ទីក្រុងសេអ៊ូល៖ អតីតជំទាវទីមួយកូរ៉េខាងត្បូង លោកស្រីគីមឃឹនហ៊ី (Kim Keon Hee) ត្រូវតុលាការផ្ដន្ទាទោសឱ្យជាប់ពន្ធនាគារ៧ឆ្នាំពីបទទទួលសំណូកពាក់ព័ន្ធនឹងការទទួលរបស់មានតម្លៃដូចជាគ្រឿងអលង្ការ និងកាបូបម៉ាកឌីអ័រ (Dior) ជាថ្នូរនឹងការទទួលបានការអនុគ្រោះផ្នែកនយោបាយ។ លោកស្រីគីមឃឹនហ៊ីជាភរិយារបស់អតីតប្រធានាធិបតីកូរ៉េខាងត្បូង លោកយូនស៊ុកយូល ដែលត្រូវបានដកតំណែងកាលពីឆ្នាំ២០២៥បន្ទាប់ពីលោកប៉ុនប៉ងប្រកាសច្បាប់អាជ្ញាសឹក ប៉ុន្តែត្រូវបរាជ័យ។
តុលាការរកឃើញថាលោកស្រីគីមចាប់ផ្ដើមទទួលសំណូកមុនពេល និងអំឡុងពេលស្វាមីកាន់អំណាច។ ចៅក្រមថ្លែងថាលោកស្រីគីមប្រើប្រាស់ឥទ្ធិពលរបស់ខ្លួនជាប្រពន្ធប្រធានាធិបតីដើម្បីផ្ដល់មុខតំណែង និងផ្ដល់ការអនុគ្រោះសម្រាប់អ្នកជំនួញ។ ចៅក្រមអះអាងថាលោកស្រីប្រើប្រាស់ឥទ្ធិពលរបស់ខ្លួនដើម្បីជួយឱ្យអ្នកផ្ដល់សំណូកអាចទទួលបានមុខតំណែងសំខាន់ៗនៅក្នុងរដ្ឋាភិបាល និងរដ្ឋសភា។ លោកស្រីទទួលដោយឥតស្ទាក់ស្ទើរនូវសំណូកគិតជាទឹកប្រាក់មានចំនួនច្រើនដែលប្រជាជនធម្មតារកពេញមួយជីវិតក៏មិនបានសល់ប៉ុណ្ណឹងផង។
នៅក្នុងចំណោមសំណូកដែលលោកស្រីទទួលបានមានដូចជាខ្សែកម៉ាកវ៉ាន់គ្លីហ្វ និងអាប៉ែល (Van Cleef & Arpels), កន្លះពាក់ជាប់នឹងអាវម៉ាកទីហ្វានី (Tiffany) និងក្រវិលមួយគូ។ លោកស្រីក៏ទទួលសំណូកជាសត្វអណ្ដើកផលិតអំពីមាសសុទ្ធមួយគ្រឿង, កាបូបម៉ាកឌីអ័រ (Dior) មួយ, នាឡិកាដៃម៉ាកវ៉ាឆឺរ៉ុន កុងស្តង់ទីន (Vacheron Constantin) តម្លៃ៣៩លានវុន ឬជាង២,៥ម៉ឺនដុល្លារ និងរូបគំនូមួយផ្ទាំងតម្លៃ១៤០លានវុន (ជាង៩ម៉ឺនដុល្លារ)។ ចៅក្រមថ្លែងថាទង្វើរបស់លោកស្រីគីមប៉ះពាល់ធ្ងន់ធ្ងរចំពោះទំនុកចិត្តរបស់សាធារណជននៅក្នុងការជ្រើសរើសមន្ត្រីបម្រើមុខងារសាធារណៈ។
នៅក្នុងចំណោមអ្នកផ្ដល់សំណូកជូនលោកស្រីគីមមានដូចជាម្ចាស់ក្រុមហ៊ុនសំណង់ដែលស្នើសុំមុខតំណែងនៅក្នុងរដ្ឋាភិបាលឱ្យកូនប្រសាប្រុសរបស់ខ្លួន, គ្រូប្រដៅសាសនាគ្រិស្តមួយរូបដែលចង់បន្តរក្សាបណ្ដាញទំនាក់ទំនងជាមួយមន្ត្រីជាន់ខ្ពស់របស់រដ្ឋាភិបាលកូរ៉េខាងត្បូង, អតីតសាកលវិទ្យាធិការសាកលវិទ្យាល័យឯកជនម្នាក់ និងនាយកប្រតិបត្តិក្រុមហ៊ុនលក់សត្វសុនករ៉ូបូត (robotic dog) ដែលចង់ទទួលបានសិទ្ធិផ្គត់ផ្គង់ផលិតផលរបស់ខ្លួនសម្រាប់សេនាការពារសន្តិសុខប្រធានាធិបតី។
ក្រៅពីផ្ដន្ទាទោសឱ្យជាប់ពន្ធនាគារដូចខាងលើ ចៅក្រមជំនុំជម្រះក៏តម្រូវឱ្យលោកស្រីគីមបង់ប្រាក់ពិន័យ៦៤,៨លានវុន និងរឹបអូសសំណូកទាំងនោះត្រឡប់មកវិញប្រសិនបើរកឃើញទីកន្លែងនៃរបស់ទាំងនោះ។ បើគេស្ដាប់ការបកស្រាយពីខាងចុងចោទវិញម្ដង លោកស្រីគីមច្រានចោលការចោទប្រកាន់ទាំងអស់។ មេធាវីរបស់លោកស្រីថ្លែងថាកូនក្ដីរបស់ខ្លួននឹងដាក់ពាក្យប្ដឹងទាស់ទៅសាលាឧទ្ធរណ៍។ លោកស្រីគីមបានចោទប្រកាន់ថាចៅក្រមចេះតែនិយាយពន្លើសភស្តុតាងដើម្បីដាក់បន្ទុកទៅលើលោកស្រី។ នេះបើយោងតាមការផ្សាយរបស់ទីភ្នាក់ងារព័ត៌មានកូរ៉េខាងត្បូងយុនហាប់។
សូមបញ្ជាក់ថាលោកស្រីគីមបន្តជាប់ឃុំចាប់តាំងពីលោកស្រីត្រូវតុលាការរកឃើញពិរុទ្ធភាពពីបទកែប្រែតម្លៃភាគហ៊ុននៅលើទីផ្សារមូលប័ត្រ និងទទួលសំណូកពីក្រុមនិកាយសាសនា Unification Church។ កាលពីខែមេសា តុលាការកាត់ទោសឱ្យលោកស្រីជាប់ពន្ធនាគារ៤ឆ្នាំនៅក្នុងបទចោទប្រកាន់ទាំងនេះ។ ចំណែកស្វាមីរបស់លោកស្រីត្រូវតុលាការផ្ដន្ទាទោសឱ្យជាប់ពន្ធនាគារមួយជីវិតកាលពីខែកុម្ភៈពីបទរៀបចំអំពើបះបរប្រឆាំងនឹងរដ្ឋ និងផលប្រយោជន៍ជាតិ៕ ប្រភព៖ Reuters
ចែករំលែកព័តមាននេះ