យោងតាមការស្រាវជ្រាវថ្មី ការធ្វើលំហាត់ប្រាណលើកទម្ងន់រយៈពេល៩០នាទី ទៅ២ ម៉ោងក្នុងមួយសប្តាហ៍ អាចកាត់បន្ថយហានិភ័យនៃការស្លាប់មុនអាយុបានយ៉ាងច្រើន ។ នេះបើយោងតាមការចុះផ្សាយរបស់ BBC News ។
ទិន្នន័យដែលប្រមូលបានពីការសិក្សារយៈពេលជាច្រើនទសវត្សរ៍បានបង្ហាញថា ការធ្វើលំហាត់ប្រាណធន់ ឬការលើកទម្ងន់ជាប្រចាំក្នុងរយៈពេលយូរ អាចបន្ថយឱកាសនៃការស្លាប់ដោយសារជំងឺបេះដូង និងជំងឺដាច់សរសៃឈាមខួរក្បាលបានយ៉ាងច្រើន ។
អត្ថប្រយោជន៍ក៏រួមបញ្ចូលទាំងការកាត់បន្ថយហានិភ័យនៃការស្លាប់ដោយសារជំងឺសរសៃប្រសាទផងដែរ ។
អ្នកជំនាញបាននិយាយថា វាគឺជាភស្តុតាងបន្ថែមទៀតដែលថា ការហ្វឹកហាត់ផ្អែកលើកម្លាំងអាចជួយការពារ ឬពន្យារពេលសុខភាពមិនល្អ និងអាចបន្ធូរបន្ថយសម្ពាធលើសេវាសុខភាពដែលហួសកម្រិត ។
នាង ខេត ហូហ្គាត មានអាយុត្រឹមតែ២៨ឆ្នាំប៉ុណ្ណោះ នាងចូលចិត្តការហ្វឹកហាត់លើកទម្ងន់ និងការជំរុញទំនុកចិត្តដែលនាងមានអារម្មណ៍ថា វាផ្តល់ឱ្យនាងឥឡូវនេះ ប៉ុន្តែនាងក៏ទទួលស្គាល់អត្ថប្រយោជន៍សុខភាពរយៈពេលវែងពីវាផងដែរ ។
«មានការសិក្សាច្រើនណាស់ ដែលបង្ហាញពីអត្ថប្រយោជន៍ទាំងអស់ ពីការហ្វឹកហាត់កម្លាំង សម្រាប់សុខភាពសរសៃឈាមបេះដូង សាច់ដុំ ឆ្អឹង និងសុខភាពផ្លូវចិត្តរបស់អ្នក»។
ចែករំលែកព័តមាននេះ