ខេត្តកំពង់ចាម ៖ ព្រឹត្តិការណ៍ប្រកួតប្រដាល់ក្បាច់គុនបុរាណខ្មែរនៅលើសង្វៀនចល័តដណ្តើមខ្សែក្រវាត់ស្រាបៀរ Black Panther ជុំទី២លើទឹកដីខេត្តកំពង់ចាម កាលពីថ្ងៃទី១៩ មេសា កន្លងទៅនេះ ទទួលបានការគាំទ្រយា៉ងខ្លាំងពីសំណាក់មហាជនដោយពួកគេលាន់មាត់ថា ពិតជាល្អមើលខ្លាំងណាស់ ។
ខេត្តកំពង់ចាម ៖ ព្រឹត្តិការណ៍ប្រកួតប្រដាល់ក្បាច់គុនបុរាណខ្មែរនៅលើសង្វៀនចល័តដណ្តើមខ្សែក្រវាត់ស្រាបៀរ Black Panther ជុំទី២លើទឹកដីខេត្តកំពង់ចាម កាលពីថ្ងៃទី១៩ មេសា កន្លងទៅនេះ ទទួលបានការគាំទ្រយា៉ងខ្លាំងពីសំណាក់មហាជនដោយពួកគេលាន់មាត់ថា ពិតជាល្អមើលខ្លាំងណាស់ ។
សម្រាប់ការប្រកួតសន្សំពិន្ទុជុំទី២ក្នុងព្រឹត្តិការណ៍ប្រដាល់ដែលឧបត្ថម្ភដោយក្រុមហ៊ុនស្រាបៀរអង្គរនោះក៏ទទួលបានការអញ្ជើញចូលរួមពីលោក តែម ម៉ឺន ប្រធានសហព័ន្ធកីឡាប្រដាល់កម្ពុជាផងដែរ ។ លោកបានមានប្រសាសន៍ថា ការសម្រេចដាក់កីឡាករ១២រូបឱ្យធ្វើការប្រកួតប្រជែងដណ្តើមខ្សែក្រវាត់ស្រាបៀរ Black Panther គឺយើងបានសម្រិតសម្រាំងយកកីឡាករដែលមានកម្រិតបច្ចេកទេសប្រហាក់ប្រហែលគ្នាមកធ្វើការប្រកួត ដូច្នេះហើយទើបធ្វើឱ្យមហាជនសប្បាយចិត្ត និងពេញចិត្តយា៉ងខ្លាំងក្នុងការទស្សនា ។
អ្វីដែលគួរឱ្យកត់សម្គាល់នោះគឺ ក្នុងចំណោម៦គូដែលប្រកួតគ្នាមាន៣គូវាយគ្នារហូតដល់សន្លប់ក្នុងនោះមានដូចជា តក់ សោភ័ណ្ឌ មកពីក្លិបអេភូថងកីឡាចំណាយពេលត្រឹម២ទឹកប៉ុណ្ណោះ បានផ្តួលកីឡាករ សោម តឿទី មកពីក្លិបខ្លារខិនមានឫទ្ធិឱ្យសន្លប់ ខណៈកីឡាករ ផាន់ សុវណ្ន មកពីក្លិបមិត្តប៉ូលិស ប្រើកណ្តាប់ដៃ និងជង្គង់ផ្តួលកីឡាករ ឡៅ ផានាថ ឱ្យចុះចាញ់ត្រឹមទឹកទិ២ដូចគ្នា និងកីឡាករ ឈិន ក្វាន់ង៉ុយ មកពីក្លិបមកុដរាជសីហ៍ សម្រុកវាយកីឡាករ ឡុង ប៊ុនរា៉ត់ មកពីក្លិបបសាលវ័ន្តកីឡា រហូតធ្វើឱ្យអាជ្ញាកណ្តាលបញ្ឈប់ការប្រកួតត្រឹមទឹកទី១ ។
រីលទ្ធផល៣គូទៀតរួមមាន កីឡាករ សួស យា៉ត មកពីក្លិបទីបញ្ជាការកងទ័ពជើងទឹកប្រកួតឈ្នះកីឡាករ ផល សីហា មកពីក្លិបយុវជនខណ្ឌមានជ័យដោយពិន្ទុ ។ កីឡាករ ឃឹម ពេជ្រចិន្តា មកពីក្លិបបុរីនាគរាជប្រកួតឈ្នះកីឡាករ សល់ បុ៊នហូវ មកពីក្លិបកុសលកីឡាដោយពិន្ទុ និងកីឡាករ នួន សេតសង់ មកពីសមាគមកីឡាប្រដាល់ក្រសួងការពារជាតិ តស៊ូយកឈ្នះកីឡាករ ផាន់ សារុន មកពីក្លិបព្រះខ័នរាជដោយពិន្ទុទាំងលំបាក ។ បន្ទាប់ពីចប់ការប្រកួតសន្សំពិន្ទុជុំទី២នេះឃើញថា ពូលAកីឡាករ តក់ សោភ័ណ្ឌ មានពិន្ទុខ្ពស់ជាងគេគឺ៦ពិន្ទុក្រោយពីប្រកួតបាន២លើកឈ្នះទាំង២លើក ។ រីឯពូល B គឺមានកីឡាករ ឈិន ក្វាន់ង៉ុយ និងកីឡាករ ផាន់ សុវណ្ណ ដែលមាន៦ពិន្ទុស្មើគ្នាសម្រាប់២ប្រកួតដូចគ្នា ។ ចំណែកកីឡាករ ឃឹម ពេជ្រចិន្តា, សោម តឿទី, សួស យា៉ត, សល់ ប៊ុនហូវ និងកីឡាករ នួន សេតសង់ ប្រកួត២លើកឈ្នះ១ ចាញ់១ រកបាន៤ពិន្ទុដូចគ្នា ខណៈកីឡាករ ឡុង ប៊ុនរា៉ត់, ផល សីហា និងកីឡាករ ឡៅ ផានាថ ប្រកួតចាញ់ទាំង២លើកជាប់គ្នា ទើបតែរកបាន២ពិន្ទុម្នាក់ប៉ុណ្ណោះ ។
គួរបញ្ជាក់ថា ការប្រកួតសន្សំពិន្ទុជុំទី៣ នៅលើសង្វៀនចល័តនេះ នឹងបន្តទៅរៀបចំធ្វើនៅលើទឹកដីខេត្តស្វាយរៀងវិញម្តង ដើម្បីស្វែងរកកីឡាករដែលមានពិន្ទុច្រើនជាងគេក្នុងពូលនីមួយៗមកធ្វើការប្រកួតវគ្គផ្តាច់ព្រ័ត្រនៅរាជធានីភ្នំពេញ ៕
ចែករំលែកព័តមាននេះ