ទីក្រុងវ៉ាស៊ីនតោន៖ គិតទៅ នៅក្នុងសង្គ្រាមអ៊ីរ៉ង់ អាមេរិកចំណាយលុយយ៉ាងច្រើនសន្ធឹកសន្ធាប់។ យោងតាមរបាយការណ៍របស់ក្រសួងការពារជាតិអាមេរិក (មន្ទីរបញ្ចកោណ) ដែលឡើងរាយការណ៍ជូនព្រឹទ្ធសភាកាលពីពេលថ្មីៗនេះ គ្រាន់តែរយៈពេល៧ថ្ងៃដំបូងនៃការវាយប្រហារទៅលើអ៊ីរ៉ង់ អាមេរិកចំណាយលុយ១១,៣ពាន់លានដុល្លារ។ នេះបើយោងតាមអ្វីដែលទីភ្នាក់ងារព័ត៌មានអេភីរាយការណ៍ដោយដកស្រង់ប្រភពពីមន្ត្រីជាន់ខ្ពស់អាមេរិកដែលស្នើសុំមិនបញ្ចេញឈ្មោះ។
គ្រាន់តែសង្គ្រាម២ថ្ងៃដំបូងកាលពីថ្ងៃសៅរ៍ និងថ្ងៃអាទិត្យ (២៨ កុម្ភៈ និង១ មីនា) អាមេរិកចំណាយទៅលើគ្រាប់រំសេវអស់៥ពាន់លានដុល្លារ។ នេះមិនទាន់គិតទៅដល់ការចំណាយអ្វីផ្សេងផង។ សូមជម្រាបថាខ្ទង់ចំណាយសរុបរបស់អាមេរិកនៅក្នុងសង្គ្រាមរយៈពេល១២ថ្ងៃចុងក្រោយនេះមិនទាន់ដឹងថាអស់ប៉ុន្មានពិតប្រាកដទេ។ តួលេខជាង១១ពាន់លានដុល្លារនោះគ្រាន់តែសរុបត្រួសៗនៅក្នុងរយៈពេលមួយសប្ដាហ៍ដំបូងប៉ុណ្ណោះ។
គេរំពឹងថាសេតវិមាននឹងបញ្ជូនសំណើទៅព្រឹទ្ធសភាឆាប់ៗនេះដើម្បីឱ្យសភាពិនិត្យ និងអនុម័តថវិកាបន្ថែមទៀតសម្រាប់យកទៅធ្វើសង្គ្រាម។ មន្ត្រីរដ្ឋាភិបាលអាមេរិកខ្លះបង្ហើបឱ្យដឹងថាថវិកាដែលរដ្ឋបាលរបស់លោកត្រាំស្នើសុំនោះអាចនឹងមានចំនួនច្រើនដល់៥០ពាន់លានដុល្លារ។ ប៉ុន្តែអ្នកខ្លះទៀតយល់ថាអាចនឹងតិចជាងនេះ។ រដ្ឋាភិបាលអាមេរិកមិនទាន់បញ្ចេញរបាយការណ៍ជាសាធារណៈថាតើខ្លួនបានចំណាយលុយអស់ប៉ុន្មានទៅលើសង្គ្រាមនេះ? ឬក៏ថាតើសង្គ្រាមនេះនឹងអូសបន្លាយរហូតដល់ពេលណាទើបចប់?
កាលពីយប់មិញ លោកដូណាល់ត្រាំអះអាងថាខាងភាគីអាមេរិកជាអ្នកទទួលជ័យជម្នះនៅក្នុងសង្គ្រាមនេះរួចជាស្រេច។ ប៉ុន្តែលោកថាអាមេរិកមិនទាន់ដកខ្លួនថយពីសង្គ្រាមនេះទេ ព្រោះនៅសេសសល់កិច្ចការមួយចំនួនទៀតដែលខ្លួនត្រូវតែធ្វើឱ្យបានចប់សព្វគ្រប់។ លោកត្រាំអះអាងថាយោធាអាមេរិកបានវាយប្រហារគោលដៅជាង៣ពាន់ទីតាំង។ លោកថាកងទ័ពជើងទឹក និងជើងអាកាសរបស់អ៊ីរ៉ង់រលាយសាបសូន្យ, ពួកគេអស់មីស៊ីលសម្រាប់បាញ់តដៃ, សូម្បីតែរោងចក្រផលិតដ្រូនក៏ត្រូវយើងវាយកម្ទេចអស់គ្មានសល់។
នៅក្នុងសញ្ញាវិជ្ជមានមួយដែលថាសង្គ្រាមអាចនឹងចប់ទៅវិញនៅត្រង់ថាប្រធានាធិបតីអ៊ីរ៉ង់បានដាក់បុរេលក្ខខណ្ឌមួយចំនួនដើម្បីជាថ្នូរនឹងការបញ្ចប់សង្គ្រាម។ នៅក្នុងចំណោមលក្ខខណ្ឌទាំងនោះក៏មានការទាមទារឱ្យអាមេរិកចេញសងថ្លៃខូចខាតដែលខ្លួនវាយប្រហារទៅលើអ៊ីរ៉ង់ និងការធានាដោយប្រាកដប្រជា និងដឹងឮជាអន្តរជាតិថាអ៊ីរ៉ង់នឹងមិនរងការវាយប្រហារជាថ្មីទៀតទេនាពេលអនាគត។
សង្គ្រាមនេះមានរយៈពេលខ្លីក៏ពិតមែន ក៏ប៉ុន្តែទំហំនៃការខូចខាតមិនសាមញ្ញពេកទេ។ គ្រាន់តែគ្រាប់មីស៊ីលបាញ់គ្នាទៅវិញទៅមកមិនតិចពាន់លានដុល្លារនោះឡើយ។ នេះមិនទាន់គិតទៅដល់ការខូចខាតទ្រព្យសម្បត្តិ ហេដ្ឋារចនាសម្ព័ន្ធ អាយុជីវិតរបស់មនុស្សនៅឡើយទេ។ ជាពិសេស ទំនាក់ទំនងការទូតអាចនឹងល្អក់កករនឹងគ្នារវាងអ៊ីរ៉ង់ និងបណ្ដាប្រទេសនៅមជ្ឈិមបូព៌ាខ្លះដែលរងការបាញ់ប្រហារដោយមីស៊ីលរបស់អ៊ីរ៉ង់។ សង្គ្រាមនេះធ្វើឱ្យមនុស្ស២ពាន់នាក់ស្លាប់ ភាគច្រើននៅអ៊ីរ៉ង់ និងលីបង់។ ចំណែកអាមេរិកពលីជីវិតយុទ្ធជន៧នាក់៕ ប្រភព៖ អេភី (AP), រ៉យទ័រ (Reuters) និងប្រភពដទៃទៀត
ចែករំលែកព័តមាននេះ