ទីក្រុងប៊ែរឡាំង ៖ ប្រទេសអាល្លឺម៉ង់បានសម្រេចចិត្តលុបចោលទាំងស្រុងជាផ្លូវការហើយ នូវគម្រោងនាវាចម្បាំងហ្វ្រីហ្គេត F126 (F126 Frigate) ដែលជាកម្មវិធីសាងសង់នាវាធំបំផុតរបស់ខ្លួន ចាប់តាំងពីសង្គ្រាមលោកលើកទី២មកម្ល៉េះ។
ក្រសួងការពារជាតិអាល្លឺម៉ង់បានបញ្ជាក់ថា ខ្លួននឹងមិនបន្តផែនការសាងសង់នាវាចម្បាំងប្រភេទ F126 ចំនួន ៦ គ្រឿងទៀតនោះទេ ដោយបន្ថែមក្នុងសេចក្តីថ្លែងការណ៍មួយថា ការសម្រេចចិត្តនេះ ធ្វើឡើងដើម្បីឆ្លើយតបនឹងភាពយឺតយ៉ាវយ៉ាងខ្លាំងក្នុងគម្រោង ការកើនឡើងតម្លៃដែលអាចមើលឃើញទុកជាមុន និងហានិភ័យនានា អាចនឹងកើតមានឡើង ប្រសិនបើមានការផ្លាស់ប្តូរក្រុមហ៊ុនម៉ៅការសាងសង់។
ជំនួសមកវិញ លោក Boris Pistorius រដ្ឋមន្ត្រីក្រសួងការពារជាតិអាល្លឺម៉ង់ កាលពីថ្ងៃទី២៤ ខែមិថុនា ឆ្នាំ២៩២៦ បានឱ្យដឹងថា ផែនការនៅពេលនេះ អាល្លឺម៉ង់បានបង្វែរទៅបញ្ជាទិញនាវាចម្បាំងថ្នាក់ Meko A-200 ដែលមានទំហំតូចជាង ចំនួន ៨ គ្រឿងពីក្រុមហ៊ុនផលិតក្នុងស្រុក TKMS ជំនួសឱ្យនាវាចម្បាំងខ្នាតយក្សទាំង ៦ គ្រឿង ដែលគម្រោងត្រូវបានលុបចោល។
យោងតាមសេចក្តីថ្លែងការណ៍មុនៗ នាវាចម្បាំង F126 ដែលមានប្រវែង ១៦៦ ម៉ែត្រ ត្រូវបានរចនាឡើង ដើម្បីក្លាយជានាវាប្រយុទ្ធដ៏ធំបំផុតរបស់កងទ័ពជើងទឹក។ ការសាងសង់នាវាដំបូងគេ (គ្រឿងទី១) បានចាប់ផ្តើមនៅចុងឆ្នាំ ២០២៣ ប៉ុន្តែក្រោយមកបានបង្ហាញឱ្យឃើញថា ការបញ្ជាទិញដែលត្រូវបានប៉ាន់ស្មានថាមានតម្លៃរហូតទៅដល់ ១០ ពាន់លានអឺរ៉ូ ឬ ១១,៣ ពាន់លានដុល្លារអាមេរិក នឹងត្រូវប្រឈមមុខនឹងការយឺតយ៉ាវជាច្រើនឆ្នាំ។ លោក Pistorius បានលើកឡើងថា បញ្ហាស្ថិតលើក្រុមហ៊ុនសាងសង់នាវារបស់ប្រទេសហូឡង់ Damen គឺជាមូលហេតុចម្បង៕ ប្រភព ៖ Anadolu
ចែករំលែកព័តមាននេះ