ទីក្រុងញូយ៉ក៖ អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គូតេរ៉េស មានសារផ្ដាំផ្ញើនៅគ្រាចុងឆ្នាំ និងសម្រាប់ដើមឆ្នាំថ្មីដោយអំពាវនាវទៅមេដឹកនាំប្រទេសទាំងអស់ទូទាំងពិភពលោកយកចិត្តទុកដាក់ទៅលើអ្វីដែលជាចំណុចអាទិភាព និងវិនិយោគទៅលើការអភិវឌ្ឍជាជាងការអន្តរាយ។ លោកថ្លែងថាគ្រោះភ័យ និងភាពមិនប្រាកដប្រជាកំពុងហ៊ុមព័ទ្ធយើងរាល់គ្នា។ មនុស្សជុំវិញពិភពលោកកំពុងដាក់ជាសំណួរថាតើមេដឹកនាំរបស់ពួកគេកំពុងស្ដាប់ពួកគេ និងត្រៀមខ្លួនចាត់វិធានការដោះស្រាយបញ្ហាប្រឈមហើយឬនៅ។
យោងតាមស្ថិតិរបស់អង្គការសហប្រជាជាតិ ទំហំនៃការរងទុក្ខវេទនានៅតែមានកម្រិតស្រួចស្រាល់។ មនុស្សជាង២៥%រស់នៅក្នុងតំបន់ដែលកើតមានជម្លោះប្រដាប់អាវុធ, មនុស្សជាង២រយលាននាក់ត្រូវការជំនួយមនុស្សធម៌ និងមនុស្សជិត១២០លាននាក់ត្រូវផ្លាស់ប្ដូរទីលំនៅទៅកន្លែងថ្មីដោយសារសង្គ្រាម, វិបត្តិសង្គម, គ្រោះធម្មជាតិ ឬការធ្វើទុក្ខបុកម្នេញ។
ទោះបីពិភពលោកប្រឈមនឹងបញ្ហាទាំងនេះយ៉ាងណាក្ដី ប្រទេសនានានៅទូទាំងពិភពលោកមិនសូវខ្វាយខ្វល់ប៉ុន្មានទេ។ ពួកគេខ្វាយខ្វល់អំពីការទិញអាវុធយុទ្ធភ័ណ្ឌទុកបាញ់គ្នា។ ជាក់ស្ដែងការចំណាយលើវិស័យយោធាទូទាំងពិភពលោកនៅតែបន្តកើនឡើងជានិច្ច។ លោកហ្គូតេរ៉េសកត់សម្គាល់ថាទំហំនៃការចំណាយលើវិស័យយោធាសរុបទូទាំងពិភពលោកកើនឡើងដល់២,៧ទ្រីលានដុល្លារ។ ពោលគឺកើនឡើងជិត១០%បើប្រៀបធៀបនឹងរយៈពេលដូចគ្នាកាលពីឆ្នាំមុន។ ប្រសិនបើកើនឡើងថេរនៅក្នុងអត្រានេះ ទំហំនៃការចំណាយលើយោធានឹងកើនឡើងដល់៦,៦ទ្រីលានដុល្លារត្រឹមឆ្នាំ២០៣៥។
អគ្គលេខាធិការ UN រូបនេះចង់សង្កត់ធ្ងន់ថាការចំណាយទៅលើអាវុធមានទំហំ១៣ដងច្រើនជាងការផ្ដល់ជំនួយអភិវឌ្ឍទូទាំងសាកលលោក ហើយសឹងតែស្មើនឹងទំហំជីឌីភីសរុបនៅទូទាំងទ្វីបអាហ្វ្រិក។ របាយការណ៍របស់អង្គការសហប្រជាជាតិចេញផ្សាយកាលពីខែកញ្ញា ឆ្នាំ២០២៥បង្ហាញថាការបង្កើនខ្ទង់ចំណាយលើវិស័យយោធាបើយកទៅធ្វើអ្វីផ្សេងបានផលប្រយោជន៍ច្រើនណាស់។ បើ់ដកថវិកាត្រឹមតែ៤%នៃខ្ទង់ចំណាយយោធាទៅផ្ដល់ជំនួយមនុស្សធម៌អាចបិទបញ្ចប់ការអត់-ឃ្លានត្រឹមឆ្នាំ២០៣០, បើដកជាង១០%អាចទិញវ៉ាក់សាំងចាក់ឱ្យក្មេងៗទូទាំងសាកលលោក, ហើយបើដកថវិកានោះ១៥%មកប្រើប្រាស់អាចគ្រប់គ្រាន់សម្រាប់ដោះស្រាយបញ្ហាប្រែប្រួលអាកាសធាតុប្រចាំឆ្នាំនៅប្រទេសកំពុងអភិវឌ្ឍ។
នៅចុងបញ្ចប់ លោកហ្គូតេរ៉េសថ្លែងថាពិភពលោកមានធនធានគ្រប់គ្រាន់ដើម្បីលើកស្ទួយជីវិតរស់នៅ, ជួយស្រោចស្រង់ភពផែនដីរបស់យើង និងជួយធានាអនាគតនៃសន្តិភាព និងយុត្តិធម៌។ លោកសូមអំពាវនាវទៅមេដឹកនាំនានាទូទាំងសាកលលោកសូមជ្រើសរើសយកការលើកស្ទួយជីវិតប្រជាជន និងភពផែនដីជាជាងជ្រើសរើសយកការធ្វើសង្គ្រាម និងវិនាសកម្ម។ នេះបើយោងតាមការផ្សាយរបស់ស៊ីនហួ និងប្រភពដទៃទៀត៕
ចែករំលែកព័តមាននេះ