សហរដ្ឋអាមេរិក-កូរ៉េខាងជើង ៖ ប្រទេសកូរ៉េខាងជើងបានចោទប្រកាន់សហរដ្ឋអាមេរិកថា ធ្វើឲ្យបរាជ័យការពិគ្រោះពិភាក្សាគ្នាស្ដីពីកម្មវិធីនុយក្លេអ៊ែរ ដែលបានធ្វើកាលពីថ្ងៃទី៥ ខែតុលា ឆ្នាំ២០១៩ នៅទីក្រុងស្តុកខូល ប្រទេសស៊ុយអែត។
ការពិគ្រោះពិភាក្សាគ្នានេះ គឺជាការប៉ុនប៉ងដំបូងភ្ជាប់ការចរចាឡើងវិញ រវាងប្រទេសទាំង២ចាប់តាំងពីបរាជ័យនៃការជួបគ្នាកំពូលនៅក្រុងហាណូយ កាលពីខែកុម្ភៈ រវាងលោកប្រធានាធិបតីត្រាំ និងមេដឹកនាំកូរ៉េខាងជើងលោកគីមជុងអ៊ុន។
នៅក្រុងស្តុកខូលបេសកជនកូរ៉េខាងជើងលោកKIM MYONG GIL និងបេសកជនអាមេរិកលោក STEPHEN BIEGUNបានជួបគ្នា ក្រោមអាជ្ញាកណ្ដាលរបស់បេសកជនពិសេសស៊ុយអែតលោកKENT HARSTEDT ជាអ្នកធ្លាប់ជួយឲ្យមានការដោះលែងនិស្សិតអូស្ត្រាលីម្នាក់ ដែលចាប់ឃុំឃាំងរយៈពេលខ្លីដោយក្រុងព្យុងយ៉ាង។
នៅមុខស្ថានទូតកូរ៉េខាងជើងប្រចាំក្រុងស្តុកខូល លោកKIM MYONG GILថ្លែងទៅកាន់បណ្ដាអ្នកកាសែតថា ការចរចាមិនជាគួរពេញចិត្តដូចការរំពឹងទុករបស់យើងឡើយ ហើយទីបញ្ចប់ត្រូវបរាជ៏យ។ ការចរចាបរាជ័យដោយពុំសម្រេចបានការជឿនលឿនទៅមុខណាមួយឡើយ ហើយនោះមកពីខាងសហរដ្ឋអាមេរិក ដែលមិនបោះបង់ចោលឥរិយាបថជាទម្លាប់របស់ខ្លួន។
ប្រធានាធិបតីអាមេរិកលោកដូណាល់ត្រាំថ្លែងកាលពីថ្ងៃទី៣តុលាថា លោកចង់បន្តការចរចាជាមួយកូរ៉េខាងជើង ដែលនឹងបើកធ្វើឡើងវិញក្រោយជាប់គាំងជាច្រើនខែ ទោះជាមានការបាញ់សាកល្បងថ្មីនៃមីសីុលរបស់ក្រុងព្យុងយ៉ាង ដែលក្រុងវ៉ាសិុនតោនគិតថាជាការបង្កហេតុក្ដី៕ (កែសម្រួលដោយ ៖ បុប្ផា)
ចែករំលែកព័តមាននេះ