រាជធានីភ្នំពេញ ៖ ថ្លែងចំពោះមុខលោក ស៊ី ជីនពីង អគ្គលេខាធិការ នៃគណបក្សកុម្មុយនីស្តចិន និងជាប្រធានាធិបតី នៃសាធារណរដ្ឋប្រជាមានិតចិន សម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាមានប្រសាសន៍ថា កម្ពុជាបានចាត់ទុកចិន គឺជាមិត្តចាស់ មិត្តពិតប្រាកដ និងជាទីទុកចិត្តរបស់កម្ពុជា ។
ឯកឧត្តម ជា ធីរិទ្ធ អ្នកនាំពាក្យសម្តេចតេជោ បានឱ្យដឹងថាថា ក្នុងជំនួបពិភាក្សាការងាររវាងសម្ដេចតេជោហ៊ុន សែន និងលោក ស៊ី ជីនពីង នៅមហាវិមានប្រជាជនចិន នៅថ្ងៃទី២៦ ខែមិថុនា ឆ្នាំ២០២៦ លោក ស៊ី ជីនពីង បានហៅសម្តេចតេជោថា ជាមិត្តចាស់ ដែលបានរួមចំណែកយ៉ាងសំខាន់ ក្នុងការភ្ជាប់ក៏ដូចជាកសាងទំនាក់ទំនងមិត្តភាពកម្ពុជា-ចិន ឱ្យកាន់តែរឹងមាំដល់ពេលបច្ចុប្បន្ន ។
លោកប្រធានាធិបតីចិន បានលើកឡើងថា ទំនាក់ទំនងកម្ពុជា-ចិន គឺជាទំនាក់ទំ នងដែលមានភាពរឹងមាំដូចផ្ទាំងសិលាដូច្នោះដែរ ។
អ្នកនាំពាក្យ បានឱ្យដឹងទៀតថា ជាកិច្ចឆ្លើយតប សម្តេចតេជោ បានបង្ហាញការពេញចិត្តជាខ្លាំងចំពោះការលើកឡើងរបស់ឯកឧត្តមប្រធានាធិបតីចិន ព្រោះថា កម្ពុជា-ចិន គឺជាមិត្តដែកថែប ទោះបីជាពិភពលោកមានការប្រែប្រួល និងអាកាសធាតុប្រែប្រួលយ៉ាងណា ក៏ដោយ ប៉ុន្តែទំនាក់ទំនងរវាងប្រទេសទាំងពីរ មិនមានការប្រែប្រួលឡើយ ។
អ្នកនាំពាក្យបញ្ជាក់ថា ៖ “សម្តេចតេជោបានលើកឡើងនៅចំពោះមុខឯកឧត្តម ស៊ី ជីនពីងថា មិត្តភាពកម្ពុជា-ចិន ដែលកម្ពុជា ចាត់ទុកចិនជាមិត្តចាស់ មិត្តពិតប្រាកដ និងជាទីទុកចិត្តរបស់កម្ពុជា” ។
ជាមួយគ្នានោះដែរ អ្នកនាំពាក្យសម្តេចតេជោ ក៏បានឱ្យដឹងថា នៅក្នុងជំនួបប្រធានាធិបតីចិន ក៏បានវាយតម្លៃខ្ពស់ និងកោតសរសើរចំពោះកម្ពុជា ដែលបានបោកសម្អាត នូវឧក្រិដ្ឋកម្មអនឡាញ នៅក្នុងប្រទេសកម្ពុជា។ ហើយចិន តែងតែសហការ និងបន្តសហការជាមួយកម្ពុជាជានិច្ច ក្នុងការបោសសម្អាតឧក្រិដ្ឋកម្មអនឡាញនេះ ។
សូមបញ្ជាក់ថា មិត្តភាពដែកថែប កម្ពុជា-ចិន គឺជាពាក្យគន្លឹះយុទ្ធសាស្ត្រការទូតដ៏រឹងមាំ ដែលឆ្លុះបញ្ចាំងពីទំនាក់ទំនងលំដាប់ខ្ពស់បំផុត និងមិនអាចបំបែកបានរវាងប្រទេសទាំងពីរ។ ទំនាក់ទំនងនេះ ត្រូវបានពង្រឹងជាបន្តបន្ទាប់ពីមួយជំនាន់ទៅមួយជំនាន់ រហូតឈានដល់កម្រិត «ភាពជាដៃគូយុទ្ធសាស្ត្រគ្រប់ជ្រុងជ្រោយ» និងការកសាង «សហគមន៍វាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី»៕
ចែករំលែកព័តមាននេះ