ទីក្រុងញូយ៉ក៖ នៅទីបំផុត សមត្ថកិច្ចអាមេរិកចាប់បានហើយជនសង្ស័យនៅក្នុងអំពើបាញ់ប្រហារសកម្មជននយោបាយអភិរក្សនិយម និងជាសម្ព័ន្ធមិត្តរបស់លោកត្រាំគឺលោកឆាលី ខឺក (Charlie Kirk)។ ជនសង្ស័យរូបនោះជាបុរសវ័យក្មេង។ នេះបើតាមការបញ្ជាក់របស់អភិបាលរដ្ឋយូតា (Utah)…
ទីក្រុងញូយ៉ក៖ នៅទីបំផុត សមត្ថកិច្ចអាមេរិកចាប់បានហើយជនសង្ស័យនៅក្នុងអំពើបាញ់ប្រហារសកម្មជននយោបាយអភិរក្សនិយម និងជាសម្ព័ន្ធមិត្តរបស់លោកត្រាំគឺលោកឆាលី ខឺក (Charlie Kirk)។ ជនសង្ស័យរូបនោះជាបុរសវ័យក្មេង។ នេះបើតាមការបញ្ជាក់របស់អភិបាលរដ្ឋយូតា (Utah) ដែលជាកន្លែងកើតមានអំពើបាញ់ប្រហារ។ ជនសង្ស័យដែលគេស្គាល់ថាឈ្មោះថៃល័រ រ៉ូប៊ីនសុន (Tyler Robinson) ទំនងជាបានឆ្លើយសារភាពរឿងនេះប្រាប់សច់ញាតិរបស់មិត្តភក្ដិគាត់ម្នាក់ ឬនិយាយប្រាប់មិត្តភក្ដិនោះផ្ទាល់តែម្ដង។ មិនរង់ចាំយូរទេ អ្នកដែលទទួលបានដំណឹងនេះក៏ទាក់ទងទៅនគរបាលភ្លាមតែម្ដង។
ក្រុមគ្រួសាររបស់មិត្តភក្ដិជនសង្ស័យនិយាយប្រាប់សមត្ថកិច្ចខាងស៊ើបអង្កេតថាទើបតែថ្មីៗនេះប៉ុណ្ណោះដែលរ៉ូប៊ីនសុនហាក់ដូចជាវក់នឹងរឿងនយោបាយខ្លាំងមែនទែន ហើយគាត់ឧស្សាហ៍បង្ហាញការមិនពេញចិត្តចំពោះសកម្មភាពរបស់លោកឆាលី ខឺក។ នេះបើតាមអ្វីដែលអភិបាលរដ្ឋយូតានិយាយប្រាប់អ្នកសារព័ត៌មាន។
ឃាតករសម្លាប់លោកឆាលី ខឺកបានរត់គេចផុតពីការតាមប្រមាញ់របស់សមត្ថកិច្ចថ្នាក់មូលដ្ឋាន និងទីភ្នាក់ងារសហព័ន្ធអស់ប្រហែល៣៣ម៉ោងក្រោយការបាញ់ប្រហារនៅសាកលវិទ្យាល័យមួយនៅរដ្ឋយូតា។ នៅក្នុងអំពើឃាតកម្មនោះ ជនដៃដល់ប្រើកាំភ្លើងបាញ់ស៊ីបពីចម្ងាយ ឬស្នាយផឺ (sniper) បាញ់តែមួយគ្រាប់គត់ត្រូវចំបំពង់ករបស់លោកឆាលី ខឺក។
កាលពីមុននេះ ក្រុមអ្នកស៊ើបអង្កេតថ្លែងថាពួកគេប្រទះឃើញកាំភ្លើងវែងមួយដើមដែលទំនងជាជនដៃដល់ប្រើប្រាស់សម្រាប់បាញ់ប្រហារលោកឆាលី ខឺក។ ក្រុមអ្នកស៊ើបអង្កេតក៏បានផ្សព្វផ្សាយរូបថតបុរសដែលជាជនសង្ស័យផងដែរ។ លោកឆាលី ខឺកជាអ្នកនិពន្ធសៀវភៅ, ជាអ្នកសម្របសម្រួលកម្មវិធីផតខាស់ (podcast) និងជាសម្ព័ន្ធមិត្តដ៏ជិតស្និទ្ធរបស់លោកត្រាំដែលជួយប្រូម៉ូត និងឃោសនារកសំឡេងគាំទ្រពីសំណាក់ក្រុមយុវជនវ័យក្មេងនៅអាមេរិក។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ