អភិបាលស្រុកពោធិ៍រៀង ដឹកនាំមន្ត្រីជំនាញចុះពិនិត្យមើលដីបឹងសាធារណៈ ដើម្បីពង្រឹងការគ្រប់គ្រង និងអភិវឌ្ឍមូលដ្ឋាន
- ព្រៃវែង
ខេត្តព្រៃវែង ៖ នៅរសៀលថ្ងៃទី 2 មិថុនា លោក វ៉ា ធីមអភិបាលស្រុកពោធ៍រៀង បានដឹកនាំមន្ត្រីជំនាញពាក់ព័ន្ធ ព្រមទាំងអាជ្ញាធរមូលដ្ឋានជាច្រើនរូបចុះទៅពិនិត្យមើលស្ថានភាពដីបឹងសាធារណៈនៅក្នុងឃុំចំនួន 2 ក្នុងស្រុកពោធិ៍រៀង គឺបឹងសាធារណៈក្នុងឃុំព្រែកតាសរ និងបឹងទំនប់ថ្មីក្នុងឃុំកំពង់ឫស្សី។
ការចុះពិនិត្យមើលស្ថានភាពបីបឹងសាធារណៈនេះ មានគោលបំណងស្វែងយល់ពីស្ថានភាពពិតប្រាកដនៃដីបឹងទាំងនោះ ដើម្បីពង្រឹងការគ្រប់គ្រងទ្រព្យសម្បត្តិរដ្ឋ និងរៀបចំផែនការអភិវឌ្ឍន៍ប្រព័ន្ធទឹក សម្រាប់បម្រើដល់វិស័យកសិកម្ម។
លោក វ៉ា ធីម អភិបាលស្រុកពោធ៍រៀង បានឲ្យដឹងថា ការចុះពិនិត្យនេះ ក្រៅពីស្វែងយល់ពីស្ថានភាពជាក់ស្ដែងនៃដីបឹងហើយ ក៏ដើម្បីការពារកុំឲ្យមានការទន្ទានកាន់កាប់ខុសច្បាប់ពីសំណាក់ប្រជាពលរដ្ឋផងដែរ។ ជាមួយគ្នានេះក៏ស្វែងយល់ពីតម្រូវការក្នុងការស្ដារ និងថែរក្សាប្រភពទឹកធម្មជាតិ សម្រាប់ឲ្យបងប្អូនប្រជាពលរដ្ឋក្នុងមូលដ្ឋាន អាចទាញយកផលប្រយោជន៍ ក្នុងការបង្ករបង្កើនផលស្រូវនិងដំណាំរួមផ្សំផ្សេងៗផងដែរ។
លោកអភិបាលស្រុក ក៏បានណែនាំដល់អាជ្ញាធរឃុំព្រែកតាសរ និងឃុំកំពង់ឫស្សី ត្រូវបន្តយកចិត្តទុកដាក់ខ្ពស់ក្នុងការគ្រប់គ្រងដីធ្លី និងប្រភពទឹកសាធារណៈរបស់រដ្ឋ ដោយសហការណ៍ជាមួយមន្ត្រីជំនាញ ដើម្បីធានាបាននៅនិរន្តរភាពបរិស្ថាន និងផលប្រយោជន៍រួមរបស់សហគមន៍ទាំងមូល៕
ចែករំលែកព័តមាននេះ