រាជធានីភ្នំពេញ ៖ ប្រមុខការទូតកម្ពុជា ឯកឧត្តម ប្រាក់ សុខុន ឧបនាយករដ្ឋមន្ត្រីរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានបញ្ជាក់នៅក្នុងកិច្ចប្រជុំពិសេសរដ្ឋមន្ត្រីការបទេសអាស៊ាន ដោយបានស្នើឲ្យរដ្ឋមន្ត្រីអាស៊ានជួយអន្តរាគមន៍ឲ្យថៃដោះលែងទាហានកម្ពុជាទាំង១៨រូប ដែលថៃបានចាប់ខ្លួនកន្លងមកប្រគល់ឲ្យកម្ពុជាវិញផងដែរ ។
ក្នុងកិច្ចសម្ភាសន៍ជាមួយទូរទស្សន៍ជាតិកម្ពុជា នៅថ្ងៃទី២២ ខែធ្នូ ឆ្នាំ២០២៥ ក្រោយបញ្ចប់កិច្ចប្រជុំពិសេសរដ្ឋមន្ត្រីការបរទេសអាស៊ាន ស្តីពីស្ថានភាពបច្ចុប្បន្នរវាងកម្ពុជា និងថៃ នៅទីក្រុងគូឡាឡាំពួ ប្រទេសម៉ាឡេស៊ី ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិបានគូសបញ្ជាក់យ៉ាងដូច្នេះថា «ទីបញ្ចប់ក្នុងកិច្ចប្រជុំក៏ខ្ញុំបានរំលឹកនៅក្នុងអង្គប្រជុំថា ទាហានយើងទាំង១៨នាក់ត្រូវបានចាប់ឃុំខ្លួន ដោយខុសច្បាប់ដោយ យោធាថៃ អីញ្ចឹងសុំឲ្យអង្គប្រជុំ រួមគ្នាអំពាវនាវឲ្យមានការដោះលែងទាហាន របស់យើងទាំង១៨នាក់ ។ នេះជាអ្វីដែលខ្ញុំបានលើកយកចំណុចសំខាន់នៅក្នុងកិច្ចប្រជុំនេះ» ។
ជាមួយគ្នានោះដែរ ឯកឧត្តមក៏បានលើកឡើងថា នៅក្នុងកិច្ចប្រជុំឯកឧត្តមស្នើឲ្យរដ្ឋមន្ត្រីការបរទេសទាំងអស់ អំពាវនាវឲ្យមានការឈប់បាញ់គ្នាជាបន្ទាន់ ហើយភាគីទាំងពីរបញ្ឈប់ការប្រទូស្តរ៉ាយចាប់ពីម៉ោង១០យប់នេះតទៅ ។
ឯកឧត្តមបានបញ្ជាក់ថា «ខ្ញុំលើកភាគីទាំងពីរដោយសារថា បទឈប់បាញ់មួយមិនមែន ធ្វើតែឯកតោភាគីនោះទេ ។ គឺការឈប់វៃគ្នាទាល់តែភាគីទាំងសងខាង ទើបឈប់បាញ់បាន ហើយបើឲ្យតែភាគីតែមួយឈប់បាញ់ម្នាក់ឯងវាអត់កើត»។
ឯកឧត្តមបន្តថា ជាមួយនឹងបទឈប់បាញ់នេះ ជាមួយនឹងការវិលមករកវិញការឯកភាពគ្នា ថ្ងៃទី២៨ ខែកក្កដា និងសេចក្តីប្រកាសរួមថ្ងៃ២៦ ខែតុលា ឆ្នាំ២០២៥ ។ ជាងមួយគ្នានោះដែរ ខ្ញុំក៏បានស្នើឲ្យអង្គប្រជុំទាំងមូលអំពាវនាវឲ្យមានការវិលត្រឡប់មកវិញរបស់ទាហានទាំងសងខាងទៅកាន់ទីតាំងដើមរៀងៗខ្លួនមុន ពេលដែលពេលជំម្លោះបានកើតឡើង ។ និងអ្វីដែលសំខាន់ទៀត គឺអនុញ្ញាតឲ្យប្រជាជនស៊ីវិល ធ្លាប់រស់នៅតាមតំបន់ព្រំដែន ហើយរត់ចេញដោយសារតែខ្លាចប៉ះពាល់ដោយសារសង្គ្រាម គឺអនុញ្ញាតឲ្យអ្នកទាំងអស់នេះ វិលត្រឡប់ទៅគេហដ្ឋានរបស់ខ្លួនដូចកាលពីមុនពេលសង្គ្រាមផ្ទុះឡើង។
ប្រមុខការទូតកម្ពុជាក៏បានឲ្យដឹងថា ឯកឧត្តមក៏បានស្នើឲ្យមានការដោះស្រាយជម្លោះ តាមតែនីវិធីដោយសន្តិភាព ដោយមិនប្រើប្រាស់កំម្លាំង ហើយស្របតាមច្បាប់អន្តរជាតិ អនុសញ្ញា សន្ធិសញ្ញា និងកិច្ចព្រមព្រៀងដែលយើងមានជាមួយគ្នា។
ឯកឧត្តមបានគូសបញ្ជាក់ថា «នេះជាចំណុចសំខាន់ ហើយយើងក៏បានសង្កត់ធ្ងន់ពីការវិល ត្រឡប់នៃការប្រកាសរួមនៃទីក្រុងគូឡាឡាំពួប្រទេសម៉ាឡេស៊ីវិញ»៕
ចែករំលែកព័តមាននេះ