ក្រោយ​កាត់ក្ដី​មួយ​ចៅក្រម​ថៃ​ម្នាក់​បាញ់​ប៉ង​សម្លាប់​ខ្លួន


ប្រទេស​ថៃ ៖ បន្ទាប់​ពី​សម្រេច​ដោះ​លែង​មនុស្ស​៥​នាក់​ដែល​ជាប់ចោទ​ពី​បទ​សម្លាប់​មនុស្ស​ និង​កាន់​អាវុធ​ខុសច្បាប់ ចៅក្រម​ថៃ​ម្នាក់​លោក ​KHANAKORN PIANCHANA បាន​ប៉ង​បាញ់​​សម្លាប់​ខ្លួន​ត្រង់​ដើមទ្រូង​មួយ​គ្រាប់ ​បន្ទាប់​ពី​សវនាការបញ្ចប់​ ដោយ​ចោទ​​ប្រកាន់​ចៅក្រម​ឯទៀត​ៗ​​ថា ធ្វើការ​គាបសង្កត់​លើ​រូប​លោក​ ដើម្បី​ឲ្យ​លោក​ប្ដូរ​ចិត្ត​លើ​សាលក្រម​ដែល​លោក​ចេញ​។

នៅ​ក្នុង​សវនាការ​ដែល​ប្រព្រឹត្ត​ទៅ​ក្នុង​តុលាការខេត្ត​យ៉ា​ឡា​ ភាគ​ខាងត្បូង​ថៃ ចៅក្រម​រូប​នេះ​ថ្លែង​ថា ដាក់ទោស​មនុស្ស​ម្នាក់ ​មិន​ត្រឹម​អ្នក​នោះ​ជាប់​ទោស​ម្នាក់ឯង​ទេ តែ​គ្រួសារ​គេ​ទាំងមូល​ក៏​ជាប់​ទោស​ដែរ​។ ប្រសិនបើ​យើង​មិន​ច្បាស់​ពី​បទល្មើស​របស់​គេនោះ ​យើង​មិន​ត្រូវ​ដាក់ទោស​គេ​ទេ​។ ប៉ុន្តែ​បែប​នេះ​ពុំ​មាន​ន័យ​ថា ខ្ញុំ​ធានា​ដែល​ជនជាប់ចោទ​ទាំង​៥​នាក់ ពុំ​បាន​ប្រព្រឹត្ត​បទឧក្រិដ្ឋ​ឡើយ។ ពួក​គេ​អាច​ប្រព្រឹត្ត តែ​នីតិវិធីតុលាការ​ត្រូវ​តែ​មាន​តម្លាភាព ​និង​សុពលភាព ដើម្បី​កុំ​ឲ្យ​គេ​និយាយ​ថា ​យើង​ចេះ​តែ​កាត់ទោស​មនុស្ស​ទាំង​ទទឹងទិស​។

ក្នុង​ចំណោម​មនុស្ស​ត្រូវ​ដោះ​លែង​ទាំង​៥​នាក់ ម្នាក់​អាច​មានទោស​ប្រហារជីវិត ហើយ​២​នាក់​ទៀត​អាច​មានទោស​ជាប់គុក ពី​បទ​រួមគំនិត​សម្លាប់​មនុស្ស​។ ចៅក្រម​បាន​ដោះ​លែង​ពួក​គេ​ដោយ​​លើក​ហេតុផល​ពុំ​មាន​ភស្ដុ​តាង​គ្រប់គ្រាន់​។

មុន​ដំណើរការ​កាត់សេចក្ដី​លើ​សំណុំរឿង​នោះ ​ចៅក្រម​លោក​ KHANAKORN PIANCHANA ធ្លាប់​បរិហារ​ពី​ការ​ប៉ុនប៉ង​ជ្រៀតជ្រែក​ពី​សំណាក់​បណ្ដា​ចៅក្រម​ជាន់ខ្ពស់​។ លោក​អះអាង​ក្នុង​របាយ​ការណ៍​ដ៏​វែង​មួយ​ថា ប្រ​ព័​ន្ធ​តុលាការ​ថៃ​ រង​សម្ពាធ​នៃ​ការ​រំលោភ​បំពាន​អំណាច របស់​បណ្ដា​ចៅក្រម​ជាន់ខ្ពស់​ដែល​ចាប់បង្ខំ​ឲ្យ​ចេញ​សាលក្រម​ដាក់ទោស ស្រប​ទៅ​តាម​គោលដៅ​នយោ​បាយ​។

ចាប់តាំងពី​ខែកញ្ញា​មក ​ចៅក្រម​រូប​នេះ​បាន​បង្កើន​ការ​ចេញផ្សាយ​សេច​ក្ដីថ្លែង​ការណ៍​ស្ដី​ពី​សភាព​នៃ​ប្រព័ន្ធ​តុលាការ​ថៃ ដែល​លោក​រិះគន់​ថា ​លម្អៀង​៕ (​កែសម្រួល​ដោយ ៖ បុប្ផា​)

Facebook Google Twitter Email

ព័ត៌មាន​អន្តរជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ