រាជធានីភ្នំពេញ ៖ មនុស្សវ័យចាស់ ត្រូវបានរាជរដ្ឋាភិបាលយកចិត្តទុកដាក់ខ្លាំងណាស់ គឺមិនទុកឱ្យមនុស្សវ័យចាស់រស់នៅក្នុងភាពឯកោឡើយ ។ បើមានការខ្វះខាតអ្វីមួយ សូមមនុស្សវ័យចាស់ទាំងអស់ទាក់ទងមកសង្កាត់ ខណ្ឌ នោះអាជ្ញាធរនឹងជួយឧបត្ថម្ភភ្លាម…
រាជធានីភ្នំពេញ ៖ មនុស្សវ័យចាស់ ត្រូវបានរាជរដ្ឋាភិបាលយកចិត្តទុកដាក់ខ្លាំងណាស់ គឺមិន
ទុកឱ្យមនុស្សវ័យចាស់រស់នៅក្នុងភាពឯកោឡើយ ។ បើមានការខ្វះខាតអ្វីមួយ សូមមនុស្សវ័យចាស់ទាំងអស់ទាក់ទងមកសង្កាត់ ខណ្ឌ នោះអាជ្ញាធរនឹងជួយឧបត្ថម្ភភ្លាម ពោលគឺមិនទុកឱ្យប្រជាពលរដ្ឋណាម្នាក់ស្លាប់ដោយការអត់បាយឡើយ ។
នេះជាការលើកឡើងរបស់ឯកឧត្ដម ឃួង ស្រេង អភិបាលរាជធានីភ្នំពេញ ក្នុងពិធីសំណេះ
សំណាលជាមួយមនុស្សវ័យចាស់ ខួបលើកទី២៧ នៃទិវាមនុស្សចាស់កម្ពុជា និងទិវាមនុស្សចាស់អន្តរជាតិ ១ តុលា កាលពីព្រឹកថ្ងៃទី១៣ ខែតុលា ឆ្នាំ២០២៥កន្លងទៅ នៅសាលារាជធានីភ្នំពេញ ។
ឯកឧត្ដម ឃួង ស្រេង មានប្រសាសន៍ថា សម្តេចទាំងទ្វេបានយកចិត្តទុកដាក់ខ្លាំងណាស់ ចំពោះមនុស្សចាស់ ពោលគឺមិនទុកឱ្យមនុស្សវ័យចាស់រស់នៅក្នុងភាពឯកោឡើយ ហើយក៏មិនទុកឱ្យប្រជាពលរដ្ឋណាម្នាក់ស្លាប់ដោយការអត់បាយដែរ ។ បើគណបក្សប្រជាជនកម្ពុជានៅកាន់អំណាច គោលនយោបាយនេះនៅតែអនុវត្តជារៀងរហូត។
ឯកឧត្ដម ឃួង ស្រេង បានណែនាំឱ្យអាជ្ញាធរ និងមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ យកចិត្តទុកដាក់ឱ្យបានខ្ពស់ចំពោះមនុស្សចាស់ ជាមួយនឹងការកៀរគរសប្បុរសជនរកចំណូល ជួយដល់មនុស្សចាស់ មើលការខុសត្រូវមនុស្សចាស់ មានបញ្ហាអ្វីមួយត្រូវជួយពួកគាត់ភ្លាម ពោលគឺមិនត្រូវទុកឱ្យពួកគាត់ទទួលនូវភាពឯកោឡើយ ។
ក្នុងឱកាសនោះដែរ ឯកឧត្ដម ឃួង ស្រេង បានសូមឱ្យលោកអ៊ំ លោកពូ អ្នកមីង វ័យចាស់ និងប្រជាពលរដ្ឋទាំងអស់ សូមជឿជាក់មកលើរាជរដ្ឋាភិបាល ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី និងសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីក្នុងកិច្ចការពារបូរណភាពទឹកដីពីចោរសៀមឈ្លានពាន ។
ឯកឧត្ដម ឃួង ស្រេង មានប្រសាសន៍ទៀតថា ការបង្កើតឱ្យមានពិធីជួបសំណេះសំណាលសួរសុខទុក្ខមនុស្សវ័យចាស់ក្នុងរាជធានីភ្នំពេញនេះ ធ្វើឡើងដើម្បីបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជាចំពោះមនុស្សចាស់ ដែលពួកគាត់កន្លងមកបានយកអស់កម្លាំងកាយចិត្ត ក្នុងការបម្រើជាតិមាតុភូមិ និងអបអរសាទរខួបលើកទី២៧ នៃទិវាមនុស្សចាស់កម្ពុជា និងទិវាមនុស្សចាស់អន្តរជាតិ១ តុលា ក្រោមប្រធានបទ«មនុស្សចាស់ដោយសេចក្តីថ្លៃថ្នូរ»។
ឯកឧត្ដម ឃួង ស្រេង បានបញ្ជាក់ថា អំណោយដែលផ្តល់ជូនលោកអ៊ំ លោកពូ អ្នកមីង វ័យចាស់ទាំង៥២៥នាក់នាពេលនេះ ជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដោយក្នុង១រូបៗទទួលបានអង្ករ ២៥គីឡូក្រាម ភួយ១ ក្រមា១ត្រីខ១យូរ មី១កេសតូច ទឹកបរិសុទ្ធ១កេស និងប្រាក់ ៥០ ០០០រៀល ។
លោក រឿន រិទ្ធីពង្ស ប្រធានស្តីទីមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ មានប្រសាសន៍ថា មនុស្សវ័យចាស់សរុបនៅក្នុងរាជធានីភ្នំពេញមាន ១៤៥ ៨៩៩នាក់(ស្រី៧៧ ២១៤នាក់) ។ មនុស្សវ័យចាស់ទទួលបានប័ណ្ណសមធម៌សរុបចំនួន ១៦ ៦៨៥នាក់(ក្នុងគ្រួសារសរុបចំនួន ៣៣ ៩៥០គ្រួសារ)។
មនុស្សវ័យចាស់ទទួលប្រាក់ឧបត្ថម្ភប្រចាំខែក្នុងកម្មវិធីជាតិជំនួយសង្គមក្នុងកញ្ចប់គ្រួសារចំនួន១៤ ៦១៨នាក់ ។លោក រឿន រិទ្ធីពង្ស បានបញ្ជាក់ថា បច្ចុប្បន្នមនុស្សវ័យចាស់ស្ថិតក្នុងសមាគមមនុស្សចាស់តាមសង្កាត់សរុបមានចំនួន ១៤៥ ៨៩៩នាក់ (ស្រី ៧៧ ២១៥នាក់) មានសមាគមដំណើរការសរុប៨៧សមាគមក្នុងចំណោម១០៥សមាគមក្នុងខណ្ឌទាំង១៤ នៅរាជធានីភ្នំពេញ ។ មនុស្ស
វ័យចាស់ជាអតីតយុទ្ធជនកំពុងទទួលរបបគោលនយោបាយសរុបចំនួន ១៤ ៧៦៣នាក់ និងមនុស្សវ័យចាស់ជាអតីតមន្ត្រីរាជការស៊ីវិលទទួលបានរបបគោលនយោបាយសរុប ១៧ ៦៩២
នាក់ ។
នៅតាមបណ្ដាញសង្គមបច្ចុប្បន្ន ការបង្ហាញពីទុក្ខវេទនារបស់មនុស្សចាស់គឺមានរាល់ថ្ងៃ ហើយក៏បានរំលេចនូវធម៌សប្បុរសជាច្រើនផងដែរ ដែលបានជួយឧបត្ថម្ភទៅតាមការផ្សាយព័ត៌មាន ។ រឿងរ៉ាវខ្លះគឺវេទនាភ្នែកជាពន់ពេកណាស់ដូចជា មនុស្សចាស់វ័យ៧០ទៅជា៨០ឆ្នាំ ដើររើសអេតចាយ ដើរបេះបន្លែក្នុងព្រៃ…។ល។ ដូច្នេះហើយ ទើបសាធារណមតិមួយចំនួនបានស្នើសុំទៅរាជរដ្ឋាភិបាល គួរកសាងមជ្ឈមណ្ឌលគាំពារមនុស្សចាស់ដែលគ្មានទីពឹង ។ សំណូមពរនេះ គឺសំខាន់ណាស់ក្នុងការជួយមនុស្សចាស់នាដង្ហើមចុងក្រោយ ៕
ចែករំលែកព័តមាននេះ