រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ច្បាប់ស្តីពីរបបសន្តិសុខសង្គម និងដាក់ចាប់អនុវត្តនៅក្នុងឆ្នាំ២០២០ខាងមុខនេះ តែមិនទាន់កំណត់ថ្ងៃ ខែច្បាស់នោះទេ ព្រោះរហូតដល់ច្បាប់នេះ ដំណើរការត្រូវឆ្លងកាត់ស្ថាប័នពាក់ព័ន្ធផ្សេងទៀត។ ការបញ្ជាក់របស់លោក អ៊ុតសំហេង រដ្ឋមន្ត្រីក្រសួងការងារបានឲ្យដឹងនៅថ្ងៃទី៩ ខែតុលា បន្ទាប់ពីរដ្ឋសភាបានអនុម័តសេចក្តីព្រាងច្បាប់ស្តីពីរបបសន្តិសុខសង្គម ដែលមាន១១ជំពូក និង១០៧មាត្រា ដោយសំឡេងគាំទ្រ១០៥សំឡេង នៃសមាជិកដែលចូលរួមប្រជុំលើកទី៣ នីតិ កាលទី៦ នៃរដ្ឋសភា ក្រោមអធិបតីភាពសម្តេច ហេង សំរិន ប្រធានរដ្ឋសភា កាលពីថ្ងៃទី៨ ខែតុ លានេះ។
លោកអ៊ិត សំហេង បានលើកឡើងក្នុងសម័យប្រជុំពេញអង្គរដ្ឋសភាថា សេចក្តីព្រាងច្បាប់ស្តីពីរបបសន្តិសុខសង្គម ធ្វើឡើងដោយសារាជរដ្ឋាភិបាលបាន និងកំពុងផ្តោតការយកចិត្តទុក ដាក់យ៉ាងខ្លាំងដល់ការសម្រេចគោលដៅកាត់បន្ថយភាពក្រីក្រលើកកម្ពស់ជីវភាពកម្មករ និយោជិត និងមន្ត្រីសាធារណៈ និងការអភិវឌ្ឍសេដ្ឋកិច្ចសង្គមប្រកបដោយចីរភាពដូចដែលបានរំលេចឡើង ក្នុងយុទ្ធសាស្ត្រចតុកោណដំណាក់ កាលទី៣ និងទី៨ និងក្របខ័ណ្ឌគោលនយោបាយជាតិគាំពារសង្គម ២០១៦-២០២៥” ។
លោកបន្តថា សេចក្តីព្រាងច្បាប់នេះធ្វើឡើង ដើម្បីរាជរដ្ឋាភិបាលកម្ពុជាបានអនុវត្តដោយជោគជ័យនូវរបបសន្តិសុខសង្គមផ្នែកហានិភ័យការងារផ្នែកថែទាំសុខភាពសម្រាប់កម្មករ និយោជិតក្នុងវិស័យឯកជន និងផ្នែកថែទាំសុខភាពសម្រាប់មន្ត្រីសាធារណៈ អតីតមន្ត្រីរាជការ និងអតីតយុទ្ធជនដែលបច្ចុប្បន្នមានចំនួនប្រមាណជាជាង២លាននាក់ ព្រមទាំងបានផ្តល់សេវា ថែទាំសុខភាពតាមរយៈមូលនិធិសមធម៌ សុខាភិបាលសម្រាប់កម្មករនិយោជិតក្រៅប្រព័ន្ធជា អាទិ៍កម្មករស៊ីក្លូ កម្មករម៉ូតូកង់បី កីឡាករ កីឡាការិនី មន្ត្រីក្រុមប្រឹក្សាឃុំសង្កាត់ និងមន្ត្រីថ្នាក់ដឹកនាំ ភូមិប្រមាណជាជាង៧ម៉ឺននាក់ ។
លើសពីនេះរាជរដ្ឋាភិបាលក៏បានយកចិត្តទុកដាក់ផ្តល់សេវា ថែទាំសុខ ភាពតាមរយៈបណ្ណ មូលនិធិសមធម៌ជូនប្រជាជនក្រីក្រ និងជនងាយរងគ្រោះក្នុងឆ្នាំ២០១៨ កន្លងទៅបានចំនួន ២ ៨១០ ៦៩៧ករណី ដែលគ្របដណ្តប់លើប្រជាជនរហូតដល់ ២ ៥១៩ ៨៦ ១នាក់ថែមទៀតផង ។ ការដាក់ឱ្យដំណើរការរបបសន្តិសុខសង្គមផ្នែកថែទាំសុខភាព សម្រាប់មន្ត្រីសាធារណៈ អតីតមន្ត្រីរាជការ និងអតីតយុទ្ធជនការផ្តល់ប្រាក់ឧបត្ថម្ភបន្ថែមសម្រាប់ការសម្រាលកូន ចាប់ពីខែមករា ឆ្នាំ២០១៨ រហូតដល់បច្ចុប្បន្នបានឆ្លុះបញ្ចាំងឱ្យកាន់តែច្បាស់អំពីការរីកចម្រើននៃប្រព័ន្ធ គាំពារសង្គមកម្ពុជា ដើម្បីឈានទៅរកប្រព័ន្ធមួយដែលមានលក្ខណៈជាសាកល និងឯកភាពនា ពេលខាងមុខ ។
ដោយរាជរដ្ឋាភិបាលបានដាក់ឱ្យអនុវត្តរបបសោធននិវត្តន៍សម្រាប់កម្មករ និយោជិត វិស័យឯកជន និងរបបហានិភ័យការងារសម្រាប់មន្ត្រីសាធារណៈ ឆ្នាំ២០១៨ ក្រសួងការងារ និងបណ្តុះបណ្តាលវិជ្ជាជីវៈបានរៀបចំច្បាប់ស្តីពីរបបសន្តិសុខសង្គមឡើងវិញសំដៅធានាបានប្រសិទ្ធភាព និរន្តរភាព និងសង្គតិភាពនៃការអនុវត្តប្រព័ន្ធសន្តិសុខសង្គមមួយស្របតាម បរិបទនៃបណ្តាប្រទេសក្នុងតំបន់ និងសកលលោក ។
សេចក្តីព្រាងច្បាប់ស្តីពីរបបសន្តិសុខសង្គមនេះ មានគោលបំណងបង្កើតឱ្យមានរបបសន្តិសុខ សង្គមនៃព្រះរាជាណាចក្រកម្ពុជា តាមគោលការណ៍សាមគ្គីធម៌ និងសមធម៌សង្គមដែលរួមមាន៤ផ្នែក គឺផ្នែកប្រាក់សោធន ផ្នែកថែទាំសុខភាព ផ្នែកហានិភ័យការងារ និងផ្នែកនិកម្មភាពការងារ សម្រាប់បុគ្គលដែលស្ថិតក្នុងវិស័យសាធារណៈ បុគ្គលដែលស្ថិតក្រោមច្បាប់ស្តីពីការងារ គឺជារួមទាំងបុគ្គលិកផ្លូវអាកាសនាវាសមុទ្រ និងអ្នកបម្រើតាមផ្ទះ ព្រមទាំងបុគ្គលស្វ័យនិយោជន៍ ៕ កែសម្រួលដោយ ៖ សុឃាក់
ចែករំលែកព័តមាននេះ