ខេត្តកំពង់ឆ្នាំង ៖ ក្រុមក្មេងចំនួន៤នាក់ត្រូវបានកម្លាំងសមត្ថកិច្ចនគរបាលស្រុករលាប្អៀរ ឃាត់ខ្លួន កាលពីថ្ងៃទី១៤ កញ្ញា បន្ទាប់ពីធ្វើសកម្មភាពធ្លាក់ប្លន់យកម៉ូតូជនរងគ្រោះមួយគ្រឿង រួចគេចខ្លួនបាន៣ថ្ងៃ ។ ប្រភពពីសមត្ថកិច្ចនគរបាលបានឲ្យដឹងថា…
ខេត្តកំពង់ឆ្នាំង ៖ ក្រុមក្មេងចំនួន៤នាក់ត្រូវបានកម្លាំងសមត្ថកិច្ចនគរបាលស្រុករលាប្អៀរ ឃាត់ខ្លួន កាលពីថ្ងៃទី១៤ កញ្ញា បន្ទាប់ពីធ្វើសកម្មភាពធ្លាក់ប្លន់យកម៉ូតូជនរងគ្រោះមួយគ្រឿង រួចគេចខ្លួនបាន៣ថ្ងៃ ។
ប្រភពពីសមត្ថកិច្ចនគរបាលបានឲ្យដឹងថា កាលពីវេលាម៉ោង១១យប់ថ្ងៃទី១១ ខែកញ្ញា ឆ្នាំ ២០២៥ មានក្មេងមួយក្រុមប្រហែលចំនួន៧នាក់ជិះម៉ូតូប្រហែល៥គ្រឿងបានធ្វើសកម្មភាពដេញវាយនិងធាក់ទៅលើជនរងគ្រោះមួយក្រុមទៀតជិះម៉ូតូ១គ្រឿងមានគ្នា៣នាក់ នៅតាមបណ្ដោយផ្លូវជាតិលេខ៥ នៅចន្លោះគីឡូម៉ែត្រលេខ៧៥ និងលេខ៧៦ ស្ថិតក្នុងភូមិអូតានីស ឃុំរលាប្អៀរ ស្រុករលាប្អៀរ ពេលនោះ ជនរងគ្រោះបានរត់ចោលម៉ូតូ ហើយក្រុមជនដៃដល់ក៏យកម៉ូតូគេចខ្លួនទៅបាត់ ។
ក្រោយពេលកើតហេតុ ជនរងគ្រោះទាំង៣នាក់ ១-ឈ្មោះយ៉ា រ៉ាក់ អាយុ២០ឆ្នាំ ២-ឈ្មោះ ដាំ ប៊ុនចេម អាយុ១៧ឆ្នាំ និង៣-ឈ្មោះ ចែម ស្រីលីន អាយុ១៧ឆ្នាំ បានមកដាក់ពាក្យប្ដឹងទៅសមត្ថកិច្ចនគរបាលស្រុករលាប្អៀរ។
ក្រោយទទួលពាក្យបណ្ដឹង សមត្ថកិច្ចនគរបាលបានធ្វើការស្រាវជ្រាវរហូតដល់ឃាត់ខ្លួនបានជនសង្ស័យចំនួន៤នាក់ ១-ឈ្មោះ ម៉ុក ភក្តី ហៅទី ២-ឈ្មោះញ៉ា សុផារី ហៅរី អាយុ ២០ឆ្នាំ ៣-ឈ្មោះហ៊ឹម ភានុន អាយុ១៧ឆ្នាំ និង៤-ឈ្មោះរិទ្ធ សុរាប អាយុ១៥ ឆ្នាំ ទាំង៤នាក់ ខ្លះនៅស្រុកបរិបូណ៌ ខ្លះនៅស្រុកកំពង់លែង និងខ្លះស្រុករលាប្អៀរ ។ ចំណែកម៉ូតូបានរកឃើញនៅក្នុងវត្តគោករំដួល ស្ថិតក្នុងឃុំជើងគ្រាវ ស្រុករលាប្អៀរ ។
ជនសង្ស័យទាំង៤នាក់ ត្រូវបាននគរបាលស្រុករលាផ្អៀរ កសាងសំណុំរឿងមកស្នងការដ្ឋាននគរបាលខេត្តកំពង់ឆ្នាំង ដោយចោទប្រកាន់ពីបទលួចមានស្ថានទម្ងន់ទោស ។ ចំណែកម៉ូតូបានប្រគល់ជូនម្ចាស់ដើមវិញ៕
ចែករំលែកព័តមាននេះ