ទីក្រុងហ្សាកាតា៖ ប្រមុខដឹកនាំមីយ៉ាន់ម៉ាដែលទើបតែត្រូវបានតែងតាំងជាប្រធានាធិបតីនៅអាណត្តិថ្មី លោកមីនអុងឡាំង កំពុងទទួលរងការថ្កោលទោសពីបទប្រព្រឹត្តអំពើប្រល័យពូជសាសន៍។ ក្រុមសង្គមស៊ីវិលនៅប្រទេសឥណ្ឌូណេស៊ីបានដាក់ពាក្យប្ដឹងជាផ្លូវការនៅថ្ងៃនេះដោយចោទប្រកាន់ថាលោកមីនអុងឡាំងបានប្រព្រឹត្តអំពើប្រល័យពូជសាសន៍ទៅលើជនជាតិភាគតិចរ៉ូហ៊ីងយ៉ា (Rohingya)។
ថ្វីដ្បិតមីយ៉ាន់ម៉ាជាសមាជិកអាស៊ាន ប៉ុន្តែទំនាក់ទំនងការបរទេសរវាងរបបសឹករបស់លោកមីនអុងឡាំងជាមួយបណ្ដាប្រទេសនៅក្នុងស្ថាប័ននេះមានបញ្ហាល្អក់កករនឹងគ្នា ជាពិសេសចាប់តាំងពីមានរដ្ឋប្រហារឆ្នាំ២០២១ និងនាំទៅដល់ការផ្ទុះសង្គ្រាមផ្ទៃក្នុងកាន់តែខ្លាំងឡើងៗ។ វិបត្តិមនុស្សធម៌ក៏បន្តកើតមាន ខណៈដែលជនជាតិរ៉ូហ៊ីងយ៉ាត្រូវតែបង្ខំចិត្តរត់គេចខ្លួនទៅរស់នៅជំរំនានានៃប្រទេសបង់ក្លាដែសដើម្បីគេចចេញពីការធ្វើទុក្ខបុកម្នេញ។ នេះបើតាមសេចក្ដីរាយការណ៍របស់ក្រុមសិទ្ធិមនុស្ស។
ឥណ្ឌូណេស៊ីក៏ជាគោលដៅដែលពួករ៉ូហ៊ីងយ៉ាភៀសខ្លួនទៅទីនោះផងដែរ។ ពួកគេច្រើនចាកចេញដំណើរពីមាត់សមុទ្រនៃប្រទេសបង់ក្លាដែសដោយជិះកូនទូកតូចៗដាក់មនុស្សលើសចំណុះ ហើយរសាត់អណ្ដែតទៅទើរនៅតាមបណ្ដាកោះនានានៃប្រទេសឥណ្ឌូណេស៊ី។ ដូច្នេះ ឥណ្ឌូណេស៊ីហាក់ដូចជាអ្នកដែលរងថ្មបាក់ពីវិបត្តិនេះដែរ។ មានសេចក្ដីរាយការណ៍ថាយោធាមីយ៉ាន់ម៉ាក្រោមការដឹកនាំ និងបញ្ជាផ្ទាល់ពីឧត្ដមសេនីយ៍មីនអុងឡាំងបានបើកប្រតិបត្តិការសឹកដ៏ធំកាលពីឆ្នាំ២០១៧។
ក្រោយមក ជនជាតិរ៉ូហ៊ីងយ៉ាយ៉ាងតិច៧៣ម៉ឺននាក់ត្រូវចាកចោលផ្ទះសម្បែងរបស់ខ្លួនឆ្ពោះទៅប្រទេសបង់ក្លាដែស។ នៅទីនោះ ពួកគេនិយាយរៀបរាប់ឡើងវិញនូវព្រឹត្តិការណ៍ដ៏រន្ធត់ដូចជាការកាប់សម្លាប់, ការរំលោភសេពសន្ថវៈនៅក្នុងទ្រង់ទ្រាយធំ (ទៅលើនារី) និងការដុតបំផ្លាញផ្ទះសម្បែងរបស់ពួកគេពីសំណាក់ក្រុមយោធាមីយ៉ាន់ម៉ា។ ការិយាល័យរដ្ឋអាជ្ញាឥណ្ឌូណេស៊ីបានទទួលពាក្យបណ្ដឹងពីស្ត្រីជនជាតិរ៉ូហ៊ីងយ៉ាម្នាក់ឈ្មោះយ៉ាស់ស្មីន អ៊ូឡា (Yasmin Ullah) និងជនជាតិឥណ្ឌូណេស៊ីមួយចំនួនទៀត។ ក្នុងនោះក៏មានអតីតអគ្គរដ្ឋអាជ្ញា និងប្រធានចលនាមូស្លីមដ៏ធំជាងគេរបស់ឥណ្ឌូណេស៊ីផងដែរ៕ ប្រភព៖ អារ៉ាប់ ញូស៍ (Arab News) និងប្រភពដទៃទៀត
ចែករំលែកព័តមាននេះ