ទីក្រុងតេអេរ៉ង់៖ ប្រទេសអ៊ីរ៉ង់ដាក់លក្ខខណ្ឌចំនួនបីដើម្បីជាថ្នូរនឹងការយល់ព្រមបញ្ចប់សង្គ្រាម។ បើមិនដូច្នេះទេ ទោះបីអាមេរិកឈប់វាយប្រហារក៏ដោយ ក៏សង្គ្រាមនេះមិនចប់ដែរ។ ប្រធានាធិបតីអ៊ីរ៉ង់ លោកម៉ាស៊ុត ប៉េហ្សេស្គាន (Masoud Pezeshkian)…
ទីក្រុងតេអេរ៉ង់៖ ប្រទេសអ៊ីរ៉ង់ដាក់លក្ខខណ្ឌចំនួនបីដើម្បីជាថ្នូរនឹងការយល់ព្រមបញ្ចប់សង្គ្រាម។ បើមិនដូច្នេះទេ ទោះបីអាមេរិកឈប់វាយប្រហារក៏ដោយ ក៏សង្គ្រាមនេះមិនចប់ដែរ។ ប្រធានាធិបតីអ៊ីរ៉ង់ លោកម៉ាស៊ុត ប៉េហ្សេស្គាន (Masoud Pezeshkian) បង្ហោះសារនៅលើបណ្ដាញអ៊ិចថាសង្គ្រាមនេះអាចបញ្ចប់ទៅវិញលុះត្រាតែអនុវត្តតាមលក្ខខណ្ឌបីយ៉ាង៖ ការទទួលស្គាល់សិទ្ធិស្របច្បាប់របស់អ៊ីរ៉ង់, ការផ្ដល់ប្រាក់សំណងថ្លៃខូចខាតដែលអាមេរិក និងអ៊ីស្រាអែលវាយប្រហារអ៊ីរ៉ង់ និងការធានាជាអន្តរជាតិថាអ៊ីរ៉ង់នឹងមិនរងការវាយប្រហារជាថ្មីនាពេលអនាគត។
អ៊ីរ៉ង់ដាក់លក្ខខណ្ឌបែបនេះស្របពេលដែលខ្លួនបន្តធ្វើសង្គ្រាមមួយទល់នឹងពីរជាមួយអាមេរិក និងអ៊ីស្រាអែល។ លោកប៉េហ្សេស្គានសរសេររៀបរាប់នៅលើបណ្ដាញអ៊ិចថា «បន្ទាប់ពីពិគ្រោះគ្នាជាមួយថ្នាក់ដឹកនាំរុស្ស៊ី និងប៉ាគីស្ថានរួច លោកសូមបញ្ជាក់ពីការប្ដេជ្ញាចិត្តចង់ឱ្យមានសន្តិភាពនៅក្នុងតំបន់។ វិធីតែមួយគត់ដើម្បីបញ្ចប់សង្គ្រាមគឺត្រូវតែទទួលស្គាល់សិទ្ធិស្របច្បាប់របស់អ៊ីរ៉ង់, ត្រូវតែសងថ្លៃខូចខាត និងត្រូវតែធានាជាអន្តរជាតិថាឈប់វាយប្រហារមកលើអ៊ីរ៉ង់តទៅទៀត»។
ប្រធានាធិបតីអ៊ីរ៉ង់ចាប់ផ្ដើមបោះដៃទៅរកការចរចាបញ្ចប់សង្គ្រាមបន្ទាប់ពីអ្នកនាំពាក្យកងទ័ពអ៊ីរ៉ង់ទើបតែថ្លែងប្រាប់ទូរទស្សន៍រដ្ឋអ៊ីរ៉ង់ (IRIB) ថាបើសិនយោធាអាមេរិកនៅតែបន្តវាយប្រហារកំពង់ផែរបស់អ៊ីរ៉ង់ទៀត អ៊ីរ៉ង់ក៏លែងគួរសមតទៅទៀតដែរ។ កំពង់ផែ និងមជ្ឈមណ្ឌលពាណិជ្ជកម្មរបស់បណ្ដាប្រទេសនៅតំបន់ឈូងសមុទ្រពែក្សនឹងក្លាយជាគោលដៅដែលយោធាអ៊ីរ៉ង់សូមរក្សាសិទ្ធិវាយប្រហារ។
អ្នកនាំពាក្យរូបនេះព្រមានថាការវាយប្រហារលើកនេះនឹងមានសភាពខ្លាំងក្លាជាងអ្វីដែលអ៊ីរ៉ង់ធ្លាប់ធ្វើពីមុនមក។ លោកនិយាយនេះក្នុងន័យថាបើសិនកំពង់ផែរបស់អ៊ីរ៉ង់រងការវាយប្រហារពីអាមេរិកនាពេលអនាគត។ លោកសូមអំពាវនាវឱ្យបណ្ដាប្រទេសដែលអនុញ្ញាតឱ្យអាមេរិកដាក់មូលដ្ឋានយោធានោះប្រញាប់បណ្ដេញអាមេរិកចេញឱ្យអស់បើពួកគេចង់សុខខ្លួន។ យោងតាមការផ្សាយរបស់រ៉យទ័រ មន្ត្រីរដ្ឋាភិបាលអ៊ីស្រាអែលទទួលស្គាល់ថាសង្គ្រាមនេះទំនងជាមិនធ្វើឱ្យរង្គោះរង្គើរបបដឹកនាំបែបសាសនាធិបតេយ្យនៅអ៊ីរ៉ង់ទេ។
ទោះបីលោកត្រាំអះអាងថាសង្គ្រាមជិតឈានដល់ទីបញ្ចប់ហើយព្រោះអាមេរិកជិតសម្រេចគោលដៅរបស់ខ្លួន ហើយអ៊ីរ៉ង់គ្មាននៅសេសសល់សម្រាប់វាយប្រហារតទៅទៀត ប៉ុន្តែខាងអ៊ីរ៉ង់មិនចង់បញ្ចប់នៅពេលនេះទេ។ ការទម្លាក់គ្រាប់បែកដ៏ខ្លាំងក្លារបស់អាមេរិក និងអ៊ីស្រាអែលនៅថ្ងៃដំបូងនៃសង្គ្រាមបានសម្លាប់អតីតមេដឹកនាំកំពូលរបស់អ៊ីរ៉ង់គឺលោកអាយ៉ាតូឡា អាលី ខាមេនី និងមេបញ្ជាការយោធាជាច្រើននាក់ក៏ពិតមែន។ ក៏ប៉ុន្តែជនស៊ីវិលក៏ស្លាប់មិនតិចនាក់ដែរ ហើយផ្ទះសម្បែងរបស់ប្រជាជនរួមទាំងអគារជាច្រើនកន្លែងត្រូវបានបំផ្លាញ។ ចំណុចនេះហើយដែលធ្វើឱ្យប្រជាជនអ៊ីរ៉ង់មានកំហឹង។
ចំណុចមួយទៀត ទោះបីមានក្រុមប្រឆាំងនឹងរដ្ឋាភិបាលអ៊ីរ៉ង់ចង់ងើបបះបោរក៏ពួកគេត្រូវតែក្រាបទៅវិញដែរ។ ដោយសារម៉្យាងអាមេរិក និងអ៊ីស្រាអែលបន្តបាញ់មីស៊ីល និងទម្លាក់គ្រាប់បែកលើទីក្រុងតូចធំនានាទូទាំងប្រទេសអ៊ីរ៉ង់ និងម៉្យាងទៀត អាជ្ញាធរអ៊ីរ៉ង់ព្រមានចាត់វិធានការក្ដៅលើអ្នកណាក៏ដោយដែលហ៊ានចេញហែបាតុកម្មនៅតាមផ្លូវ។ ដូចនេះ ពួកគេត្រូវរង់ចាំរហូតដល់សង្គ្រាមចប់សិន។ រួចហើយចាំគិតគ្នាទៀត៕ ប្រភព៖ New Daily TV (NDTV) និងប្រភពដទៃទៀត
ចែករំលែកព័តមាននេះ