ប្រទេសជប៉ុន ៖ យោងតាមតុល្យការមួយចេញផ្សាយដោយបណ្ដាសារព័ត៌មានជប៉ុនថា សមាជិកក្រុមនាវិកនៃនាវាកូរ៉េខាងជើង ៦០នាក់ត្រូវបានជួយសង្គ្រោះ កាលពីថ្ងៃទី៧តុលាក្រោយពីនាវារបស់ពួកគេ បុកជាមួយនាវាល្បាត១គ្រឿងរបស់ទីភ្នាក់ងារនេសាទជប៉ុនក្នុងសមុទ្រខាងកើតហៅសមុទ្រជប៉ុន។
មុននេះកងឆ្មាំឆ្នេរសមុទ្រជប៉ុនអះអាងប្រាប់AFPថា នាវាកូរ៉េខាងជើងសន្មត់ថាជានាវានេសាទបានលិចក្រោយការបុកគ្នានិងថា សមាជិកក្រុមនាវិកនៃនាវានោះប្រមាណជា២០នាក់បានធ្លាក់ទៅក្នុងសមុទ្រ។ គ្រោះថ្នាក់ដែលរហូតមកទល់ពេលនេះនៅតែមិនច្បាស់ថាកើតមានបែបណា កើតមានត្រង់កន្លែងមួយស្ថិតនៅចម្ងាយ៣៥០គីឡូម៉ែត្រ ភាគពាយ័ព្យឧបទ្វីបណូតូ ពោលក្នុងតំបន់សេដ្ឋកិច្ចដាច់មុខរបស់ជប៉ុន។
នាវាល្បាតជប៉ុនOKONIបានបើកមកក្បែរនាវាកូរ៉េខាងជើង ដើម្បីឲ្យនាវានោះបើកបកក្បាលទៅវិញ។ ពេលបណ្ដានាវិកបរទេសចូលដោយខុសច្បាប់មកក្នុងតំបន់សេដ្ឋកិច្ចដាច់មុខរបស់ជប៉ុន នោះបណ្ដានាវាល្បាតជប៉ុនតែងបញ្ជូនសារព្រមាន ហើយក៏អាចប៉ុនប៉ងរុញច្រានទៅវិញតាមរយៈកាណុងបាញ់ទឹក។
សមាជិកក្រុមនាវិកកូរ៉េខាងជើងដែលជួយសង្គ្រោះ ត្រូវបាននាំមកកាន់នាវាកូរ៉េខាងជើង១គ្រឿងទៀតដែលស្ថិតនៅតំបន់ជិតខាង។ នេះបើតាមទូរទស្សន៍រដ្ឋជប៉ុនNHK។ គ្រោះថ្នាក់នៃការបុកគ្នានេះខាងជប៉ុនពុំមាននរណាម្នាក់រងរបួសឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ