អង់គ្លេស ៖ ការសិក្សាថ្មីមួយដែលបានចុះផ្សាយនៅក្នុងទស្សនាវដ្តីវេជ្ជសាស្ត្រដ៏ល្បីល្បាញ The Lancet បានបង្ហាញថា អត្រានៃការកើតមាន «ជំងឺធាត់ជ្រុល» (Obesity) ក្នុងចំណោមមនុស្សពេញវ័យ វ័យក្មេង នៅប្រទេសអង់គ្លេស កំពុងមានការកើនឡើងក្នុងល្បឿនយ៉ាងគំហុក ដែលខុសពីការរំពឹងទុករបស់អ្នកស្រាវជ្រាវ ។ នេះបើតាមការចុះផ្សាយរបស់ BBC News ។
តួលេខនៃការកើនឡើងតាមក្រុមអាយុ គឺអាយុ៣០ឆ្នាំ៖ អត្រានៃការរកឃើញករណីធាត់ជ្រុលថ្មីៗក្នុងឆ្នាំ២០២៤-២០២៥ បានកើនឡើងខ្ពស់ជាងជិត២០% បើធៀបទៅនឹងឆ្នាំ ២០១៩-២០២០ ។ ក្រុមអាយុ២០ឆ្នាំ៖ ករណីធាត់ជ្រុលថ្មីបានកើនឡើង១៦%ក្នុងរយៈពេលដូចគ្នា ។
ទោះបីជាជារួម ក្រុមមនុស្សវ័យ៤០ឆ្នាំ និង៥០ឆ្នាំ នៅតែជាក្រុមដែលមានករណីធាត់ជ្រុលច្រើនជាងគេក៏ដោយ ប៉ុន្តែសន្ទុះនៃការកើនឡើងយ៉ាងលឿនក្នុងចំណោមក្រុមយុវវ័យបែបនេះ គឺជាសញ្ញាអាសន្នមួយ ។
អ្នកជំនាញបានព្រមានថា ការធាត់ជ្រុលតាំងពីវ័យក្មេង បង្កើនហានិភ័យខ្ពស់ក្នុងការកើតជំងឺរ៉ាំរ៉ៃផ្សេងៗដូចជា ជំងឺទឹកនោមផ្អែម ជំងឺបេះដូង និងជំងឺមហារីកលឿនជាងមុន។
និន្នាការនៃការធាត់ជ្រុលតាំងពីវ័យក្មេងនេះ កើតមានច្រើនជាងគេទៅលើក្រុមមនុស្សដែលមិនមែនជាជនជាតិស្បែកស ។ តាមការសិក្សាក៏បានរកឃើញផងដែរថា តំបន់ដែលមានកម្រិតជីវភាពខ្វះខាត ឬក្រីក្រខ្លាំង មានអត្រាកើនឡើងនៃអ្នកជំងឺធាត់ជ្រុលខ្ពស់បំផុត ។
ក្រុមអ្នកស្រាវជ្រាវបានសន្និដ្ឋានថា ទោះបីជាពួកគេធ្លាប់ដឹងពីទម្រង់នៃការរីករាលដាលនៃជំងឺធាត់ជ្រុលនេះខ្លះៗក៏ដោយ ប៉ុន្តែការបង្កើនល្បឿននៃករណីថ្មីៗចំពោះមនុស្សពេញវ័យវ័យក្មេងបែបនេះ គឺជាគំរូមួយដែលពួកគេមិនធ្លាប់នឹកស្មានដល់នោះឡើយ ។
ចែករំលែកព័តមាននេះ