ដល់ក ! កូនបំណុលវាយម្ចាស់បំណុលទ្រោមខ្លួន ព្រោះតែលុយ១ពាន់ដុល្លារ

ថ្ងៃទី ០៩ ខែ តុលា ឆ្នាំ ២០១៩
ម៉ោង ១៦:៤៤
ម៉េង ធា

រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ស្ត្រីជាម្ចាស់បំណុលម្នាក់ត្រូវបានថៅកែហាង យីហោ«យីអ៊ូ រីករាយ» វាយធាត់ទ្រោមខ្លួន នៅចំពោះមុខនគរបាលមូលដ្ឋាន ខណៈពេលដែលនាងបានធ្វើដំណើរទៅទារប្រាក់ ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោងប្រមាណ៩ព្រឹក ថ្ងៃទី០៩ ខែតុលានេះ នៅចំណុចហាងបាយ និងគុយទាវ មួយកន្លែងយីហោ «យីអ៊ូ រីករាយ» ស្ថិតនៅតាមបណ្តោយមហាវិថីឈ្នះ ឈ្នះ ជាប់វត្តអង្គក្រពើ ក្នុងភូមិត្រពាំងវែង សង្កាត់គោករការ ខណ្ឌព្រែកព្នៅ ។

ជនដៃដល់ដែលប្រើហិង្សានោះត្រូវបាននគរបាលឲ្យដឹងថា ឈ្មោះ លី លី អាយុប្រមាណជាង៤០ឆ្នាំ ជាថៅកែហាង ស្នាក់នៅកន្លែងកើតហេតុខាងលើ (ជាកូនបំណុល) ។ ចំណែកជនរងគ្រោះឈ្មោះ ធា វី ភេទស្រី អាយុ៣០ឆ្នាំ ស្នាក់នៅម្តុំផ្សារឈូកមាស ក្នុងសង្កាត់ ក្រាំងធ្នង់ ខណ្ឌសែនសុខ ជាម្ចាស់បំណុល ។

តាមសាក្សីបានឲ្យដឹងថា នៅមុនពេលកើតហេតុគេឃើញនារីរងគ្រោះបានជិះរថយន្តមួយគ្រឿងទៅទារប្រាក់ពីថៅកែហាង ដែលបានជំពាក់១ពាន់ដុល្លារមិនសង ។ ខណៈនោះក៏កើតមានទំនាស់ពាក្យសំដីគ្នា ហើយត្រូវបានស្ត្រីជាថៅកែហាងដេញចេញ និងបានទាញកំប៉ុងដាក់ស្លាបព្រា សម និងចង្កឹះ គប់ទៅលើម្ចាស់បំណុល និងបានយកទឹកជះ ព្រមទាំងវាយទៅលើនារីជាម្ចាស់បំណុលទ្រមខ្លួន នៅចំពោះមុខនគរបាលប៉ុស្តិ៍ និងអ្នកព័ត៌មានដែលបានចុះទៅយកព័ត៌មាន ករណីចរាចរណ៍ ហើយបានចូលហូបបាយក្នុងហាងនោះ ។

តាមសាក្សីបានអោយដឹងទៀតថា នៅក្នុងសកម្មភាពប្រើហិង្សានគរបាលប៉ុស្តិ៍ម្នាក់ក៏បានទៅឃាត់ តែថៅកែហាងរូបនោះនៅតែបន្តប្រើហិង្សា ដោយវាយទៅលើម្ចាស់បំណុល និងចាប់បោកដួលបោចសក់ទាញ ទាត់ធាក់ហើយត្រូវបាននគរបាលឃាត់ ។

តាមស្ត្រីជាកូនបំណុល បានឲ្យដឹងថា ដោយសារតែខឹងលុយ១ពាន់ដុល្លារសោះ តាមទាររហូត ។ ប្រាក់នោះនាងសង តែមិនទាន់មាន ព្រោះគេជំពាក់នាងដែរ ។

តាមស្ត្រីជាម្ចាស់បំណុល បានឲ្យដឹងថា ឈ្មោះ លី លី បានខ្ចីប្រាក់ចងការចំនួន១ពាន់ដុល្លារ តាំងពីថ្ងៃទី៤ ខែមិនា ឆ្នាំ២០១៩ ដោយ១០០ ការ៥ដុល្លារ ។ បន្ទាប់ពីខ្ចីការក៏មិនឲ្យ ដើមក៏មិឲ្យ ហើយចេះតែសន្យាណាត់ថ្ងៃនេះថ្ងៃនោះ ហើយគេចរហូត ។ ស្ត្រីរូបនោះក៏បានឲ្យដឹងទៀតថា នៅព្រឹកថ្ងៃកើតហេតុ ដែលជាថ្ងៃណាត់នាងក៏បានធ្វើដំណើរទៅទារប្រាក់ត្រូវបានកូនបំណុលប្រើហិង្សាមកលើនាងតែម្តង ។ បន្ទាប់ពីមានអំពើហិង្សានារីរងគ្រោះក៏បានធ្វើដំណើរទៅដាក់ពាក្យបណ្តឹងនៅស្នាក់ការប៉ុស្តិ៍ ដោយទារជំងឺចិត្ត៥ពាន់ដុល្លារ ។

ដោយឡែកម្ចាស់ហាងក៏ត្រូវបាននគរបាលហៅ ទៅប៉ុស្តិ៍ ដើម្បីសាកសួរដែរ ។ បន្ទាប់ពីសម្របសម្រួលមិនត្រូវគ្នានគរបាលបានបញ្ជូនទៅកាន់អធិការដ្ឋាន ដើម្បីចាត់ការតាមច្បាប់ ៕ កែសម្រួលដោយ ៖ សុឃាក់