ទីក្រុងម៉ូស្គូ៖ ប្រទេសរុស្ស៊ីបានអំពាវនាវឱ្យអាមេរិក និងអ៊ីរ៉ង់ប្រើប្រាស់ការអត់ធ្មត់ជាអតិបរមា និងជៀសវាងកុំធ្វើអ្វីផ្ដេសផ្ដាសដែលអាចនាំឱ្យមានបញ្ហាធំ។ ការអំពាវនាវបែបនេះធ្វើឡើងបន្ទាប់ពីលោកដូណាល់ត្រាំទើបតែចេញសេចក្ដីព្រមានធ្ងន់ៗកាលពីម្សិលមិញថាបើសិនអ៊ីរ៉ង់អភិវឌ្ឍកម្មវិធីនុយក្លេអ៊ែរ និងមីស៊ីលផ្លោងជាថ្មីទៀត លោកនឹងវាយប្រហារផ្ដាច់ឫសគល់អ៊ីរ៉ង់តែម្ដង។
នៅចំពោះមុខអ្នកសារព័ត៌មានដោយមានលោកណឺតាន់យ៉ាហ៊ូស្ថិតនៅក្បែរនោះផង លោកដូណាល់ត្រាំថ្លែងថាអ៊ីរ៉ង់ទំនងជាកំពុងខិតខំអភិវឌ្ឍកម្មវិធីនុយក្លេអ៊ែរឡើងវិញបន្ទាប់ពីកម្មវិធីនេះរងការវាយប្រហារឡើងខ្ទេចខ្ទីអស់នៅក្នុងសង្គ្រាម១២ថ្ងៃកាលពីខែមិថុនា។ លោកថាលោកបានមើលរបាយការណ៍បញ្ជាក់ថាពួកគេកំពុងខិតខំអភិវឌ្ឍកម្មវិធីទាំងនេះឡើងវិញ។
លោកត្រាំថ្លែងថាលើកនេះ អ៊ីរ៉ង់នឹងអភិវឌ្ឍកម្មវិធីនុយក្លេអ៊ែររបស់ខ្លួននៅលើទីតាំងផ្សេងពីទីតាំងដែលរងការវាយប្រហារកាលពីលើកមុន។ ដោយសារមើលឃើញស្ថានភាពហាក់ដូចជាមិនសូវស្រួល ប្រទេសរុស្ស៊ីក្នុងនាមជាសម្ព័ន្ធមិត្តដ៏ជិតស្និទ្ធរបស់អ៊ីរ៉ង់បានជំរុញឱ្យភាគីជម្លោះទាំង២ខិតខំបន្ធូរបន្ថយភាពតានតឹង។ អ្នកនាំពាក្យវិមានក្រឹមឡាំងលោកប៉េស្កូសមានជំនឿថាជាការចាំបាច់ណាស់ដែលភាគីទាំង២ត្រូវខិតខំអត់ធ្មត់មិនចាត់វិធានការអ្វីមួយដែលបង្កភាពតានតឹងកាន់តែខ្លាំងនៅក្នុងតំបន់។ យើងជឿជាក់ថាជាជំហានដំបូង និងចាំបាច់បំផុតគឺត្រូវសន្ទនាគ្នាជាមួយអ៊ីរ៉ង់។
សូមរំលឹកថានៅក្នុងសង្គ្រាមរយៈពេល១២ថ្ងៃនោះ យោធាអាមេរិកបានទម្លាក់គ្រាប់បែកទៅលើទីតាំងបីកន្លែងដែលសង្ស័យថាផលិតអាវុធនុយក្លេអ៊ែរ។ កាលនោះ លោកត្រាំអះអាងថាការវាយប្រហារនោះបានវាយបំផ្លាញខ្ទេចគ្មានសល់នូវទីតាំងនុយក្លេអ៊ែរ។ ប៉ុន្តែនៅពេលភ្នាក់ងារសម្ងាត់អាមេរិកវាយតម្លៃឡើងវិញក្រោយមកទៀតទើបដឹងថាការវាយប្រហារនោះបំផ្លាញបានតែមួយទីតាំងប៉ុណ្ណោះ។
បើរុស្ស៊ីហ៊ានចេញមុខនិយាយប៉ុណ្ណេះទៅហើយ មានន័យថារុស្ស៊ីមិនប្រាកដជានៅស្ងៀមទេបើសិនអាមេរិកវាយប្រហារអ៊ីរ៉ង់មួយសាទៀត។ រុស្ស៊ី និងអ៊ីរ៉ង់បានចុះសន្ធិសញ្ញាភាពជាដៃគូយុទ្ធសាស្ត្រនៅឆ្នាំនេះ។ ក្រុមបស្ចិមប្រទេសចោទប្រកាន់ថាអ៊ីរ៉ង់ជាអ្នកផ្គត់ផ្គង់ដ្រូនដ៏ច្រើនសម្បើមសម្រាប់ឱ្យរុស្ស៊ីយកទៅវាយប្រហារអ៊ុយក្រែន។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ