ប្រទេសអ៊ីរ៉ាក់ ៖ ក្នុងប្រទេសអ៊ីរ៉ាក់ថ្ងៃទី៣តុលាជាថ្ងៃយ៉ាងបង្ហូរឈាមបំផុត តាំងពីចាប់ផ្ដើមបាតុកម្មពីថ្ងៃទី១តុលាមក ដោយក្នុងរយៈពេល៣ថ្ងៃនៃបាតុកម្មហិង្សាទាំងនោះ មនុស្សដល់ទៅ៣១នាក់ហើយបានត្រូវស្លាប់ជាមួយការប៉ះទង្គិចគ្នាខ្លាំងក្លាពុំធ្លាប់មានពីមុនមក រវាងពួកអ្នកតវ៉ានិងកងកម្លាំងសន្តិសុខ។
ចាប់ផ្ដើមពីក្រុងបាដាដចលនាតវ៉ាដែលទាមទារការងារសម្រាប់យុវជន និងការចាកចេញរបស់បណ្ដាមេដឹកនាំដែលពុករលួយ ចលនានោះបានរីករាយដាលស្ទើរនៅពាសពេញភាគខាងត្បូងប្រទេស ហើយប្រែក្លាយទៅជាផ្ទុះហិង្សាជាមួយអ្នកស្លាប់និងអ្នករងរបួសច្រើនសិបនាក់ ដោយគ្រាប់កាំភ្លើង ក្នុងទីក្រុងផ្សេងៗរបស់ប្រទេសក្នុងនោះមានរដ្ឋធានីបាដាដ។
ប្រឈមមុខជាមួយបាតុកម្មតវ៉ាបែបនេះ រដ្ឋាភិបាលរបស់នាយករដ្ឋមន្ត្រីអ៊ីរ៉ាក់ នាថ្ងៃទី៤តុលាត្រូវជួបប្រទះនឹងការសាកល្បងខាងនយោបាយសំខាន់មួយទៀត ជាមួយការស្បថចូលកាន់តំណែងរបស់មហាអាយ៉ាតុលាអាលីស៊ីស្តានី។ ជាប្រមុខអាជ្ញាធរសាសនាសម្រាប់ពួកស៊ីអ៊ីតដែលមានភាគច្រើននៅអ៊ីរ៉ាក់ លោកជាអ្នកមានសិទ្ធិតែងតាំងនិងដកហូតតំណែងនាយករដ្ឋមន្ត្រី។
នាយករដ្ឋមន្ត្រីអ៊ីរ៉ាក់លោកអាដែលអាប់ដែលម៉ាហ៍ឌី កាលពីយប់ថ្ងៃទី៣មកទី៤តុលា បានចេញពីភាពស្ងៀមស្ងាត់ ដើម្បីការពារតុល្យការនៃរដ្ឋាភិបាលរបស់លោក និងការគ្រប់គ្រងវិបត្តិដែលលោកថា គំរាមកំហែងបំផ្លាញរដ្ឋទាំងមូល។ មុននេះតាមសេចក្ដីប្រកាស មួយលោកសម្ដែងការអបអរ ចំពោះការអត់ធ្មត់របស់កងទ័ព ហើយប្រកាសពីបំរាមគោចរណ៍៍នៅក្រុងបាដាដ។ ចំណែកខុន្ទកាល័យរបស់លោក អះអាងពីការជួបជាមួយបណ្ដាតំណាងពួកបាតុករ។
ក្នុងសុន្ទរកថាមួយតាមទូរទស្សន៍ នាយករដ្ឋមន្ត្រិពុំបានថ្លែងដោយផ្ទាល់ចំពោះពួកអ្នកតវ៉ាឡើយ តែលោកបានសន្យាពីការឧបត្ថម្ភបណ្ដាគ្រួសារដែលគ្មានប្រាក់ចំណូល ហើយលោកទាមទារពេលវេលាសម្រាប់បង្កើតការកែទម្រង់នានាដូចការសន្យារបស់លោកពេលលោកឡើងកាន់អំណាច។
ពេលដែលទូរទស្សន៍រដ្ឋកំពុងផ្សាយសុន្ទរកថារបស់លោក ស្នូរកាំភ្លើងបានលាន់ឮនៅកណ្ដាលក្រុងបាដាដ។ នាវេលាយប់ការប៉ះទង្គិចគ្នាបានបន្ត ក្នុងទីក្រុងជាច្រើននាភាគខាងត្បូងប្រទេសព្រមទាំងនៅក្រុងបាដាដដែលនៅទីនោះ បណ្ដារថពាសដែករបស់កងកម្លាំងពិសេស បានលើកចូលធ្វើអន្តរាគមន៍បំបែកពួកបាតុករ។ កងកម្លាំងសន្តិសុខបានបាញ់កំរាមទៅលើដី ហើយបណ្ដាគ្រាប់កាំភ្លើងបានផ្លាតទៅត្រូវពួកបាតុករ៕ (កែសម្រួលដោយ ៖ បុប្ផា)
ចែករំលែកព័តមាននេះ