ទីក្រុងប៉េកាំង៖ ថ្ងៃនេះប្រទេសចិនធ្វើសមយុទ្ធយោធាបាញ់គ្រាប់កាំភ្លើងពិតហ៊ុមព័ទ្ធកោះតៃវ៉ាន់ដោយដាក់ពង្រាយកងទ័ព នាវា យន្តហោះ និងកាំភ្លើងធំ។ សមយុទ្ធនេះមានឈ្មោះថាបេសកកម្មយុត្តិធម៌ឆ្នាំ២០២៥។ តៃវ៉ាន់ក៏បញ្ចេញទាហានរបស់ខ្លួន និងអាវុធយុទ្ធភ័ណ្ឌដែលទិញពីអាមេរិកដើម្បីហាត់សមការវាយរុញច្រានកងទ័ពរបស់បច្ចាមិត្តឱ្យថយក្រោយវិញ។
បញ្ជាការដ្ឋានកងទ័ពប្រចាំទិសខាងកើតរបស់កងទ័ពប្រជាជនចិនថ្លែងថាខ្លួនប្រមូលផ្ដុំកម្លាំងនៅភាគខាងជើង និងនិរតីនៃច្រកសមុទ្រតៃវ៉ាន់ និងបាញ់គ្រាប់កាំភ្លើងពិតទៅលើគោលដៅនៅលើដី និងសមុទ្រ។ សមយុទ្ធយោធានេះនឹងបន្តធ្វើរហូតដល់ថ្ងៃអង្គារ ហើយនឹងរួមបញ្ចូលទាំងការហ្វឹកហាត់បិទខ្ទប់កំពង់ផែធំៗរបស់តៃវ៉ាន់ និងហ៊ុមព័ទ្ធកោះនេះយ៉ាងជុំជិតតែម្ដង។
មន្ត្រីយោធាជាន់ខ្ពស់តៃវ៉ាន់ប្រាប់ថាអូប័រដឹកទាហានចិនរាប់សិបគ្រឿង និងយន្តហោះចម្បាំងបានបើកប្រតិបត្តិការសឹកនៅជុំវិញកោះតៃវ៉ាន់។ នៅក្នុងចំណោមនោះ អូប័រ និងយន្តហោះខ្លះបើកទៅកៀកនឹងតំបន់មាត់សមុទ្រតៃវ៉ាន់តែម្ដងដែលមានចម្ងាយ២៤ម៉ាយ (៣៨គីឡូម៉ែត្រ) ពីដីគោក។ នេះជាការធ្វើសមយុទ្ធយោធាទ្រង់ទ្រាយធំលើកទី៦របស់ចិនចាប់តាំងពីឆ្នាំ២០២២។ សមយុទ្ធនេះធ្វើឡើងបន្ទាប់ពីនាយករដ្ឋមន្ត្រីជប៉ុនថ្លែងនៅក្នុងសភាកាលពីដើមខែវិច្ឆិកាថាចង់បញ្ជូនទ័ពទៅជួយតៃវ៉ាន់។
សមយុទ្ធនេះធ្វើឡើង១១ថ្ងៃក្រោយពេលអាមេរិកប្រកាសលក់អាវុធតម្លៃជាង១១ពាន់លានដុល្លារទៅឱ្យតៃវ៉ាន់។ ក្រុមអ្នកវិភាគអំពីស្ថានការណ៍សឹកយល់ថាយុទ្ធសាស្ត្រធ្វើសមយុទ្ធយោធារបស់ប្រទេសចិនឥឡូវនេះមានភាពប្រឡាំប្រកូវគ្នារវាងការធ្វើសមយុទ្ធទៅតាមទម្លាប់ធម្មតា និងការត្រៀមលក្ខណៈសម្បត្តិវាយប្រហារតៃវ៉ាន់។ នេះជាយុទ្ធសាស្ត្របំភាន់ភ្នែក។
ជួនកាលអាមេរិក និងសម្ព័ន្ធមិត្តអាល័យតែភ្លេចត្រចៀក ចិនវាយតៃវ៉ាន់ប្រាវតែម្ដង។ អ្នកនាំពាក្យបញ្ជាការដ្ឋានខាងកើតថ្លែងថាសមយុទ្ធយោធានេះជាការព្រមានធ្ងន់ៗទៅកាន់ក្រុមដែលចង់បំបែកទឹកដីនៅកោះតៃវ៉ាន់ និងក៏ព្រមានផងដែរទៅកម្លាំងបរទេសដែលចង់ជួយតៃវ៉ាន់។ សមយុទ្ធនេះត្រូវរដ្ឋាភិបាលតៃវ៉ាន់ប្រកាសថ្កោលទោសជាទម្ងន់។
ក្រសួងការពារជាតិតៃវ៉ាន់បង្ហោះវីឌីអូឃ្លីបនៅលើហ្វេសប៊ុកដោយបង្ហាញអាវុធយុទ្ធភ័ណ្ឌរបស់ខ្លួនរួមទាំងកាំជ្រួចហ្វូងម៉ាកហាយម៉ាស់ (HIMARS) ដែលអាចបាញ់បានចម្ងាយ៣រយគីឡូម៉ែត្រ។ ពោលគឺអាចបាញ់ដល់ខេត្តហ៊្វូចៀន (Fujian) របស់ប្រទេសចិន។ ចំណែកឆ្មាំល្បាតដែនសមុទ្រតៃវ៉ាន់ថ្លែងថាខ្លួនបានបញ្ចេញនាវាខ្នាតធំដើម្បីឆ្លើយតបទៅកងល្បាតរបស់ប្រទេសចិនដែលបើកទៅកៀកនឹងឆ្នេរសមុទ្រតៃវ៉ាន់ខ្លាំងពេក។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ