រាជធានីភ្នំពេញ ៖ ការប្រកួតកីឡាវាយកូនឃ្លីលើតុដណ្តើមពានរង្វាន់សម្តេចអគ្គមហាពញាចក្រី ហេង សំរិន លើកទី២ ឆ្នាំ២០១៤ ដែលជាការប្រកួតលក្ខណៈបើកទូលាយ គ្រោងចាប់ផ្តើមធ្វើពីថ្ងៃទី២១ ដល់ទី២៤ ខែឧសភា ខាងមុខនេះហើយនៅពហុកីឡដ្ឋានជាតិអូឡាំពិក។ នេះបើតាមការឱ្យដឹងពីលោកស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា ។
ការរៀបចំឱ្យមានព្រឹត្តិការណ៍ប្រកួតដោយដាក់ឈ្មោះថ្នាក់ដឹកនាំជាន់ខ្ពស់របស់ប្រទេសជាលើកទី២ នោះមាន២វិញ្ញាសា គឺវិញ្ញាសាឯកត្តជនបុរស-នារី និងវិញ្ញាសាជាក្រុមបុរស-នារី ។ ចំពោះវិញ្ញាសាប្រកួតនោះ លោកស៊ុន សុទ្ធារិទ្ធ មានប្រសាសន៍ថា មានវិញ្ញាសាប្រកួតជាក្រុមយុវជនអាយុក្រោម១៧ឆ្នាំ ប្រកួតឯកត្តជនយុវជនអាយុក្រោម១៧ឆ្នាំ និងប្រកួតឯកត្តជននារីអាយុក្រោម១៧ឆ្នាំ ។ សម្រាប់អ្នកចង់ចូលរួមប្រកួតត្រូវតែមានឆ្នាំកំណើតក្រោយឆ្នាំ១៩៩៧។
លោកអគ្គលេខាធិការសហព័ន្ធរូបនោះបានបញ្ជាក់ទៀតថា ព្រឹត្តិការណ៍នេះទោះបីការប្រកួតបើកទូលាយ (Open) ក្តី ប៉ុន្តែលោកមិនអនុញ្ញាតឱ្យមានកីឡាករជម្រើសជាតិចូលរួមឡើយ គឺផ្តោតសំខាន់ទៅលើអ្នកមិនមែនអាជីព និងយុវជនប៉ុណ្ណោះ ។ លោកបានអំពាវនាវដល់អ្នកដែលមានបំណងចង់ចូលរួមប្រកួតក្នុងព្រឹត្តិការណ៍នេះ អាចដាក់ពាក្យបានចាប់ពីពេលនេះរហូតដល់ថ្ងៃ១៨ ឧសភា ហើយនៅថ្ងៃទី១៩ ខែឧសភា គឺជាថ្ងៃប្រជុំបច្ចេកទេស និងចាប់ឆ្នោត ។
សូមបញ្ជាក់ថា ការប្រកួតកីឡាវាយកូនឃ្លីលើតុដណ្តើមពានរង្វាន់ខាងលើនេះលើកទី១ ធ្វើនៅឆ្នាំ២០១៣ ដោយសហព័ន្ធបានបើកទូលាយឱ្យមានការចូលរួមពីកីឡាករ-កីឡាការិនីទាំងអាជីព និងមិនមែនអាជីព ដោយបែងចែកការប្រកួតទៅតាមកម្រិត ។ បុ៉ន្តែសម្រាប់ការប្រកួតលើកទី២ ឆ្នាំនេះបិទមិនឱ្យមានកីឡាករអាជីពចូលរួមឡើយ ដើម្បីជំរុញឱ្យកីឡាករជាយុវជន និងអ្នកស្នេហាកីឡាវាយកូនឃ្លីលើតុជំនាន់ក្រោយចូលរួមឱ្យបានច្រើនផុលផុសថែមទៀត៕
ចែករំលែកព័តមាននេះ