តើអ្នកធ្លាប់គិតទេថា ទម្លាប់គេងមិនលក់របស់អ្នកអាចជាមូលហេតុចម្បងដែលនាំឲ្យកើតជំងឺទឹកនោមផ្អែម? ការខ្វះដំណេកមិនមែនជារឿងធម្មតាដែលត្រូវមើលរំលងនោះទេ ព្រោះវាអាចប៉ះពាល់ដល់តុល្យភាពជាតិស្ករក្នុងរាងកាយរបស់អ្នកយ៉ាងខ្លាំង។
ខាងក្រោមនេះគឺជាមូលហេតុដែលការគេងមិនគ្រប់គ្រាន់អាចបណ្ដាលឱ្យមានជំងឺទឹកនោមផ្អែម៖
១. រំខានដល់ការផលិតអាំងស៊ុយលីន
ដំណេកដើរតួនាទីយ៉ាងសំខាន់ក្នុងការគ្រប់គ្រងអ័រម៉ូនរបស់យើង។ នៅពេលអ្នកគេងមិនគ្រប់គ្រាន់ រាងកាយនឹងមានការរំខានដល់ការផលិត អាំងស៊ុយលីន ដែលជាអ័រម៉ូនជួយបញ្ជូនជាតិស្ករពីឈាមទៅកាន់កោសិកា។ នេះធ្វើឱ្យកម្រិតជាតិស្ករក្នុងឈាមកើនឡើង និងបង្កើនហានិភ័យនៃជំងឺទឹកនោមផ្អែមប្រភេទទី២។
២. កាត់បន្ថយភាពរសើបរបស់កោសិកាចំពោះអាំងស៊ុយលីន
ការគេងមិនលក់អាចធ្វើឱ្យកោសិកានៃរាងកាយរបស់អ្នកមិនសូវមានភាពរសើបចំពោះអាំងស៊ុយលីន។ នេះមានន័យថា អាំងស៊ុយលីនមិនអាចដំណើរការបានល្អដើម្បីគ្រប់គ្រងជាតិស្ករបានទេ ដែលនាំឱ្យជាតិស្ករកើនឡើងក្នុងឈាម។
៣. ជំរុញចំណង់អាហារមិនល្អ
នៅពេលអ្នកគេងមិនលក់ អ័រម៉ូនដែលគ្រប់គ្រងចំណង់អាហារមានការរំខាន។ អ័រម៉ូន ghrelin ដែលធ្វើឱ្យអ្នកឃ្លានកើនឡើង ចំណែកឯអ័រម៉ូន leptin ដែលធ្វើឱ្យអ្នកឆ្អែតចុះខ្សោយ។ នេះបណ្ដាលឱ្យអ្នកមានចំណង់ចង់ញ៉ាំអាហារផ្អែម ឬអាហារដែលមានជាតិខ្លាញ់ខ្ពស់ ដែលអាចបង្កើនហានិភ័យនៃជំងឺធាត់ និងទឹកនោមផ្អែម។
ប្រសិនបើអ្នកមានបញ្ហាគេងមិនលក់ញឹកញាប់ សូមកុំមើលរំលង។ ការផ្លាស់ប្ដូរទម្លាប់គេងឱ្យបានល្អ អាចជួយការពារខ្លួនអ្នកពីជំងឺធ្ងន់ៗជាច្រើន ជាពិសេសជំងឺទឹកនោមផ្អែម៕
ចែករំលែកព័តមាននេះ