រាជធានីភ្នំពេញ ៖ អង្គការអន្តរជាតិទេសន្តរប្រវេសន៍ (IOM) បានអះអាងថា និងជួយធ្វើការងារពាក់ព័ន្ធនឹងពលករទេសន្តរប្រវេសន៍ ព្រមទាំងបណ្តុះបណ្តាលជំនាញដល់ពួកគេ ដើម្បីស្វែងរកការងារធ្វើ ។ ការអះអាងនេះ ខណៈដែលលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានអនុញ្ញាតឱ្យលោកស្រីវេជ្ជបណ្ឌិត ណិនណេត ម៉ូទូស (Nentte MOTUS) ប្រធានអង្គការ IOM ប្រចាំតំបន់អាស៊ី និងប៉ាស៊ីហ្វិក សម្តែងការគួរសម ក្នុងឱកាសបំពេញទស្សនកិច្ចនៅកម្ពុជា នារសៀលថ្ងៃទី០៩ ខែតុលា នៅទីស្តីការក្រសួង ។
ក្នុងជំនួបលោករដ្ឋមន្ត្រីបានវាយតម្លៃខ្ពស់ចំពោះ អង្គការ IOM ដែលបានជួយខាងផ្នែកពលករទេសន្តរប្រវេសន៍នៅក្នុងប្រទេសនានាក៏ដូចជា នៅក្នុងតំបន់ ។ កម្ពុជាទទួលបានផ្លែផ្កានៃកិច្ចសហប្រតិបត្តិការនេះយ៉ាងធំធេងផងដែរ មកដល់ពេលនេះគោលនយោបាយទេសន្តរប្រវេសន៍ពិតជាទទួលបានជោគជ័យ ។ ភាពជោគជ័យនេះ គឺមិនអាចខ្វះបានពីការរួមចំណែកផ្នែកគាំទ្របច្ចេកទេសពីសំណាក់អង្គការ IOM ។ លោកបញ្ជាក់ថា ៖«យើងបានចាប់ផ្តើមទាំងការលំបាក ឥឡូវអាចនិយាយបានថា ពលករដែលធ្វើការនៅក្រៅប្រទេស សុវត្ថិភាព ស្របច្បាប់ ស្ទើរ១០០ភាគរយ។ នោះក្នុងពលករកម្ពុជាចេញទៅធ្វើការនៅក្រៅ១លាន២សែននាក់ យើងបានថែទាំ និងតាមគាំពារពួកគេជាប់ជានិច្ច ។
និយាយដូច្នេះ មិនមែនយើងមិនមានបញ្ហាប្រឈមនោះទេ បញ្ហាប្រឈមនានានៅតែមាន តែយើងនឹងបន្តសហការជាមួយភាគីពាក់ព័ន្ធដើម្បីដោះស្រាយបញ្ហាអស់ទាំងនេះ» ។ លោកបានគូសបញ្ជាក់ថា ៖«កម្ពុជាយើងបានយកចិត្តទុកដាក់យ៉ាងខ្លាំងពីបញ្ហាទេសន្តរប្រវេសន៍នេះ តាំងពីដំបូង ដែលជួបការលំបាកខ្លាំង ។ មកដល់បច្ចុប្បន្នការងារនេះបានក្លាយជាកាលានុវត្តភាពទៅវិញ ។ ឧទាហរណ៍៖ពលករនៅថៃជាង១លាននាក់ កំពុងធ្វើការនៅទីនោះ(ទាំងស្របច្បាប់ ឬមិនស្របច្បាប់) ប៉ុន្តែយើងបានធ្វើការងារនេះជាប្រព័ន្ធ ដោយមានការចូលរួមពីភាគីថៃ រហូតដល់ធ្វើឱ្យពលករខ្មែរក្លាយជាពលករស្របច្បាប់ផងដែរ» ។
លោកបានបន្ថែមថា កម្ពុជាបានកំពុងគិតពីបញ្ហាពលករនេះយ៉ាងខ្លាំង និងបានស្នើឱ្យ IOM បន្តធ្វើការងារទាក់ទង និងពលករទេសន្តរប្រវេសន៍នេះ ពិសេសនោះជួយលើបញ្ហាចល័តភាព នៃរបបសន្តិសុខសង្គមឱ្យកាន់តែប្រសើរថែមទៀត ។ នៅក្នុងជំនួបនេះដែរ លោកស្រី Nentte MOTUSក៏បានលើកឡើង ពីគោលដៅអាទិភាពនៅក្នុងឆ្នាំ២០៣០ និងលើកពីទំនាក់ ទំនងទេសន្តរប្រវេសន៍ពាក់ព័ន្ធនឹងពលករ និងការគ្រប់គ្រងពលករ រហូតដល់ពីទំនាក់ទំនង គ្រួសាររបស់ពលករផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ