បង្ក្រា.បករណីជនជាតិប៉ាគីស្ថានចាប់គ្នាជំរិតទារប្រាក់លើដីព្រះសីហនុ
- ព្រះសីហនុ
ខេត្តព្រះសីហនុ ៖ នៅថ្ងៃទី១៤ ខែកញ្ញា ឆ្នាំ២០២៥ វេលាម៉ោង៧ព្រឹកនៅចំណុច JR Bar ក្នុងភូមិ៤ សង្កាត់លេខ៤…
ខេត្តព្រះសីហនុ ៖ នៅថ្ងៃទី១៤ ខែកញ្ញា ឆ្នាំ២០២៥ វេលាម៉ោង៧ព្រឹកនៅចំណុច JR Bar ក្នុងភូមិ៤ សង្កាត់លេខ៤ ក្រុងព្រះសីហនុ មានករណីចាប់មនុស្សជំរិតទារប្រាក់ បង្កឡើងដោយជនសង្ស័យ៥នាក់ បានចាប់បុរសជនជាតិប៉ាគីស្ថានម្នាក់ រុញចូលក្នុងរថយន្ត១គ្រឿង ម៉ាក GS-300 ពណ៌ស ។
នៅក្នុងរថយន្ត ជនសង្ស័យបានវាយគំរាមជនរងគ្រោះយកប្រាក់ចំនួន១៤០០ដុល្លារអាមេរិក និងទូរស័ព្ទ១គ្រឿងម៉ាកអាយហ្វូន១៦ Pro Max ព្រមទាំងនិយាយគំរាមជនរងគ្រោះថា ២ថ្ងៃក្រោយត្រូវយកប្រាក់ឱ្យពួកគេចំនួន ១០ ០០០ដុល្លារអាមេរិកទៀត ។ បន្ទាប់ពីកើតហេតុ១ម៉ោងក្រោយមក នៅវេលាម៉ោងប្រហែល៨ព្រឹកថ្ងៃដដែល ជនសង្ស័យបានយកជនរងគ្រោះទៅទម្លាក់ចោលនៅតំបន់ឆាយណាថោន ហើយជនសង្ស័យក៏បានបើករថយន្តគេចខ្លួនបាត់ ។
បន្ទាប់មក ជនរងគ្រោះបានមកដាក់ពាក្យបណ្ដឹងនៅអធិការដ្ឋាននគរបាលក្រុងព្រះសីហនុ ។ បន្ទាប់ពីមានហេតុការណ៍នេះកើតឡើង លោកឧត្តមសេនីយ៍ឯកអគ្គស្នងការរង និងជាស្នងការនគរបាលខេត្តបានចាត់លោកឧត្តមសេនីយ៍ត្រី ណុប បញ្ញា ស្នងការរងទទួលផែនការងារនគរបាលព្រហ្មទណ្ឌដឹកនាំកម្លាំងព្រហ្មទណ្ឌ និងកម្លាំងអធិការដ្ឋាននគរបាលក្រុងព្រះសីហនុធ្វើការស្រាវជ្រាវភ្លាមៗ ។
រហូតដល់ម៉ោងប្រហែល១១ និង៥៥នាទីយប់ថ្ងៃដដែល ដោយបានកិច្ចសហការពីកម្លាំងស្នងការដ្ឋាននគរបាលខេត្តកំពត បានឃាត់ខ្លួនជនសង្ស័យម្នាក់ បន្ទាប់មកបន្តសហការជាមួយកម្លាំងអធិការដ្ឋាននគរបាលខណ្ឌសែនសុខនៃស្នងការដ្ឋាននគរបាលរាជធានីភ្នំពេញឃាត់ខ្លួនបានបក្ខពួកជនសង្ស័យចំនួន២នាក់ទៀត ។
មកដល់ថ្ងៃទី១៥ ខែកញ្ញា ឆ្នាំ២០២៥ សមត្ថកិច្ចឃាត់ខ្លួនជនសង្ស័យបានចំនួន៣នាក់ សុទ្ធសឹងជាបុរសជនជាតិប៉ាគីស្ថាន ចំណែកបក្ខពួកនៅសេសសល់ចំនួន២នាក់ទៀត សមត្ថកិច្ចកំពុងស្រាវជ្រាវស្វែងរកជាបន្ត ៕
ចែករំលែកព័តមាននេះ