គន្លឹះជ្រើសរើសអាហារសម្រាប់សម្រកទម្ងន់ ការសម្រកទម្ងន់ប្រកបដោយប្រសិទ្ធភាព និងសុវត្ថិភាព មិនមែនផ្តោតតែលើការញ៉ាំតិចនោះទេ គឺសំខាន់លើការញ៉ាំឲ្យបានត្រឹមត្រូវ ។ ការជ្រើសរើសប្រភេទអាហារត្រឹមត្រូវអាចជួយដុតបំផ្លាញជាតិខ្លាញ់ និងរក្សាសុខភាពល្អ ។ ១….
គន្លឹះជ្រើសរើសអាហារសម្រាប់សម្រកទម្ងន់
ការសម្រកទម្ងន់ប្រកបដោយប្រសិទ្ធភាព និងសុវត្ថិភាព មិនមែនផ្តោតតែលើការញ៉ាំតិចនោះទេ គឺសំខាន់លើការញ៉ាំឲ្យបានត្រឹមត្រូវ ។ ការជ្រើសរើសប្រភេទអាហារត្រឹមត្រូវអាចជួយដុតបំផ្លាញជាតិខ្លាញ់ និងរក្សាសុខភាពល្អ ។
១. អាហារដែលត្រូវញ៉ាំ
បន្លែស្លឹកបៃតង និងផ្លែឈើ ៖ ដូចជាស្ពៃក្តោប សាលាដ ត្រសក់ ផ្លែប៉ោម និងផ្លែបឺរជាដើម ។ អាហារទាំងនេះមានកាឡូរីទាប តែសម្បូរទៅដោយជាតិសរសៃ (Fiber) និងវីតាមីន ដែលជួយឲ្យឆ្អែតបានយូរ និងជួយសម្រួលដល់ប្រព័ន្ធរំលាយអាហារ ។
ប្រូតេអ៊ីនគ្មានខ្លាញ់ ៖ ដូចជា សាច់ត្រី សាច់មាន់ (គ្មានស្បែក) ស៊ុត និងសណ្តែក។ ប្រូតេអ៊ីនជួយទ្រទ្រង់សាច់ដុំ និងបង្កើនការដុតបំផ្លាញកាឡូរីក្នុងរាងកាយ ។
គ្រាប់ធញ្ញជាតិទាំងមូល ៖ ដូចជា អង្ករសម្រូប នំប៉័ងស្រូវសាលី និងពោត។ អាហារទាំងនេះផ្តល់ថាមពលយូរអង្វែង និងមានជាតិសរសៃខ្ពស់ ជួយកាត់បន្ថយការឃ្លានអាហារផ្អែម ឬខ្លាញ់។
ខ្លាញ់ល្អ ៖ ដូចជា ខ្លាញ់ពីផ្លែបឺរ ប្រេងអូលីវ និងគ្រាប់ធញ្ញជាតិមួយចំនួន ។ ខ្លាញ់ទាំងនេះជួយដល់សុខភាពបេះដូង និងជួយឲ្យមានអារម្មណ៍ឆ្អែត។
២. គន្លឹះបន្ថែម
ផឹកទឹកឲ្យបានច្រើន៖ ទឹកជួយបង្កើនការដុតបំផ្លាញកាឡូរី និងកាត់បន្ថយការឃ្លាន ។ ពេលខ្លះ រាងកាយច្រឡំការស្រេកទឹកទៅជាការឃ្លាន ។
ញ៉ាំឲ្យបានទៀងទាត់ ៖ ការញ៉ាំអាហារតិចៗ និងញឹកញាប់ អាចជួយបង្កើនការរំលាយអាហារ និងកាត់បន្ថយការឃ្លាន។
ប្រសិនបើអ្នកចង់សម្រកទម្ងន់បានលឿន និងមានសុវត្ថិភាព ការហាត់ប្រាណ ក៏ជាកត្តាសំខាន់ដែលមិនអាចមើលរំលងបានដែរ ។ ការផ្សំបញ្ចូលគ្នារវាងការញ៉ាំអាហារត្រឹមត្រូវ និងការហាត់ប្រាណទៀងទាត់ នឹងផ្តល់លទ្ធផលល្អបំផុត ៕
ចែករំលែកព័តមាននេះ