បើកការប្រកួតកីឡាប្រដាល់សាកលនិងក្បាច់បុរាណខ្មែរថ្នាក់ជាតិប្រចាំឆ្នាំ

ថ្ងៃទី ០៩ ខែ តុលា ឆ្នាំ ២០១៩

ម៉ោង ១៦:១៥

រាជធានីភ្នំពេញ ៖ ការប្រកួតកីឡាប្រដាល់សាកលនិងក្បាច់បុរាណខ្មែរថ្នាក់ជាតិប្រចាំឆ្នាំ២០១៩ បានបើកការប្រកួតជាផ្លូវការហើយ ដែលមានរយៈពេល៥ថ្ងៃ គិតចាប់ពីថ្ងៃទី៧ដល់១១ ខែតុលា នៅកីឡដ្ឋានស្តាតចាស់ ដោយបានការអញ្ជើញចូលរួមជាអធិបតីពីលោកឧត្តមសេនីយ៍ តែម ម៉ឺន ប្រធានសហព័ន្ធកីឡាប្រដាល់គុនខ្មែរ ។

លោក រាជ សុផែន អគ្គលេខាធិការរងសហព័ន្ធកីឡាប្រដាល់គុនខ្មែរឲ្យដឹងថា ផ្នែកកីឡាប្រដាល់គុនខ្មែរមាន១៥សមាគមរាជធានី-ខេត្តនិង៣ក្រសួង គឺក្រសួងសេដ្ឋកិច្ចនិងហិរញ្ញវត្ថុ ក្រសួង មហាផ្ទៃ និងក្រសួងការពារជាតិ ដែលមានកីឡាករចូលរួមចំនួន៨៣នាក់ ។ រីឯប្រដាល់សាកល
ត្រូវបានលោកវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សាកល ឱ្យដឹងថា មានកីឡាករកីឡាការិនីចូលរួមប្រកួតចំនួន៨០នាក់ មកពី៩រាជធានី-ខេត្ត និង៣ក្រសួង គឺក្រសួងការពារជាតិ ក្រសួងមហាផ្ទៃ និងក្រសួងសេដ្ឋកិច្ចនិងហិរញ្ញវត្ថុ ។

ក្នុងការប្រកួតនេះ ផ្នែកប្រដាល់សាកលចែកចេញជា៨ប្រភេទទម្ងន់ ទីកន្លែងប្រកួតធ្វើនៅពហុកីឡដ្ឋានជាតិ ចំណែកប្រដាល់សាកលចែកចេញជា៩ប្រភេទទម្ងន់ ទីកន្លែងប្រកួតធ្វើនៅកីឡដ្ឋានស្តាតចាស់ ។

លោក ម៉ិល កាដូ អគ្គនាយករងកីឡា និងជាអគ្គលេខាធិការសហព័ន្ធកីឡាកីឡាប្រដាល់គុនខ្មែរឲ្យដឹងថា សម្រាប់ការប្រកួតឆ្នាំនេះការហូបចុកស្នាក់នៅរបស់កីឡាករ ត្រូវបានផ្ដល់ជាសាច់ប្រាក់សុទ្ធដល់កីឡាករម្នាក់ៗតែម្ដង ដែលថវិកានេះមានចំនួនតាមគោលការរបស់រដ្ធ ដែលមានចំនួនច្រើនគួសម ។ ការធ្វើបែបនេះដើម្បីជៀសវាងការផ្ទុះបាតុភាពផ្សេងៗ ហើយរាល់ការចំណាយជាគម្រោងប្រចាំឆ្នាំរបស់ក្រសួងអប់រំយុវជន និងកីឡា។

ជាមួយគ្នានេះ លោកឧត្តមសេនីយ៍ តែម ម៉ឺន ក៏បានមានប្រសាសន៍ផ្ដាំផ្ញើដល់គណៈកម្មការរៀបចំការប្រកួត ត្រូវតែមានការយកចិត្តទុកដាក់អនុវត្តការងាររបស់ខ្លួនឱ្យបានល្អ ។ ម្យ៉ាង វិញទៀត តាមបណ្ដាសមាគម-ក្លិប ត្រូវមានការយកចិត្តទុកដាក់ខ្ពស់លើការអប់រំណែនាំទៅដល់កីឡាករកីឡាការិនី ធ្វើយ៉ាងណាប្រកួតឱ្យអស់ពីសមត្ថភាព និងគោរពឱ្យបាននូវក្រមសីលធម៌ និងសេចក្ដីថ្លៃថ្នូរ ក្នុងនាមជាម្ចាស់ក្បាច់គុនបុរាណខ្មែរ ៕ (កែសម្រួលដោយ ៖ បុប្ផា)