ទីក្រុងតូក្យូ៖ អាមេរិកថ្ងៃនេះចាប់ផ្ដើមដាក់ពង្រាយជើងទម្របាញ់មីស៊ីលម៉ាកថាយហ្វុន (Typhon) នៅលើទឹកដីជប៉ុនជាលើកដំបូង។ ការដាក់ពង្រាយមីស៊ីលដែលមានវង់ប្រតិបត្តិការមធ្យមនេះបង្ហាញថាទីក្រុងវាស៊ីនតោន និងតូក្យូមានឆន្ទៈចង់ដាក់ពង្រាយអាវុធនៅលើទីចំហ។ ប៉ុន្តែទង្វើនេះត្រូវប្រទេសចិនប្រកាសថ្កោលទោសខ្លាំងៗ។ ចិនថានេះជាការបង្កអស្ថិរភាពនៅក្នុងតំបន់។
ថាយហ្វុនជាមីស៊ីលបាញ់ចេញពីដីគោក ហើយអាចបាញ់គ្រាប់មីស៊ីលបណ្ដែតម៉ាកថូម៉ាកហក (Tomahawk) ចេញពីប្រទេសជប៉ុនទៅដល់តំបន់ជាប់សមុទ្រខាងកើតប្រទេសចិន និងប្រទេសរុស្ស៊ី។ មីស៊ីលនេះត្រូវអាមេរិក និងជប៉ុនប្រើប្រាស់នៅក្នុងសមុទ្រយោធាប្រចាំឆ្នាំដែលមានឈ្មោះថានាគកំណាច។ លំហាត់យោធារយៈពេល២សប្ដាហ៍នេះមិនសាមញ្ញពេកទេព្រោះបានប្រើប្រាស់កម្លាំងទ័ព២ម៉ឺននាក់ រួមទាំងនាវាចម្បាំង និងជើងទម្របាញ់មីស៊ីលជាច្រើនគ្រឿង។
វត្តមានរបស់ជើងទម្រម៉ាកថាយហ្វុននៅលើទឹកដីជប៉ុនកើតឡើងបន្ទាប់ពីអាមេរិកដាក់ពង្រាយជើងទម្របាញ់មីស៊ីលម៉ាកដូចគ្នានេះនៅលើទឹកដីហ្វ៊ីលីពីនកាលពីខែមេសា ឆ្នាំ២០២៤។ ទង្វើនេះត្រូវរុស្ស៊ី និងចិនរិះគន់ខ្លាំងៗ។ ប្រទេសទាំង២ចោទប្រកាន់ថាអាមេរិកកំពុងជំរុញឱ្យមានការរត់ប្រណាំងសព្វាវុធ។ នៅឆ្នាំនេះ អាមេរិកក៏បានធ្វើសមយុទ្ធយោធាបាញ់គ្រាប់កាំភ្លើងពិតនៅលើទឹកដីអូស្ត្រាលីផងដែរ។
ប៉ុន្តែអ្វីដែលធ្វើឱ្យប្រទេសចិននៅមិនស្រណុកខ្លួននោះគឺសមយុទ្ធយោធាទ្រង់ទ្រាយធំរវាងអាមេរិក និងជប៉ុនដែលស្ថិតនៅកៀកនឹងរបងផ្ទះរបស់ខ្លួនតែម្ដង។ ក្រុមអ្នកវិភាគយល់ថាចិនមិនអាចនៅស្ងៀមបានទេ ហើយចិននឹងធ្វើអ្វីម៉្យាងដើម្បីជាការបញ្ចេញប្រតិកម្ម។ អាមេរិកចាត់ទុកកោះអ៊ីវ៉ាគូនិ (Iwakuni) ជាផ្នែកមួយនៃស្រឡាយកោះនានាដែលលាតសន្ធឹងចាប់ពីជប៉ុនរហូតដល់ហ្វ៊ីលីពីន។
ជើងទម្រម៉ាកថាយហ្វុនក្រៅពីអាចបាញ់មីស៊ីលបណ្ដែតម៉ាកថូម៉ាកហក វាក៏អាចបាញ់មីស៊ីលម៉ាកអែសអឹម៦ (SM-6) បានផងដែរ។ មីស៊ីលនេះផលិតឡើងសម្រាប់បាញ់នាវាចម្បាំង ឬយន្តហោះចម្បាំងនៅក្នុងរង្វង់ប្រតិបត្តិការ២រយគីឡូម៉ែត្រ។ អាមេរិកឥឡូវនេះកំពុងពន្លឿនការផលិតអាវុធប្រឆាំងនាវាចម្បាំងដើម្បីដាក់ពង្រាយនៅទូទាំងទ្វីបអាស៊ី។
ខុសពីមីស៊ីលជំនាន់ក្រោយៗទៀត ថាយហ្វុនអាចបាញ់គ្រាប់មីស៊ីលដែលកំពុងប្រើប្រាស់សព្វថ្ងៃ ហើយងាយស្រួលផលិតថែមទៀតផង។ ដូច្នេះធ្វើឱ្យអាមេរិកងាយស្រួលសហការដាក់ពង្រាយនៅតាមគោលដៅសំខាន់ៗ។ ប្រទេសជប៉ុនចាប់ផ្ដើមកសាងកម្លាំងយោធាឡើងវិញជាបណ្ដើរៗ និងត្រៀមបង្កើតខ្ទង់ថវិកាចំណាយលើវិស័យការពារជាតិបន្ថែមទៀត។ ជប៉ុនទិញមីស៊ីលបណ្ដែតថូម៉ាហកសម្រាប់បំពាក់នៅលើនាវាចម្បាំងរបស់ខ្លួន។ ក្រៅពីនេះ ជប៉ុនក៏ផលិតគ្រាប់មីស៊ីលរយៈចម្ងាយមធ្យមដោយខ្លួនឯងផងដែរ។
ដោយសារស្ថានការណ៍ប្រែប្រួលនៅក្នុងតំបន់ និងនៅលើពិភពលោក កោះតៃវ៉ាន់ក៏ត្រៀមបង្កើនខ្ទង់ចំណាយលើវិស័យការពារជាតិនៅឆ្នាំ២០២៦ផងដែរ។ ពោលគឺបង្កើនដល់៣%នៃផលិតសរុបក្នុងស្រុក ជីឌីភី (GDP) របស់ខ្លួន។ ក្រោយពេលធ្វើសមយុទ្ធយោធាអាមេរិក-ជប៉ុនរួចហើយ ជើងទម្រថាយហ្វុននឹងត្រូវរុះរើទៅដាក់នៅទីតាំងថ្មី។ មន្ត្រីយោធាអាមេរិកសូមមិនធ្វើអត្ថាធិប្បាយថាតើជើងទម្រនេះនឹងយកទៅដាក់នៅទីណា ឬក៏ថានឹងវិលទៅជប៉ុនវិញដែរឬទេ។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ