ទីក្រុងវ៉ាស៊ីនតោន៖ អាមេរិកផ្ដល់ការធានាសន្តិសុខសម្រាប់អ៊ុយក្រែនរយៈពេល១៥ឆ្នាំដោយទុកជាផ្នែកមួយនៃផែនការសន្តិភាព។ នេះបើយោងតាមការបង្ហើបឱ្យដឹងពីលោកហ្សេឡិនស្គី។ ចំនួនប៉ុណ្ណេះប្រហែលជាមិនទាន់សមតាមបំណងរបស់អ៊ុយក្រែនទេ ព្រោះបើតាមចិត្តរបស់លោកហ្សេឡិនស្គីលោកចង់បានការធានារហូតដល់៥០ឆ្នាំដើម្បីទប់ស្កាត់មិនឱ្យរុស្ស៊ីលើកកងទ័ពវាយប្រហារជាថ្មី។
លោកត្រាំ និងលោកហ្សេឡិនស្គីបានជួបគ្នានៅរដ្ឋផ្លរីដា។ លោកទាំង២ទទួលស្គាល់ថាភាគីជម្លោះទាំង២ រុស្ស៊ី និងអ៊ុយក្រែនមានជំហរខិតជិតគ្នាជាងពេលណាៗទាំងអស់ដែលអាចជាសញ្ញាថានឹងមានកិច្ចព្រមព្រៀងសន្តិភាពឆាប់ៗនេះ។ ទោះជាយ៉ាងណាក្ដី ការព្រមព្រៀងគ្នាបានតែចំណុចសើៗលំៗតែប៉ុណ្ណោះ។ ប៉ុន្តែចំណុចរសើបពាក់ព័ន្ធនឹងបញ្ហាបូរណភាពទឹកដីនិយាយមិនទាន់ត្រូវគ្នាទេ។ បើទុកជារដ្ឋាភិបាលទីក្រុងកៀវយល់ព្រមកាត់ទឹកដីតាមការទាមទាររបស់រុស្ស៊ីក៏ត្រូវឆ្លងកាត់ការអនុម័តពីសភា ឬត្រូវបោះឆ្នោតប្រជាមតិតែម្ដង។ ដូច្នេះបើលទ្ធផលឆ្នោតចេញមកប្រឆាំងមិនឱ្យកាត់ដី មានន័យថាកិច្ចព្រមព្រៀងនៅតែមិនទាន់សម្រេចបានជាដដែល។
លោកហ្សេឡិនស្គីថ្លែងប្រាប់អ្នកសារព័ត៌មានថាបើគ្មានការធានាសន្តិសុខ (សម្រាប់អ៊ុយក្រែន) សង្គ្រាមនឹងមិនចប់ទេ។ លោកនិយាយនេះនិយាយតាមបែបប្រាកដនិយម។ តាមពិត អ៊ុយក្រែន និងរុស្ស៊ីច្បាំងគ្នាមិនមែនទើបតែឆ្នាំ២០២២ទេ។ ប៉ុន្តែចាប់ផ្ដើមតាំងពីពេលដែលរុស្ស៊ីកាត់ខ្វៀលយកតំបន់គ្រីម៉េកាលពីឆ្នាំ២០១៤។ មិនតែប៉ុណ្ណោះ រុស្ស៊ីគាំទ្រពួកឧទ្ទាមផ្ដាច់ទឹកដីនៅអ៊ុយក្រែនខាងកើតដោយផ្ដល់ជាអាវុធយុទ្ធភ័ណ្ឌ និងជំនួយដទៃទៀត។
ការធានាសន្តិសុខសម្រាប់អ៊ុយក្រែនមិនទាន់ប្រកាសជាសាធារណៈនៅឡើយទេ។ ប៉ុន្តែលោកហ្សេឡិនស្គីចេញមុខប្រកាសប្រាប់អ្នកសារព័ត៌មានជាបណ្ដើរៗចាប់ពីពេលនេះទៅហើយ។ ក្រៅពីនេះ លោកក៏បង្ហើបឱ្យដឹងពីការបង្កើតក្រុមសង្កេតការណ៍ដើម្បីតាមដានការអនុវត្តតាមផែនការសន្តិភាព។ នេះជាអ្វីដែលលោកនិយាយជាឯកតោភាគីតែប៉ុណ្ណោះព្រោះរុស្ស៊ីធ្លាប់ប្រកាសតាំងពីយូរមកហើយថាខ្លួនមិនទទួលយកជាដាច់ខាតនូវការបញ្ជូនកងទ័ពណាតូទៅឈរជើងនៅអ៊ុយក្រែន។
លោកត្រាំថ្លែងថាលោកនឹងពិចារណាបន្ថែមពេលវេលាដើម្បីធានាសន្តិសុខសម្រាប់អ៊ុយក្រែនលើសពីរយៈពេល១៥ឆ្នាំ។ នេះបើយោងតាមការអះអាងរបស់លោកហ្សេឡិនស្គី។ លក្ខខណ្ឌនៃការធានាសន្តិសុខនេះនឹងត្រូវយកទៅឆ្លងកាត់ការពិនិត្យ និងអនុម័តពីសភាខង់ហ្ក្រែសរបស់អាមេរិក និងពីសភានៃបណ្ដាប្រទេសដែលជាភាគីហត្ថលេខីនៃកិច្ចព្រមព្រៀង។
តាមមើលទៅ កិច្ចព្រមព្រៀងទាំងម្ភៃចំណុចនេះមិនមែនងាយស្រួលប៉ុន្មានឡើយព្រោះបើតាមលោកហ្សេឡិនស្គីថាលោកចង់យកផែនការទាំងម្ភៃចំណុចនោះទៅឱ្យប្រជាជនអ៊ុយក្រែនជាអ្នកសម្រេចដោយផ្ទាល់តាមរយៈការបោះឆ្នោតប្រជាមតិ។ ត្រង់នេះហើយដែលលោកចង់ស្នើសុំឱ្យរុស្ស៊ីផ្អាកបាញ់គ្នា៦០ថ្ងៃសិនដើម្បីរៀបចំការបោះឆ្នោតប្រជាមតិ។ ប៉ុន្តែរុស្ស៊ីមិនព្រមទេ។ នេះបើយោងតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ