ទីក្រុងវ៉ាស៊ីនតោន៖ លោកដូណាល់ត្រាំជាថ្មីម្ដងទៀតបានចេញសេចក្ដីព្រមានធ្ងន់ៗទៅអ៊ីរ៉ង់ថាត្រូវតែមានកិច្ចព្រមព្រៀងជាមួយគ្នាត្រឹមយប់នេះដែលជាឱសានវាទចុងក្រោយ។ បើមិនដូច្នេះទេអរិយធម៌ទាំងមូលនឹងត្រូវបាត់បង់នៅក្នុងរាត្រីនេះហើយ។ លោកថាអរិយធម៌មួយនឹងត្រូវស្លាប់នៅយប់នេះ ហើយមិនអាចស្រង់ដើមមកវិញទេ។ លោកក៏មិនចង់ឃើញព្រឹត្តិការណ៍នេះកើតឡើងដែរ។ ប៉ុន្តែវាប្រហែលជានឹងកើតឡើង។
យើងគង់តែដឹងការពិតនៅយប់នេះជាមិនខាន។ នោះគឺព្រឹត្តិការណ៍ដ៏សំខាន់បំផុតមួយនៅក្នុងប្រវត្តិសាស្ត្រពិភពលោកដ៏បត់បែនវែងឆ្ងាយ និងពោរពេញដោយភាពស្មុគស្មាញ។ រយៈពេល៤៧ឆ្នាំហើយដែលអ៊ីរ៉ង់ហែលឆ្លងការគាបសង្កត់ ធ្វើទារុណកម្ម និងសេចក្ដីស្លាប់ (ដែលប្រពឹត្តឡើងដោយរបបដឹកនាំអ៊ីរ៉ង់ចាប់តាំងពីក្រោយបដិវត្តឥស្លាមឆ្នាំ១៩៧៩)។ ព្រះជាម្ចាស់នឹងប្រទានពរសម្រាប់កំពូលវីរជននៅប្រទេសអ៊ីរ៉ង់។
លោកត្រាំព្រមានថាលោកនឹងកម្ទេចស្ពាន និងរោងចក្រអគ្គិសនីរបស់អ៊ីរ៉ង់ដោយប្រើពេលត្រឹមតែបួនម៉ោងប៉ុណ្ណោះ។ លោកព្រមានថានឹងធ្វើដូច្នេះប្រសិនបើអ៊ីរ៉ង់មិនព្រមបើកច្រកសមុទ្រហ័រម៉ូសត្រឹមម៉ោង៨យប់នេះ។ ឥឡូវនេះ យើងបានផ្លាស់ប្ដូររបបដឹកនាំ (នៅអ៊ីរ៉ង់) ទាំងស្រុងហើយ។ អ្នកថ្មីនេះត្រូវលោកត្រាំពិពណ៌នាថាជាមនុស្សឆ្លាតវៃ និងមិនសូវជ្រុលនិយមដូចអ្នកជំនាន់មុនៗដែលបានចែកឋានទៅកាន់លោកខាងមុខអស់ទៅហើយនោះទេ។
នៅពេលឱសានវាទរបស់លោកត្រាំកាន់តែកៀកទៅៗយ៉ាងដូច្នេះ ប្រតិបត្តិការវាយប្រហារទៅលើអ៊ីរ៉ង់ចាប់ផ្ដើមផ្ទុះឡើងកាន់តែខ្លាំងពេញមួយថ្ងៃ។ ទីតាំងមួយចំនួនរងការវាយប្រហារដូចជាផ្លូវរថភ្លើង ស្ពានអាកាស ព្រលានយន្តហោះ និងរោងចក្រចម្រាញ់សារធាតុគីមីសម្រាប់ផលិតប្រេង និងកាត់ផ្ដាច់ប្រព័ន្ធចែកចាយភ្លើងអគ្គិសនីជាច្រើនកន្លែង។ នេះបើយោងតាមការផ្សាយរបស់សារព័ត៌មានអ៊ីរ៉ង់។
ជាកិច្ចឆ្លើយតប អ៊ីរ៉ង់ប្រកាសថាខ្លួននឹងបញ្ឈប់ការវាយប្រហារទៅលើហេដ្ឋារចនាសម្ព័ន្ធនៃបណ្ដាប្រទេសជិតខាងនៅឈូងសមុទ្រពែកទេ។ អ៊ីរ៉ង់ថែមទាំងអះអាងទៀតថាខ្លួនទើបតែវាយប្រហារកប៉ាល់ដឹកទំនិញមួយគ្រឿងនៅឈូងសមុទ្រ និងវាយប្រហាររោងចក្រជាច្រើនកន្លែងនៅអារ៉ាប៊ីសាអូឌីតដែលមានទំនាក់ទំនងជាមួយក្រុមហ៊ុនអាមេរិក។ សំណើនៃបទឈប់បាញ់ដែលបញ្ជូនដោយក្រុមប្រទេសអន្តរការីត្រូវអ៊ីរ៉ង់ច្រានចោល និងចាត់ទុកថានោះជាសំណើច្រើនស្អេកស្កះ និងគ្មានភាពតក្កៈ៕ ប្រភព៖ ឆេនណល ញូស៍ អេស៊ា និងប្រភពដទៃទៀត
ចែករំលែកព័តមាននេះ