ទីក្រុងយេរូសាឡឹម៖ មន្ត្រីជាន់ខ្ពស់របស់អ៊ីរ៉ង់ទទួលបន្ទុកផ្នែកសន្តិសុខជាតិបានទទួលមរណភាពម្នាក់ទៀតហើយកាលពីពេលថ្មីនេះ។ អ៊ីស្រាអែលប្រកាសថាខ្លួនទើបតែធ្វើឃាតប្រធានស៊ើបការណ៍សម្ងាត់នៃឆ្មាំបដិវត្តអ៊ីរ៉ង់នៅក្នុងជួរកងទ័ពប៉ារ៉ា។ យោធាអ៊ីស្រាអែលបានបង្ហោះសារនៅលើបណ្ដាញអ៊ិចថាដោយសារមានព័ត៌មានសម្ងាត់ច្បាស់ការណ៍នៅក្នុងដៃផងនោះ ខ្លួនបានវាយប្រហារកាលពីយប់មិញទៅលើទីតាំងមួយកន្លែង និងសម្លាប់ប្រធានផ្នែកស៊ើបការណ៍សម្ងាត់នៃឆ្មាំបដិវត្តឥស្លាម លោកម៉ាជីត ខូតាំ ហាស៊ីនី ខាដេមី ( Majid Khotam-Hasini Khademi)។
លោកជាមេបញ្ជាការសំខាន់ម្នាក់នៃបញ្ជាការដ្ឋានកណ្ដាលយោធាអ៊ីរ៉ង់ និងជាមន្ត្រីមានជំនាញផ្នែកយោធា និងសន្តិសុខដែលមានបទពិសោធជាច្រើនឆ្នាំ។ លោកបន្តតំណែងពីឧត្ដមសេនីយ៍មហាម៉ាត់ កាហ្សេមី (Mohammad Kazemi) ដែលត្រូវអ៊ីស្រាអែលធ្វើឃាតនៅក្នុងសង្គ្រាមរយៈពេល១២ថ្ងៃកាលពីខែមិថុនា ឆ្នាំ២០២៥។ អង្គភាពស៊ើបការណ៍សម្ងាត់នេះមានអំណាចធំធេងណាស់គ្របដណ្ដប់ទូទាំងប្រទេសអ៊ីរ៉ង់ ហើយឡើងរាយការណ៍ផ្ទាល់ទៅមេដឹកនាំកំពូលអ៊ីរ៉ង់តែម្នាក់ប៉ុណ្ណោះ។
មានការចោទប្រកាន់ថាក្រុមនេះជាប់ពាក់ព័ន្ធនឹងការចាប់ឃុំខ្លួនពួកបស្ចិមប្រទេសជាច្រើននាក់ និងតាមកម្ចាត់ក្រុមប្រឆាំងនឹងរដ្ឋភិបាលអ៊ីរ៉ង់។ សង្គ្រាមដែលចាប់ផ្ដើមដំបូងកាលពីថ្ងៃទី២៨ ខែកុម្ភៈនោះបានសម្លាប់មនុស្សរាប់ពាន់នាក់, ធ្វើឱ្យទីផ្សារពិភពលោករង្គោះរង្គើ ជាពិសេសទីផ្សារលក់ថាមពល (ប្រេង, ហ្គាស។ល។), រំខានការដឹកជញ្ជូនទំនិញតាមច្រកសមុទ្រសំខាន់ៗចេញពីតំបន់មជ្ឈិមបូព៌ា និងធ្វើឱ្យតម្លៃប្រេងឥន្ធនៈហក់ឡើងខ្ពស់ជាបន្តបន្ទាប់។
គេគិតថាមនុស្ស១៩០០នាក់បានស្លាប់នៅប្រទេសអ៊ីរ៉ង់ចាប់តាំងពីសង្គ្រាមនេះផ្ទុះឡើងដំបូង។ ប៉ុន្តែរដ្ឋាភិបាលអ៊ីរ៉ង់មិនទាន់បានធ្វើបច្ចុប្បន្នភាពតួលេខនេះទេអស់ជាច្រើនថ្ងៃមកហើយ។ នៅប្រទេសលីបង់ដែលទទួលរងការវាយលុកទ័ពជើងគោកពីសំណាក់យោធាអ៊ីស្រាអែលនោះ មនុស្សរាប់សិបនាក់ក៏បានស្លាប់ផងដែរ។ អ៊ីស្រាអែលស្លាប់មនុស្ស២៣នាក់ ចំណែកអាមេរិកស្លាប់យោធា១៣នាក់៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ