រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអះអាងនៅព្រឹកថ្ងៃទី០៣ ខែមិថុនា ឆ្នាំ២០២៦ថា រាជរដ្ឋាភិបាល គ្មានផែនការកាត់បន្ថយការចំណាយលើវិស័យអប់់រំ និងសុខាភិបាល ទៅពង្រឹងវិស័យការពារជាតិឡើយ ។
សម្តេចធិបតី បានលើកឡើងថា មានការផ្សព្វផ្សាយថា ឆ្នាំ២០២៧ រាជរដ្ឋាភិបាលគ្រោងកាត់បន្ថយការចំណាយថវិការជាង១៧០លានដុល្លារពីវិស័យអប់រំ និងសុខាភិបាល ដើម្បីយកទៅបង្កើនថវិកាលើវិស័យការពាជាតិ ដូច្នេះសម្តេចសូមបញ្ជាក់ថា គ្មានករណីនេះទេ ។
សម្តេចធិបតី បានបញ្ជាក់ថា “គ្មានករណីនេះទេ រាជរដ្ឋាភិបាលមិនមានការកាត់បន្ថយអប់រំ និងសុខាភិបាលទេ ។ ការចំណាយលើវិស័យការពារជាតិ កើនមែន តែវិស័យសង្គមកិច្ច អប់រំ និងសុខាភិបាល ក៏នឹងមិនកាត់ទេ គឺមានតែកើនដល់ឆ្នាំ២០២៩” ។
ថ្លែងនៅក្នុងពិធី សម្ពោធអគារកម្ពស់៣ជាន់ សមិទ្ធផលនានា និងប្រគល់សញ្ញាបត្រគ្រូបង្រៀនកម្រិតមូលដ្ឋាន និងសញ្ញាបត្របរិញ្ញាបត្រអប់រំ ឯកទេសអប់រំកាយ ជូនដល់គរុសិស្ស គរុនិស្សិត នៃវិទ្យាស្ថានជាតិអប់រំកាយ និងកីឡា សម្តេចធិបតីបានបញ្ជាក់ថា រាជរដ្ឋាភិបាលមានថវិកាគ្រប់គ្រាន់នៅក្នុងការបង្កើនថវិការលើការពារជាតិ និងសន្តិសុខជាតិ ។
សម្តេចធិបតី បានបន្តថា រាជរដ្ឋាភិបាលតាំងពីអណត្តិមុន មកដល់ពេលនេះ នឹងអនាគត ធនធានមនុស្សនៅតែជាគោលដៅធំបំផុត ។
សម្តេចធិបតី បានបន្តថា ពីឆ្នាំ២០២៤ ដល់ឆ្នាំ២០២៦ បីឆ្នាំមកនេះ ថវិកានៅក្នុងវិស័យសង្គមកិច្ច អប់រំ និង សុខាភិបាល ជាមធ្យមកើនឡើងដល់ជាង២,៦០០លានដុល្លារ ពោលគឺកើនជាមធ្យម៧ភាគរយ វិស័យការពារជាតិ និងសន្តិសុខសណ្តាប់ធ្នាប់មានជាង ១,១០០លានដុល្លារ ពោលគឺកើនជាមធ្យមតែ៣,៣ភាគរយទេ ៕
ចែករំលែកព័តមាននេះ