រាជធានីភ្នំពេញ ៖ គ្រាន់តែមានឱកាសវ៉ាកងតូចរយៈពេល២សប្តាហ៍បុ៉ណ្ណោះ កីឡាករជើងខ្លាំង អ៊ុំ ចំរើន មកពីក្លិបតាឡីដំរីមានឫទ្ធិ បានឆ្លៀតពេលហ្វឹកហាត់ប្រដាល់ ហើយឡើងរេញបំបាក់កីឡាករជើងចាស់ ថៃ ប៊ុនហាន មកពីក្លិបបូរីនាគរាជឱ្យបាក់មុខបានតែម្តង ។ ជារឿងភ្ញាក់ផ្អើលមែនទែនដែលកីឡាករអ៊ុំ ចំរើន ដែលអ្នកណាក៏ដឹងថា ចុះខ្សោយអស់មួយរយៈទៅហើយដោយសារតែឡើងរេញលើកណាក៏ចាញ់ពិន្ទុ និងសន្លប់នោះ បែរជាអាចធ្វើឱ្យកីឡាករថៃ ប៊ុនហាន សន្លប់ក្នុងទឹកទី៤ ដោយគ្មានការតវ៉ា ។
ជ័យជម្នះរបស់គេបានទាំងធ្វើឱ្យ ថៃ ប៊ុនហាន រយះបែកហូរឈាមដាបរេញទៀតផងក្នុងការជួបគ្នានៅលើសង្វៀនទូរទស្សន៍បាយ័នបឹងស្នោកាលពីល្ងាចថ្ងៃអាទិត្យ ទី២០ មេសា ។ យោងតាមទិដ្ឋភាពជាក់ស្តែងមុនពេលប្រកួតមានមនុស្សតិចណាស់ដែលយល់ថា កីឡាករបង្គោលក្រហម អ៊ុំ ចំរើន នឹងឈ្នះការប្រកួតនោះ ដោយសារតែគេចាញ់ និងធ្លាក់ដៃឡើងជាប់សូរទៅហើយចាប់តាំងពីគេរវល់ជាប់រៀនត្រៀមប្រឡងយកសញ្ញាបត្របាក់ឌុបនៅវិទ្យាល័យទួលអំពិល និងជាប់ធ្វើការងារជាអ្នកដេរស្បែកជើង រកប្រាក់រៀនគួរ ។ គាប់ជួនជា ថៃ ប៊ុនហាន ក្នុងបុ៉ន្មានប្រកួតចុងក្រោយគេហាក់ស្ទុះឡើង ហើយអាចផ្តួលជើងខ្លាំងវ័យក្មេង និងជើងចាស់ឱ្យបាក់មុខបានផង ទើបអ្នកណាក៏គិតតាំងពីដើមទីថា អ៊ុំ ចំរើន ពិតជាស៊ូមិនដល់ទឹកទី៥ ។ យ៉ាងណាក៏ដោយ លទ្ធផលសន្និដ្ឋាននោះមិនបានកើតមានចំពោះកីឡាករបង្គោលក្រហមនោះទេ បុ៉ន្តែបែរជាកើតឡើងចំពោះកីឡាករថៃ បុ៊នហាន បង្គោលខៀវទៅវិញ ។ តាំងពីទឹកទី១រហូតបញ្ចប់លទ្ធផលចាញ់ឈ្នះ កីឡាករអ៊ុំ ចំរើន ធ្វើបានហួសពីការស្មាន ជាពិសេសគឺស្នៀតម៉ាត់ ពុះកែង និងទាត់ឆ្វេងស្តាំ ដែលមិនអាចឱ្យកីឡាករថៃ ប៊ុនហាន ស្ទុះរួចតែម្តង ។
បើទោះជា ថៃ ប៊ុនហាន បានបុកសន្ធាប់តបវិញ ក៏បានត្រឹមតែរងដោយកែង និងម៉ាត់ចំកណ្តាលមុខផ្ទួនៗពីកីឡាករបង្គោលក្រហមប៉ុណ្ណោះ ។ ឈានដល់ទឹកទី៣ សំឡេងដែលធ្លាប់ផ្តេកផ្តួលទៅលើកីឡាករបង្គោលខៀវ បានប្តូរទៅកាន់ជើងកីឡាករអ៊ុំ ចំរើន យ៉ាងសន្ធាប់ ជាពិសេសនៅពេលដែលគេសម្រេចការវាយលុកធ្វើឱ្យ ថៃ ប៊ុនហាន បែកចិញ្ចើម និងបែកមុខដែលពិបាកទប់ឈាមដែលហូរដូចទឹកបាក់ទំនប់ ។ កីឡាករថៃ ប៊ុនហាន ត្រូវគេឃើញបាក់ជំហររឹងមាំខុសប្លែកពីមុន បន្ទាប់ពី អ៊ុំ ចំរើន កាន់តែវាយសន្ធាប់ដដែលជាដដែលនៅចំណុចរងរបួស ។ បើទោះជាគ្មានរយះបែកឈាម ក៏ស្ថានភាពនាការប្រកួតនោះពិបាកឱ្យ ថៃ ប៊ុនហាន ទប់កណ្តាប់ដៃ និងស្នៀតវាយលុករបស់កីឡាករបង្គោលក្រហមនោះដែរ ក្នុងពេលដែលគេស្រាប់តែបង្ហាញមុខលើកនេះ ហើយខ្លាំងមិនធម្មតាបែបហ្នឹង ។
ក្រុមអ្នកទស្សនាយ៉ាងហោច៨០% បានទះដៃអបអរបន្ទាប់ពីដឹងថា កីឡាករថៃ ប៊ុនហាន សន្លប់ក្នុងទឹកទី៤ ហើយសម្រេចចិត្តចុះចាញ់ដោយគ្មានការតវ៉ា ព្រោះតែទប់លែងរួច ។ ក្នុងនោះគេឮទាំងការសរសើរចំពោះកីឡាករបង្គោលក្រហមដែលស្រាប់តែល្អក្នុងការវាយលុកនាពេលនោះទៀតផង ។
កីឡាករអ៊ុំ ចំរើន ប្រាប់ថា ហេតុផលដែលជួយឱ្យគេស្ទុះឡើងខ្លាំងក្នុងការវាយបំបាក់កីឡាករថៃ ប៊ុនហាន គឺដោយសារតែគេយកពេល២សប្តាហ៍ពីការវ៉ាកងអបអរបុណ្យចូលឆ្នាំខ្មែរទៅហ្វឹកហាត់ប្រដាល់ ហើយចំណាយពេលទៅកម្សាន្តក្នុងឱកាសបុណ្យចូលឆ្នាំខ្មែរតិចតួចបំផុត។ ការបរាជ័យរបស់លោកនាបុ៉ន្មានលើកចុងក្រោយ គឺជាកត្តាដែលរុញឱ្យលោកប្រឹងប្រែង បុ៉ន្តែលោកមិនហ៊ានរំពឹងថា ភាពខ្លាំងនឹងជួយលោកឱ្យបន្តនិរន្តរភាពបានទៀត ឬយ៉ាងណានោះទេក្នុងពេលដែលចាប់ពីសប្តាហ៍នេះទៅសម្ពាធការសិក្សាកាន់តែបង្ខំឱ្យលោកត្រូវដើរចេញពីការហ្វឹកហាត់បែបនេះ ។
នៅលើរេញដដែល កីឡាករសុខ ចំរើនស្រ៊ុន មកពីក្លិប CMAC វាយឱ្យកីឡាករតូច ទូ មកពីមជ្ឈមណ្ឌលខេមរៈភូមិន្ទ សន្លប់ក្នុងទឹកទី៣ ។ កីឡាករវ៉ែន ឌីយ៉ាម៉ង់ មកពីក្លិបកងរាជអាវុធហត្ថរាជធានីភ្នំពេញ វាយឈ្នះកីឡាករពេជ្រ សំរឹទ្ធ មកពីក្លិបអារុណរះកីឡាដោយពិន្ទុ និងកីឡាករចាន់ ប៊ុនហឿន មកពីក្លិបនិរោធមានជ័យ វាយឱ្យកីឡាករសល់ រីប៊ែល មកពីក្លិបកុសលកីឡាសន្លប់ក្នុងទឹកទី២ ។
នៅរេញបាយ័នស្ទឹងមានជ័យ កីឡាករចៅ ផលឌឿ មកពីក្លិបសំរោងកោងខេត្តបាត់ដំបង វាយឱ្យកីឡាករសំអាង ឌុន មកពីក្លិបអេភូថងកីឡាសន្លប់ក្នុងទឹកទី៣ និងកីឡាករស៊ីថា សារ៉ាន់ មកពីក្លិប CMAC វាយឈ្នះកីឡាករយ៉ាម រ៉េត មកពីក្លិបរស្មីកុមារកំព្រាដោយពិន្ទុ ៕
ចែករំលែកព័តមាននេះ