រាជធានីភ្នំពេញ ៖ នៅទីបំផុតការប្រឹងប្រែង និងការតាំងចិត្តរបស់កីឡាករ ឡេះ តើក ជើងខ្លាំងមកពីក្លិបពុទ្ធសេរីវង្សកីឡាបានត្រឹមតែទទួលរងការអាម៉ាស់ប៉ុណ្ណោះ បន្ទាប់ពីភ្លាត់ឱ្យកីឡាករ ភុន សោភ័ណ្ឌ មកពីក្លិបយុវកីឡាខេត្តកណ្តាលដែលអ្នកណាក៏មើលឃើញថាចាញ់តាំងពីដើមទី មានឱកាសសីុឡាក ។ លទ្ធផលដែលផ្ទុយស្រឡះពីការចង់បាននេះ ហាក់ធ្វើឱ្យកីឡាករ ឡេះ តើក
រាជធានីភ្នំពេញ ៖ នៅទីបំផុតការប្រឹងប្រែង និងការតាំងចិត្តរបស់កីឡាករ ឡេះ តើក ជើងខ្លាំងមកពីក្លិបពុទ្ធសេរីវង្សកីឡាបានត្រឹមតែទទួលរងការអាម៉ាស់ប៉ុណ្ណោះ បន្ទាប់ពីភ្លាត់ឱ្យកីឡាករ ភុន សោភ័ណ្ឌ មកពីក្លិបយុវកីឡាខេត្តកណ្តាលដែលអ្នកណាក៏មើលឃើញថាចាញ់តាំងពីដើមទី មានឱកាសសីុឡាក ។ លទ្ធផលដែលផ្ទុយស្រឡះពីការចង់បាននេះ ហាក់ធ្វើឱ្យកីឡាករ ឡេះ តើក និងអ្នកគាំទ្រស្រងាកចិត្តយ៉ាងខ្លាំង ដោយបានប្រែក្លាយសំឡេងកោតសរសើរទៅជាការរិះគន់ទៀតផង បើទោះជាកីឡាករដែលជ្រុលធ្វើខុសបានទទួលកំហុសនោះក្តី ។
គ្មានអ្នកណាមិនភ្ញាក់ផ្អើលនោះទេ ក្នុងពេលដែលចាប់ផ្តើមការប្រកួតភ្លាម ក៏មានឈុតឆាកសីុសាច់ហុចឈាមគ្នាតែម្តង ដែលមិនខុសពីការស្ទុះស្ទាដណ្តើមយកមុខមាត់ និងកេរ្តិ៍ឈ្មោះម្ខាងៗ ដោយគ្មានការចុះញ៉មគ្នានោះទេ ។ កីឡាករ ឡេះ តើក ដែលអ្នកណាក៏មើលឃើញថាកំពុងឡើងកូដ បានស្ទុះសម្រុកវាយឆ្វេងស្តាំស្ទើរតែធ្វើឱ្យដៃគូកីឡាករ ភុន សោភ័ណ្ឌ តដៃមិនទាន់សម្រាប់ការជួបគ្នានៅលើសង្វៀនទូរទស្សន៍បាយ័នស្ទឹងមានជ័យ កាលពីថ្ងៃសុក្រ ទី១៨មេសា កន្លងទៅ ។ ការប្រកួតគូនេះបានធ្វើឱ្យមានការចាប់អារម្មណ៍ខ្លាំង ពិសេសក្នុងពេលដែលកីឡាករបង្គោលក្រហម ឡេះ តើក បន្តការសម្រុកទាំងដៃទាំងជើង និងកែងបក ដែលអ្នកណាក៏ញាក់សាច់ជំនួសកីឡាករ ភុន សោភ័ណ្ឌ ដែរ ។ ជាក់ស្តែងនៅពាក់កណ្តាលទឹកទី១កីឡាករបង្គោលខៀវ ភុន សោភ័ណ្ឌ ដែលអ្នកណាក៏មើលឃើញច្បាស់ថា ត្រូវកីឡាករ ឡេះតើក វាយឡើងទក់សាច់ទៅហើយនោះ បែរជាទទួលជ័យជម្នះដោយសារកីឡាករបង្គោលក្រហមភ្លាត់ទាត់ថែមមួយជើងពេញទំហឹងត្រូវចំថ្ពាល់ឆ្វេងពេលគូប្រកួតដួលធ្វើឱ្យបង្គោលខៀវមានឱកាសធ្វើប្រកាច់សីុឡាកតែម្តង ។
ក្រុមអ្នកទស្សនាដែលស្រែកទះដៃគ្រប់ពេលកីឡាករ ឡេះ តើក វាយត្រូវគោលដៅបានប្រែជាស្រែករិះគន់ និងសម្តែងអារម្មណ៍ខកចិត្តព្រោះតែឃើញកីឡាករបង្គោលក្រហមជ្រុលថែមពេញបន្ទុកទៅលើកីឡាករបង្គោលខៀវប្រាកដមែន ដែលអ្នកណាក៏មើលឃើញដែរ ។ ក្រុមអ្នកគាំទ្របានស្តីបន្ទោសថា បង្គោលខៀវពិតជាយកចាញ់មកតាមមែនទើបវាយបានល្អគួរឱ្យសរសើរទៅហើយ បែរជាភ្លាត់ទៅវាយលើគូប្រកួតក្នុងពេលដួល ដែលនាំឱ្យក្រុមអ្នកទស្សនាក៏ដូចជាក្រុមអ្នកផ្តល់ពិន្ទុឈានទៅចាប់កំហុសដោយខានមិនបាន ។ ក្នុងពេលបង្គោលខៀវកំពុងប្រកាច់ហើយក្រុមអ្នកផ្តល់ពិន្ទុកំពុងវែកញែកស្វែងរកខុសត្រូវនោះ គេឮសម្រែកស្តីបន្ទោសយា៉ងខ្លាំងបោកសម្រុកទៅលើកីឡាករបង្គោលក្រហម ។ អញ្ចឹងហើយទើបកីឡាករបង្គោលក្រហម ឡេះ តើក ចុះចេញពីរេញភ្លាមៗដោយគ្រាន់តែដឹងថា អ្នកកាត់ក្តីផ្តល់លទ្ធផលឱ្យចាញ់ និងតម្រូវឱ្យសុំទោសចំពោះកីឡាករ ភុន សោភ័ណ្ឌ ដែលគេបានទាត់ត្រូវមួយជើងថែមខុសនោះ ។ យ៉ាងណាក៏ដោយកីឡាករបង្គោលខៀវ ភុន សោភ័ណ្ឌ ដ្បិតថា រងការរិះគន់ពាក់ព័ន្ធនឹងរឿងធ្វើសន្លប់ដើម្បីសីុឡាកក៏ភាពជាក់ស្តែងត្រូវគេឮបន្ទោសទៅលើកីឡាករ ឡេះ តើក បង្គោលក្រហមច្រើនជាងនោះដែរ ដោយសារតែស្នៀតដែល ឡេះ តើក បានថែម វាទំនងនឹងអាចធ្វើឱ្យកីឡាករជាដៃគូសន្លប់មែនៗ ។ កីឡាករ ភុន សោភ័ណ្ឌ ត្រូវគេនិយាយថា ឈ្នះដោយចៃដន្យ ប៉ុន្តែក៏សមទំនងដូចគ្នាសម្រាប់ឱកាសពេលនោះ ។
នៅលើសង្វៀននោះដែរ កីឡាករ ឯម សាវឿន មកពីក្លិបឫទ្ធីពោធិសែនជ័យ បានផ្តួលកីឡាករ សឹុម សំ មកពីក្លិបកងរាជអាវុធហត្ថរាជធានីភ្នំពេញឱ្យសន្លប់ក្នុងទឹកទី៤ ។ កីឡាករ លី តឿនមកពីក្លិបមិត្តប៉ូលិសបានវាយឱ្យកីឡាករ ស៊ូ ពី មកពីក្លិបពោធិជ័យកីឡាសន្លប់ក្នុងទឹកទី១ និងកីឡាការិនី គង់ សារី មកពីក្លិបឃុំជ្រៃខេត្តបាត់ដំបង បានវាយចាញ់កីឡាការិនី អេ យ៉ានុត មកពីក្លិបអេភូថងកីឡាដោយពិន្ទុដាច់ទាំង៥ទឹកតែម្តងក្នុងពេលបើកឆាកប្រយុទ្ធគ្នានោះ ៕
ចែករំលែកព័តមាននេះ