណ្ឌ រួចកាច់ផ្តួលមកក្រោយជាច្រើនលើកច្រើនសាបណ្តាលឱ្យគ្រេចដៃស្តាំប្រកួតលែងកើតនៅក្នុងទឹកទី៤ ហើយត្រូវបានលោកអាជ្ញាកណ្តាលសម្រេចបញ្ឈប់ការប្រកួតតែម្តងទៅ ។
ការវាយរបស់ Jitsada ទៅលើកីឡាកររឿង សោភ័ណ្ឌ ប៉ះពាល់ដល់អារម្មណ៍ទស្សនិកជនយ៉ាងខ្លាំងស្ទើរផ្ទុះចេញជាកំហឹង បុ៉ន្តែដោយសារតែមានការប្រកាសហាមឃាត់ពីគណៈកម្មការរៀបចំការប្រកួត ក៏បានធ្វើឱ្យពួកគេស្ងប់អារម្មណ៍វិញ ។ ដោយឡែក លទ្ធផលគូផ្សេងទៀត កីឡាករម៉ន វិរៈ មកពីក្លិបការិយាល័យទី៥ កងទ័ពជើងគោក បានយកឈ្នះកីឡាករឈិត ងុ៉យ មកពីក្លិបអប្សរាគុនខ្មែរដោយពិន្ទុ ។ កីឡាករផន ប៊ុនម៉ៅ មកពីក្លិបបុរីរាជសីហ៍មានឫទ្ធិ យកឈ្នះកីឡាករវង្ស គង់រាជ មកពីក្លិបតាព្រហ្មមានជ័យដោយពិន្ទុ និងកីឡាករសេង ហៀង មកពីក្លិបយុវជនកម្ពុជាខណ្ឌមានជ័យ ក៏យកឈ្នះកីឡាករយិន បូរិន មកពីក្លិបអាស៊ីកីឡាដោយពិន្ទុដូចគ្នាដែរ ៕
ចែករំលែកព័តមាននេះ