រាជធានីភ្នំពេញ ៖ ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានថ្លែងថា កម្ពុជាមានការស្រងាកចិត្តជាខ្លាំងចំពោះយុទ្ធនាការនៃការផ្សព្វផ្សាយព័ត៌មានមិនពិតដែលកំពុងដំណើរការដោយប្រទេសថៃ នៅចំពេលដែលប្រទេសទាំងពីរកម្ពុជា-ថៃ…
រាជធានីភ្នំពេញ ៖ ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានថ្លែងថា កម្ពុជាមានការស្រងាកចិត្តជាខ្លាំងចំពោះយុទ្ធនាការនៃការផ្សព្វផ្សាយព័ត៌មានមិនពិតដែលកំពុងដំណើរការដោយប្រទេសថៃ នៅចំពេលដែលប្រទេសទាំងពីរកម្ពុជា-ថៃ កំពុងតែចូលរួមកិច្ចសន្ទនាសម្រាប់ការអនុវត្តដោយពេញលេញនូវបទឈប់បាញ់ ដែលយុទ្ធនាការនៃការផ្សព្វផ្សាយព័ត៌មានមិនពិតរបស់ថៃនេះត្រូវបានគេមើលឃើញថា ជាការប៉ុនប៉ង ដើម្បីបំភាន់សហគមន៍អន្តរជាតិជាការបកស្រាយដោយខុសឆ្គងចំពោះជំហររបស់កម្ពុជា និងបង្វែងការចាប់អារម្មណ៍ពីសកម្មភាពរបស់ថៃផ្ទាល់ ។
ការបញ្ជាក់យ៉ាងដូច្នេះ របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជានេះក្នុងឱកាសនៃការធ្វើសេចក្តីសង្ខេបព័ត៌មានប្រចាំថ្ងៃស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី០៧ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី ។
ឯកឧត្តម ជុំ សុន្ទរី អ្នកនាំពាក្យក្រសួងការបរទេសកម្ពុជា បានធ្វើការគូសបញ្ជាក់នូវចំណុចមួយចំនួនដូចតទៅនេះទី១. កម្ពុជាបានបង្ហាញឱ្យឃើញយ៉ាងច្បាស់ និងជាប់ជានិច្ចនូវសុឆន្ទៈ ការអត់ធ្មត់ និងការតាំងចិត្តចំពោះសន្តិភាពរបស់ខ្លួន ជាពិសេស គឺតាមរយៈការគោរពដោយពេញលេញចំពោះកិច្ចព្រមព្រៀងឈប់បាញ់ ដែលសម្រេចបាននៅក្នុងកិច្ចប្រជុំពិសេស កាលពីថ្ងៃទី២៨ ខែកក្កដា ឆ្នាំ២០២៥ នៅម៉ាឡេស៊ី ដោយកម្ពុជាកំពុងចូលរួមយ៉ាងសកម្ម និងដោយសុទ្ធចិត្តនៅក្នុងការដោះស្រាយបញ្ហាដោយផ្លូវការទូត ។
ទី២. កម្ពុជាសូមបដិសេធយ៉ាងដាច់អហង្កាចំពោះការចោទប្រកាន់មួយចំនួនរបស់ថៃដែលបានចាត់ទុកថា កម្ពុជា គឺជាអ្នកឈ្លានពានជាអ្នករំលោភបំពានទៅលើបទឈប់បាញ់ និងជាអ្នកយកប្រជាជនស៊ីវិលធ្វើជាគោលដៅ ។ ទី៣. កម្ពុជាសូមអំពាវនាវដល់ប្រទេសថៃឱ្យបញ្ឈប់នូវរាល់ការផ្សព្វផ្សាយព័ត៌មានមិនពិត និងសូមវិលត្រឡប់មករកកិច្ចសន្ទនាដោយសុទ្ធចិត្តវិញ ដោយអ្នកនាំពាក្យក្រសួងការបរទេសកម្ពុជាបានគូសបញ្ជាក់ថា យុទ្ធនាការនៃការផ្សព្វផ្សាយព័ត៌មានមិនពិតរបស់ថៃ គឺបានធ្វើឱ្យប៉ះពាល់ទៅដល់ទំនុកចិត្តរវាងកម្ពុជា-ថៃ និងក៏ជាការគម្រាមកំហែងចំពោះវឌ្ឍនភាពដែលសម្រចបានក្រោមកិច្ចព្រមព្រៀងនៃបទឈប់បាញ់ផងដែរ ។
ទី៤. កម្ពុជាសូមអំពាវនាវដល់សហគមន៍អន្តរជាតិ រួមទាំងបណ្តាប្រទេសជាសមាជិកអាស៊ាន បណ្តាទីភ្នាក់ងារអង្គការសហប្រជាជាតិ បណ្តាប្រទេសអ្នកសង្កេតការណ៍ ជាពិសេសគឺ ម៉ាឡេស៊ីដែលជាប្រធានអាស៊ានបច្ចុប្បបន្ន រួមនឹងសហរដ្ឋអាមេរិក និងប្រទេសចិន សូមឱ្យគាំទ្រចំពោះយន្តការសត្យានុម័តដើម្បីត្រួតពិនិត្យសភាពការណ៍ ហើយក៏សូមអំពាវនាវដល់បណ្តាប្រព័ន្ធឃោសនាទូទៅឱ្យស្វែងរកការពិតជាសត្យានុម័តដើម្បីគាំទ្រដល់យន្តការផ្ទៀងផ្ទាត់ដោយឯករាជ្យ ចៀសវាងការបកស្រាយដោយឯកតោភាគីដែលមិនបានគិតគូទៅដល់ការពិតដែលបានកើតមានឡើង៕
ចែករំលែកព័តមាននេះ