សហរដ្ឋអាមេរិក-តួកគី-ស៊ីរី ៖ បន្ទាប់ពីបើកដៃឲ្យតួកគីវាយលុកប្រឆាំងកងកម្លាំងឃើតនៅស៊ីរី ប្រធានាធិបតីអាមេរិកលោកដូណាល់ត្រាំ នាថ្ងៃទី៧តុលាបានងាករេចិត្តវិញក្នុងពេលមានភាពច្របូកច្របល់និងការគាបសង្កត់ជាអន្តរជាតិ ពិសេសពីសំណាក់គណបក្សលោក ដោយបែរមកព្រមានតួកគីប្រឆាំងរាល់ការវាយលុកនោះ។
តាមTWITTERប្រធានាធិបតីអាមេរិកសរសេរថា ប្រសិនបើតួកគីហា៊នធ្វើអ្វីមួយដែលហួសព្រំដែន នោះខ្ញុំនឹងបំផ្លាញព្រមទាំងកម្ទេចទាំងស្រុងសេដ្ឋកិច្ចតួកគី។ចំណែកបណ្ដាអ្នកទទួលខុសត្រូវនៃរដ្ឋាភិបាលលោក បានប្រឆាំងរាល់ប្រតិបត្តិការយោធាតួកគីហើយនិយាយសម្រាល ពីការចាកចេញរបស់កងទាហានអាមេរិកដែលដាក់ពង្រាយនៅស៊ីរីជិតព្រំដែនតួកគី។ អ្នកទទួលខុសត្រូវទាំងនោះលើកឡើងថា នោះជាទាហានអាមេរិកពី៥០ទៅ១០០នាក់ប៉ុណ្ណោះនៃកងកម្លាំងពិសេស ដែលត្រូវរើទៅដាក់ពង្រាយជាថ្មីក្នុងមូលដ្ឋានឯទៀតៗខាងក្នុងប្រទេសស៊ីរីហើយគ្មានករណីនៃការដកថយជាទូទៅមួយឡើយ។
ក្រោយកិច្ចសន្ទនាតាមទូរសព្ទ័រវាងលោកដូណាល់ត្រាំនិងសមភាគីតួកគីលោករីសីុបតៃយីបអ័រដូហ្គាន សេតវិមានបានបង្កើតភាពភ្ញាក់ផ្អើលមួយកាលពីយប់ថ្ងៃទី៦តុលា ដោយប្រកាសពីការដកកងទាហានអាមេរិកដែលដាក់ពង្រាយនៅជិតព្រំដែនតួកគី។ សេតវិមានបានលើកហេតុផលពីការដកថយនោះដោយថា តួកគីត្រៀមអនុវត្តប្រតិបត្តិការយោធារបស់ខ្លួនដែលគ្រោងចាប់តាំងពីយូរមកហើយ ប្រឆាំងកងជីវពលឃើតនិងបណ្ដាកងឯកភាពការពារប្រជាជនYPG ដែលជាសម្ព័ន្ធមិត្តងអាមេរិក ក្នុងការតស៊ូប្រឆាំងពួកជីហាដនៅស៊ីរី។
បន្ទាប់មកតាមTWITTERលោកត្រាំដែលមានគំនិតចង់ដកកងទាហានអាមេរិកភាគច្រើនរហូតដល់ទាំងស្រុងចេញពីស៊ីរី នាព្រឹកថ្ងៃទី៧តុលាអះអាងថា សម្រាប់យើងដល់ពេលវេលាចាកចេញពីសង្គ្រាមគួរឲ្យអស់សំណើចនិងគ្មានទីបញ្ចប់នោះ ហើយដកកងទាហានរបស់យើងត្រឡប់ទៅផ្ទះវិញ។
តាមអង្គការសិទ្ធិមនុស្សស៊ីរីOSDHមានប្រភពព័ត៌មានច្រើនក្នុងប្រទេសថា កងទាហានអាមេរិកនាព្រឹកថ្ងៃទី៧តុលា បានចាកចេញពីបណ្ដាទីតាំងគន្លឹះនៅRAS AL AIN និងTAI ABYADឆ្ពោះមកកាន់មូលដ្ឋានមួយស្ថិតនៅនៅចន្លោះតំបន់ទាំង២នេះ។ រលកនៃការជំទាស់ចំពោះការដកថយនេះផ្ទុះឡើងនៅសហរដ្ឋអាមេរិក រហូតបណ្ដាមនុស្សសំខាន់ៗនៃគណបក្សសាធារណរដ្ឋ។
ព្រឹទ្ធសមាជិកលោកLINDSEY GRAHAM អំពាវនាវឲ្យដកការសម្រេចចិត្តនោះចេញវិញ ព្រោះនឹងនាំឲ្យមានគ្រោះមហន្តរាយ។ ចំណែកប្រមុខក្រុមព្រឹទ្ធសភានៃគណបក្សសាធារណរដ្ឋលោកMITCH MCCONNELLបានព្រមានថា ការចាកចេញដោយប្រញាប់ប្រញាល់ពីស៊ីរីនឹងនាំឲ្យរុស្ស៊ី និងអ៊ីរ៉ង់មានប្រៀប៕ (កែសម្រួលដោយ ៖ បុប្ផា)
ចែករំលែកព័តមាននេះ