ប្រទេសគុយបា ៖ សភាគុយបាបានរួមប្រជុំនាថ្ងៃទី១០តុលា ដើម្បីសម្រេចលើការជ្រើសតាំងមនុស្សសម្រាប់កាន់តំណែងគន្លឹះនានានៃក្បាលម៉ាស៊ីនដឹកនាំប្រទេស ដែលពេលនេះបានបើកចំហសម្រាប់មនុស្សជំនាន់ថ្មី ពុំមែនជំនាន់នៃបដិវត្តន៍ឆ្នាំ១៩៥៩ឡើយ។ ទោះបីយ៉ាងណាការផ្លាស់ប្ដូរបែបនេះពុំប៉ះពាល់ដល់លទ្ធិសង្គមនិយម បក្សតែមួយនិងការបោះឆ្នោតមិនសកលដដែល។
ប្រធានាធិបតី អនុប្រធានាធិបតី ប្រធានសភានិងប្រធានក្រុមប្រឹក្សារដ្ឋនិងក្រុមប្រឹក្សារដ្ឋមន្ត្រី តំណែងទាំងនោះនឹងត្រូវជ្រើសតាំងក្នុងសម៏យប្រជុំវិសាមញ្ញនោះរបស់សភា ដែលប្រព្រឹត្តទៅនាថ្ងៃខួបចាប់ផ្ដើមការតស៊ូ ដើម្បីឯករាជ្យគុយបាពីអេស្ប៉ាញថ្ងៃទី១០តុលា១៨៦៨។
តំណែងប្រធានាធិបតីតាមរយៈការកែទម្រង់រដ្ឋធម្មនុញ្ញនឹងត្រូវជ្រើសរើស ដោយសមាជិកសភា៥៩៩រូប ហើយពុំមានការភ្ញាក់ផ្អើលឡើយដែលតំណែងនោះ នឹងបានទៅលើលោកMIGUEL DIAZ CANELប្រធានក្រុមប្រឹក្សារដ្ឋនិងក្រុមប្រឹក្សារដ្ឋមន្ត្រី ចាប់តាំងពីខែមេសាឆ្នាំ២០១៨មក។
លោកមានអាយុ៥៩ឆ្នាំ កើតក្រោយសម័យបដិវត្តន៍ដឹកនាំដោយលោកហ្វីដែលកាស្ត្រូ ដែលជាប្រធានក្រុមប្រឹក្សារដ្ឋនិងក្រុមប្រឹក្សារដ្ឋមន្ត្រីពីឆ្នាំ១៩៧៦ដល់២០០៨ ហើយបន្តវេនដោយលោករ៉ាអូ៊លកាស្ត្រូប្អូនប្រុសលោក។ បងប្អូនកាស្ត្រូកាន់តំណែងទាំងនោះជាមួយតំណែងអគ្គលេខាបក្សកុំមុយនីស្តគុយបា ហើយក៏ទោះមានអាយុ៨៨ឆ្នាំទៅហើយ លោករ៉ាអ៊ូលកាស្ត្រូនឹងនៅតែកាន់តំណែងអគ្គលេខាបក្សរហូតដល់ឆ្នាំ២០២១៕ (កែសម្រួលដោយ ៖ បុប្ផា)
ចែករំលែកព័តមាននេះ