អាជ្ញាធរខេត្តមណ្ឌលគិរីបង្ក្រាបទីតាំងឆបោកអនឡាញ (Online Scams) ឃាត់ខ្លួនជនបរទេស២៥នាក់បញ្ជូនទៅតុលាការ
- មណ្ឌលគិរី
ខេត្តមណ្ឌលគិរី ៖ កម្លាំងជំនាញនៃស្នងការដ្ឋាននគរបាលខេត្តមណ្ឌលគិរី សហការជាមួយគណៈបញ្ជាការឯកភាពស្រុកកែវសីមា ក្រោមការសម្របសម្រួលពីតំណាងអយ្យការ បានចុះបង្ក្រាបជាក់ស្ដែងលើទីតាំងមជ្ឈមណ្ឌលឆបោកតាមប្រព័ន្ធបច្ចេកវិទ្យា (Online Scams) មួយកន្លែង និងបានសម្រេចចោទប្រកាន់លើជនសង្ស័យជាជនបរទេសចំនួន ២៥នាក់។
យោងតាមសេចក្តីប្រកាសព័ត៌មានដែលកោះសន្តិភាពទើបទទួលបាន នារសៀលថ្ងៃទី៣ ខែឧសភា ឆ្នាំ២០២៦ បានឲ្យដឹងថា ប្រតិបត្តិការនេះ បានធ្វើឡើងកាលពីថ្ងៃទី២៣ ខែឧសភា ឆ្នាំ២០២៦ វេលាម៉ោង១៥:០០នាទី នៅចំណុចបន្ទប់ជួលក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ។
ជាលទ្ធផល ក្នុងកិច្ចប្រតិបត្តិការនោះ សមត្ថកិច្ចបានរកឃើញជនបរទេសសរុប៖ ២៥ នាក់ (ស្រី៣នាក់) មាន២សញ្ជាតិ គឺជនជាតិចិន៣នាក់ និងជនជាតិវៀតណាម២២នាក់ ។ ដកហូតបានកុំព្យូទ័រយួរដៃ (Laptop) ១៣ គ្រឿង, ទូរស័ព្ទដៃ ៦៥ គ្រឿង, កុំព្យូទ័រលើតុ (All in One) ៣ គ្រឿង (កំពុងដំណើរការប្រព្រឹត្តបទល្មើស), កុំព្យូទ័រផ្សេងទៀត ៧៤ គ្រឿង, CPU ១ គ្រឿង, ម៉ូនីទ័រ ១ គ្រឿង រួមនឹងឧបករណ៍បន្ទាប់បន្សំមួយចំនួនទៀត។
យោងតាមលទ្ធផលបឋមនៃការកោសល្យវិច័យលើឧបករណ៍អេឡិចត្រូនិចដោយនាយកដ្ឋានប្រឆាំងបទល្មើសបច្ចេកវិទ្យា បានបង្ហាញថា ក្រុមជនសង្ស័យមានគោលដៅឆបោកទៅលើប្រជាជននៅក្នុងប្រទេសវៀតណាម ដោយប្រើប្រាស់រូបភាព និងល្បិចកលដូចជាបោកប្រាស់ថានឹងនាំពលករទៅធ្វើការងារកសិកម្មនៅប្រទេសកូរ៉េខាងត្បូងដោយខុសច្បាប់ ព្រមទាំងសន្យាផ្តល់ប្រាក់ខែខ្ពស់។រៀបចំ និងប្រើប្រាស់ឯកសារក្លែងបន្លំ រួមមាន៖ ពាក្យស្នើសុំទិដ្ឋាការ (VISA) លិខិតធានា និងពាក្យសុំធ្វើការងារ។បង្កើត និងប្រើប្រាស់គណនីហ្វេសប៊ុកក្លែងបន្លំ ធ្វើជាជនជាតិវៀតណាមដែលកំពុងរស់នៅប្រទេសកូរ៉េខាងត្បូង។
ក្រោយពីបានពិនិត្យរបាយការណ៍ និងភស្តុតាងនានា កាលពីថ្ងៃទី១ ខែមិថុនា ឆ្នាំ២០២៦ តំណាងអយ្យការអមសាលាដំបូងខេត្តមណ្ឌលគិរី បានសម្រេចចោទប្រកាន់ជាផ្លូវការ ចោទប្រកាន់លើជនសង្ស័យទាំង ២៥ នាក់ (ចិន ៣នាក់, វៀតណាម ២២នាក់)៖ ពីបទ «ឆបោកតាមប្រព័ន្ធបច្ចេកវិទ្យា ដោយមានការរៀបចំជាក្រុមមានការចាត់តាំង» តាមបញ្ញត្តិមាត្រា៥កថាខណ្ឌទី១ កថាខណ្ឌទី៣ ចំណុច១នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា។
ចោទប្រកាន់លើជនសង្ស័យគេចខ្លួន (ជនជាតិវៀតណាម១នាក់, ជនជាតិខ្មែរ១នាក់ និងបក្ខពួក)៖ ពីបទ «រៀបចំមជ្ឈមណ្ឌលឆបោកតាមប្រព័ន្ធបច្ចេកវិទ្យា» តាមបញ្ញត្តិមាត្រា៦ កថាខណ្ឌទី១ នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ។
សូមបញ្ជាក់ថា បច្ចុប្បន្ន សំណុំរឿងនេះកំពុងស្ថិតក្នុងចំណាត់ការរបស់តុលាការ ចំណែកឯជនសង្ស័យដែលបានគេចខ្លួន អាជ្ញាធរកំពុងបន្តស្រាវជ្រាវ និងតាមចាប់ខ្លួនដើម្បីយកមកផ្តន្ទាទោសតាមច្បាប់ ៕
ចែករំលែកព័តមាននេះ