អន្តរជាតិ ៖ ដ្រូនអត្តឃាតរបស់អ៊ុយក្រែនបានបើកការវាយប្រហារយ៉ាងខ្លាំងក្លាលើទីតាំងស្តុកប្រេង និងមូលដ្ឋានទ័ពនៅក្នុងទីក្រុង St. Petersburg របស់រុស្ស៊ី មុនពេលវេទិកាសេដ្ឋកិច្ចអន្តរជាតិ St. Petersburg (SPIEF) ចាប់ផ្តើម។ នេះបើតាមប្រភពពី AFP, Reuters, Anadolu Agency និងប្រភពផ្សេងទៀតបានចេញផ្សាយ។
ប្រធានាធិបតីអ៊ុយក្រែន លោក Volodymyr Zelenskyy នៅព្រឹកថ្ងៃទី៣ ខែមិថុនា ឆ្នាំ២០២៦ បានថ្លែងថា ទីក្រុងគៀវបានវាយប្រហារលើមូលដ្ឋានសំខាន់ៗរបស់រុស្ស៊ីក្នុងការវាយប្រហារតាមអាកាសពេញមួយយប់ ដែលរួមមានទាំងស្ថានីយប្រេង St. Petersburg ផងដែរ ដោយបានគូសបញ្ជាក់អំពីសមត្ថភាពវាយប្រហាររយៈចម្ងាយឆ្ងាយរបស់ខ្លួនថា ស្ថានីយនោះមានចម្ងាយប្រហែល ១ ១០០ គីឡូម៉ែត្រពីព្រំដែនអ៊ុយក្រែន។
លោកបានបន្តទៀតថា កងកម្លាំងអ៊ុយក្រែនក៏បានវាយប្រហារលើគោលដៅយោធានៅឯមូលដ្ឋាន Kronstadt របស់រុស្ស៊ីផងដែរ។ ចំណែកគោលដៅមួយទៀត គឺរោងចក្រផលិតអាវុធក្នុងតំបន់ Tambov របស់រុស្ស៊ី ដែលមានចម្ងាយជិត ៦០០ គីឡូម៉ែត្រពីខ្សែត្រៀមជួរមុខ។
ពាក់ព័ន្ធនឹងបញ្ហានេះ លោក Alexander Beglov អភិបាលក្រុង St. Petersburg បានឱ្យដឹងតាមបណ្តាញសង្គម Telegram ថា ហេដ្ឋារចនាសម្ព័ន្ធនៅ Kronstadt, Kirovsky និង Krasnoselsky រងការវាយប្រហារដោយដ្រូនអ៊ុយក្រែននៅព្រឹកព្រលឹមផងដែរ។ មូលដ្ឋានមួយចំនួនត្រូវបានខូចខាត ប៉ុន្តែមិនបានបញ្ជាក់ថាជាកន្លែងណាខ្លះនោះទេ។ ដោយគ្រាន់តែបញ្ជាក់ថា មនុស្សជាច្រើននាក់បានរងរបួស ប៉ុន្តែមិនមានអ្នកស្លាប់បាត់បង់ជីវិតនោះទេ។
ហេតុការណ៍នេះបានកើតឡើង មុនកិច្ចប្រជុំវេទិកាសេដ្ឋកិច្ចអន្តរជាតិ St. Petersburg ដែលគ្រោងនឹងប្រព្រឹត្តទៅចាប់ពីថ្ងៃទី ៣ ដល់ទី ៦ ខែមិថុនា ហើយរំពឹងថានឹងទាក់ទាញអ្នកចូលរួមប្រមាណ ២ ម៉ឺននាក់មកពី ១០០ ប្រទេស។
គួររំលឹកថា កាលពីថ្ងៃទី១ ខែមិថុនា កន្លងទៅ ប្រធានាធិបតីអ៊ុយក្រែនក៏បានអះអាងដែរថា កងកម្លាំងអ៊ុយក្រែនបានវាយប្រហារលើរោងចក្រចម្រាញ់ប្រេងរុស្ស៊ីចំនួន ១៥ កន្លែងនៅចន្លោះខែមករា ដល់ខែឧសភា ដោយជិត ៤០% នៃសមត្ថភាពចម្រាញ់ប្រេងចម្បងរបស់រុស្ស៊ី ត្រូវបានផ្អាកដំណើរការគិតត្រឹមខែឧសភា៕
ចែករំលែកព័តមាននេះ