រាជធានីភ្នំពេញ៖ ប្រធានគណបក្សសង្គ្រោះជាតិ លោក សម រង្ស៊ី បានបញ្ជាក់ពីគោលជំហររបស់ខ្លួនថា CNRP នៅតែទាមទារឲ្យមានការបោះឆ្នោតថ្នាក់ជាតិមុនអាណត្តិ ហើយថាថ្ងៃស្អែក ( ទី១១ មេសា ២០១៤ ) អត់មានការចូលព្រះបរមរាជវំាងនោះទេ ពីព្រោះលោក កឹម សុខា នៅសហរដ្ឋអាមេរិក ។
ការលើកឡើងរបស់លោក សម រង្ស៊ី នាពេលនេះបានធ្វើឡើងនៅរសៀលថ្ងៃទី១០ មេសា ២០១៤ ក្នុងសន្និសីទកាសែត នៅទីស្នាក់ការកណ្តាលគណបក្ស ស្ថិតក្នុងសង្កាត់ចាក់អង្រែលើ ខណ្ឌមានជ័យ ។ បើតាមលោក សម រង្ស៊ី លោកនិងលោក កឹម សុខា ជាមនុស្សតែមួយ ការធ្វើសេចក្តីសម្រេចណាមួយលុះណាតែមានហត្ថលេខាទំាងពីរនាក់ (សម រង្ស៊ី និង កឹម សុខា ) ។
យ៉ាងណាក៏ដោយមេបក្សប្រឆាំងរូបនេះ ក៏បានបញ្ជាក់ដែរថា ជំហររបស់CNRP គឺចង់រកដំណោះស្រាយឲ្យបានឆាប់ ហើយផ្តល់អាទិភាពទៅដល់ការទាមទារជជែកគ្នាដោយសន្តិវិធី ចៀសវាងអំពើហិង្សានិងការបង្ហូរឈាម ។ បើតាមលោក សម រង្ស៊ី ការពិភាក្សាគ្នាតាមទូរស័ព្ទជាមួយសម្តេចតេជោ ហ៊ុន សែន កាលពីថ្ងៃម្សិលមិញនេះ គឺបានបង្ហាញពីការយល់ចិត្តថ្លើមគ្នាឈរលើប្រយោជន៏រួម ។
ទាក់ទងទៅនឹងការបោះឆ្នោតរើសសមាជិកក្រុមប្រឹក្សាឃុំ-សង្កាត់ CNRP ចង់កំណត់យកខែ មិថុនា ២០១៦ ហើយការបោះឆ្នោតជ្រើសតំាងតំណាងរាស្រ្តគឺ CNRP មិនទទួលយកការកំណត់របស់គណបក្សប្រជាជនកម្ពុជាដែលយកខែកុម្ភៈ ២០១៨នោះទេ គឺ CNRP ចង់ឲ្យបានឆាប់ ( មុនអាណត្តិ ) ។
យ៉ាងណាក៏ដោយទាក់ទងទៅនឹងការប្រកាសរបស់ លោក សម រង្ស៊ី ពីគោលជំហររបស់ CNRP ក្រោយជំនួបតាមទូរស័ព្ទជាមួយសម្តេចតេជោ ហ៊ុន សែន កាលពីថ្ងៃទី០៩មេសា កោះសន្តិភាពមិនទាន់អាចទាក់ទងសុំសេចក្តីអត្ថាធិប្បាយបានភ្លាមៗនៅឡើយទេពីមន្រ្តីជាន់ខ្ពស់គណបក្សប្រជាជនកម្ពុជានៅរសៀលថ្ងៃទី១០មេសានេះ ៕
ចែករំលែកព័តមាននេះ